గోకర్ణ విశిష్టత..
హిందూ పురాణల్లో గోకర్ణకు (Gokarna) అత్యంత విశిష్టత ఉంది. ఇక్కడ స్వయంగా శివుడు ఆత్మలింగంలో కొలువై ఉన్నాడని ప్రసిద్ధి. త్రేతాయుగంలో రావణాసురుడు ఘోర తపస్సు చేసి శివుడి మెప్పు పొంది ఒక ఆత్మలింగం కావాలనే వరం అడుగుతాడు. అందుకు అంగీకరించిన శివుడు ఒక షరతు విధించి ఆ లింగాన్ని ఇస్తాడు. తాను ఇచ్చిన ఆత్మ లింగాన్ని ఎక్కడా భూమిపై దించకుండా తీసుకెళ్లాలని ఆదేశిస్తాడు. ఒకవేళ ఏదైనా కారణం చేత కింద పెడితే ఆ లింగం అక్కడే ప్రతిష్టించుకుపోతుందని, తిరిగి పైకి ఎత్తడం కుదరదని శివుడు హెచ్చరిస్తాడు. అందుకు అంగీకరించిన రావణాసురుడు ఆ ఆత్మలింగాన్ని తీసుకెళ్తుండగా శ్రీ మహా విష్ణువు ఈ విషయాన్ని గ్రహించి రావణాసురిడిని మాయ చేస్తాడు. తన మాయతో సూర్యాస్తమయం అయ్యేలా చేయడంతో రావణాసురుడు సంధ్యా వందనం చేసుకోవాలని భావిస్తాడు. (Photo Credit: Unsplash)
ఆత్మ లింగం కొలువైన స్థలం..
అప్పుడు అక్కడొక బ్రాహ్మణ బాలుడి రూపంలో ఉన్న వినాయకుడికి ఆ లింగాన్ని (Atma Linga) ఇచ్చి తాను సంధ్యా వందనం చేసి వచ్చేవరకు ఆత్మలింగాన్ని పట్టుకోవాలని కోరతాడు. అయితే, ఆ బాలుడు తాను ఎక్కువసేపు బరువును మోయలేనని త్వరగా రావాలని చెప్తాడు. ఒక వేళ తాను లింగాన్ని మోయలేకపోతే మూడు సార్లు పిలుస్తానని, ఆలోపు వచ్చేయాలని కోరతాడు. అందుకు అంగీకరించిన రావణాసురుడు సంధ్యా వందనం చేయడానికి వెళతాడు. ఈ లోపు బాలుడు మూడుసార్లు రావణాసురుడిని పిలిచినా సంధ్యావందనం మధ్యలో ఉండటంతో రాలేకపోతాడు. చివరికి బాలుడి రూపంలో ఉన్న వినాయకుడు ఆ లింగాన్ని అక్కడే కింద పెట్టి మాయమవుతాడు. ఆ ప్రదేశమే గోకర్ణగా విశ్వసిస్తారు. అయితే, తనని మాయచేయడానికి దేవతలు చేసిన పన్నాగం అని గ్రహించిన రావణాసురుడు అప్పుడు ఆ లింగం పైనున్న కవచాన్ని తీసి మూడు ముక్కలను మూడు దిక్కుల్లో విసిరేస్తాడు. అవి సజ్జేశ్వరం, గుణేశ్వరం, మృదేశ్వరం ప్రాంతాల్లో పడతాయి. దీంతో ఇవి కూడా ప్రముఖ ఆలయాలుగా విరాజిల్లుతున్నాయి. (Photo Credit: Unsplash)
ఓమ్ బీచ్..
ఇక గోకర్ణ అరేబియా సముద్ర తీర ప్రాంతంలో ఉండటంతో ఇక్కడ పలు అందమైన బీచ్‌లు ఉన్నాయి. ఇవి చాలా ప్రశాంతమైన వాతావరణంలో ఉండటంతో నిత్యం పర్యాటకులు వస్తుంటారు. కేవలం భారత దేశ పర్యాటకులే కాకుండా ప్రపంచ వ్యాప్తంగా ఉన్న పర్యాటకులు ఇక్కడికి వస్తారు. అయితే, ఇక్కడున్న నాలుగు బీచ్‌ల్లో ఓమ్ బీచ్ బాగా ప్రసిద్ధి చెందింది. ఈ బీచ్ ఓం (Om Beach Gokarna) ఆకారంలో ఉండటంతో దానికి ఈ పేరు వచ్చింది. గోకర్ణలో ఇదే అందమైన బీచ్‌గా ప్రసిద్ధి చెందింది. (Photo Credit: Unsplash)
ప్యారడైజ్ బీచ్..
ఇక ప్యారడైజ్ బీచ్‌నే (Paradise Beach Gokarna) ఫుల్‌మూన్ బీచ్‌గా పిలుస్తారు. అయితే, ఈ బీచ్‌కు వెళ్లాలంటే నేరుగా మార్గం లేదు. ఓమ్ బీచ్ లేదా హాఫ్ మూన్ బీచ్‌ల నుంచే ఇక్కడికి చేరుకోవాల్సి ఉంటుంది. మరోవైపు ఈ బీచ్‌కు చేరుకోవడానికి చిన్నపాటి ట్రెక్కింగ్ కూడా చేయాల్సి ఉంటుంది. అది సుమారు 30 నిమిషాలు చిన్న కొండపైకి ఎక్కి దిగాల్సి ఉంటుంది. దీంతో మీరు ప్యారడైజ్ బీచ్ అందాలను ఆస్వాదించొచ్చు. ఇక్కడ రాత్రివేళ క్యాంపింగ్ చేయడం కూడా బాగుంటుంది. (Photo Credit: Unsplash)
కడల్ బీచ్..
గోకర్ణలో మరో అందమైన ప్రదేశం కడల్ బీచ్(Cudle Beach Gokarna). ఇక్కడికి చేరుకోవడానికి కూడా కాస్త ట్రెక్కింగ్ చేయాల్సి ఉంటుంది. ఇది ప్రశాంతమైన వాతావరణంలో ఉండటంతో స్థానికులు కూడా ఇక్కడికి వస్తుంటారు. మరోవైపు ఇక్కడ యోగా, మెడిటేషన్ చేసుకునే అవకాశం కూడా ఉంటుంది. ఈ బీచ్‌లో అలా నడుచుకుంటూ వెళ్తే చాలా అద్భుతంగా ఉంటుంది. చిన్నపాటి అలలను చూస్తూ ఈ బీచ్‌లో కూర్చుంటే ఎంతసేపైనా అక్కడి నుండి వెళ్లాలనిపించదు. (Photo Credit: Unsplash)
హాఫ్‌మూన్ బీచ్..
నెలవంక రూపంలో ఉండే ఈ బీచ్‌ను హాఫ్‌మూన్ బీచ్‌గా (Halfmoon Beach Gokarna) పిలుస్తారు. ఈ బీచ్‌కు కూడా నేరుగా వెళ్లే మార్గం లేదు. అయితే, ఓం బీచ్ నుండి ట్రెక్కింగ్ చేయాలి లేదా బోట్‌లో ఇక్కడికి చేరుకోవాలి. ఇది కూడా కొండ ప్రాంతంలో ఉండటంతో చాలా అందంగా ఉంటుంది. అయితే, సూర్యాస్తమయం తర్వాత అక్కడి నుండి ట్రెక్కింగ్ చేయడం మంచిది కాదు. కాబట్టి సాయంత్రం లోపే ఈ బీచ్ నుండి ఓం బీచ్‌కు చేరుకోవాలి.
Read all Latest Telugu News and Travel News