కెల్లీస్ క్యాసిల్..
మలేషియాలోని కెల్లీస్ క్యాసిల్‌ను ప్రేమకు ప్రతిరూపంగా
భావిస్తారు. దీన్ని స్కాట్లాండ్‌కు చెందిన విలియమ్ కిల్లీ స్మిత్ అనే సివిల్ ఇంజినీర్ 1909లో తన భార్య ఏగ్నస్ స్మిత్‌కు బహుమతిగా నిర్మించారని ప్రసిద్ధి. మలేషియాలోని పెరాక్ రాష్ట్రంలోని కింటా జిల్లాలో కింటా నది ఒడ్డున ఉంటుంది. ఇది చూడటానికి పెద్ద రాజ భవంతిలా ఉంటుంది. దీంతో దీన్ని కూడా మలేషియా ప్రజలు ప్రేమకు ప్రతిరూపమని భావిస్తారు. (Photo Credit: Pixabey)
బోల్డ్ క్యాసిల్..
అమెరికాలోని న్యూయార్క్ రాష్ట్రంలో 1000 ఐలాండ్స్‌లో ఉన్న బోల్డ్ క్యాసిల్ సైతం ప్రేమకు ప్రతిరూపమనే చెప్పాలి. దీన్ని జార్జ్ బోల్డ్ అనే వ్యాపారవేత్త 1900 సంవత్సరంలో తన భార్య లూయిస్‌కు బహుమతిగా ఇద్దామని ఎంతో ఆశతో నిర్మాణం తలపెట్టారు. అయితే, అది నిర్మాణంలో ఉండగానే లూయిస్ కన్నుమూసింది. దీంతో తన భార్యలేని ఆ భవంతి ఎందుకని జార్జ్ మధ్యలోనే నిర్మాణం వదిలేశారు. తర్వాత 1977లో 1000 ఐలాండ్స్ బ్రిడ్జి అథారిటీ దాన్ని సొంతం చేసుకొని పునర్‌నిర్మించింది. అప్పటి నుండి ఇదో పర్యాటక ప్రదేశంగా కొనసాగుతోంది. (Photo Credit: Pixabey)
పెటిట్ ట్రియానన్..
ఫ్రాన్స్‌లోని ప్యాలెస్ ఆఫ్ వర్సైల్స్‌లో నిర్మించిన పెటిట్ ట్రియానన్ అనే అరుదైన కట్టడం కూడా ప్రేమకు చిహ్నంగా నిలిచింది. దీన్ని ఫ్రెంచ్ రాజు లూయిస్ xv 1762, 1768 మధ్య కాలంలో నిర్మించారు. తనకెంతో ఇష్టమైన మేడం డి పామ్‌పాడోర్‌ అనే ఒకావిడకు దీన్ని బహుమతిగా ఇద్దామని చూశారు. కానీ, ఆమె ఆ భవన నిర్మాణం పూర్తికాక ముందే కన్నుమూసింది. తర్వాత లూయిస్ ఈ అరుదైన కట్టడాన్ని తన 19 ఏళ్ల భార్య మేరీ ఆన్‌టోనిట్టేకి అంకితం చేశారు. (Photo Credit: Pixabey)
మీరాబెల్ ప్యాలెస్..
ఆస్ట్రియాలోని సాల్స్‌బర్గ్‌లో నిర్మించిన మీరాబెల్ ప్యాలెస్ అరుదైన కట్టడం. దీన్ని మొదట 1606లో ప్రిన్స్ ఆర్చ్ బిషప్ అయిన వోల్ఫ్ డీట్రిచ్ రాయిటెనావ్ తన భార్య సాలోమ్ ఆల్ట్‌కు బహుమతిగా నిర్మించారు. అయితే, తర్వాతి కాలంలో ఆ ప్రాంతాన్ని ఆక్రమించిన మరో ఆర్చ్ బిషప్ ఫ్రాన్స్ ఆన్‌టోన్ దాన్ని మరింత అందంగా తీర్చిదిద్ది మీరాబెల్ ప్యాలెస్‌గా పేరుమార్చారు.(Photo Credit: Pixabey)
తాజ్‌మహాల్..
ఆగ్రాలోని తాజ్ మహల్ గురించి మనందరికీ తెలిసిందే. దీన్ని మొఘల్ చక్రవర్తి షాజహాన్ నిర్మించారు. తన ప్రియమైన భార్య ముంతాజ్ జ్ఞాపకార్థం 1632-1652 మధ్య కాలంలో తీర్చిదిద్దారు. అప్పటి నుండి ఇప్పటికీ ఇది గొప్ప పర్యాటక ఆకర్షణగా నిలుస్తోంది. దీన్ని చూడటానికి నిత్యం వేలాది మంది సందర్శకులు ఆగ్రాకు వస్తుంటారు. ఇది ప్రపంచ వారసత్వ ప్రదేశం కూడా. (Photo Credit: Pixabey)
- Read All Latest Telugu News and Travel News