Destination Weddings: ఇండియన్ డెస్టినేషన్ వెడ్డింగ్‌లపై థాయ్‌లాండ్ భారీ అంచనాలు.. ఎందుకంటే?

థాయ్‌లాండ్ అందమైన బీచ్‌లు, విలాసవంతమైన రిసార్టులు, పబ్బులు, క్లబ్బులకు నెలవు. ఇక్కడ దొరకని ఎంటర్‌టైన్మెంట్ అంటూ ఉండదు. దీంతో యువత అక్కడికి వెళ్లడానికి ప్రధానంగా ఆసక్తి చూపుతున్నారు. అలా థాయ్‌లాండ్‌కు పర్యాటక రంగం పరంగా (Thailand Tourist Place) మంచి డిమాండ్ ఉంది. అయితే, కరోనా పరిస్థితుల కారణంగా రెండున్నరేళ్లుగా ఈ రంగం బాగా దెబ్బతిన్న సంగతి తెలిసిందే. దాంతో థాయ్‌లాండ్ ఆదాయం కూడా దారుణంగా పడిపోయింది. ఇప్పుడిప్పుడే కరోనా నిబంధనలు సడలిస్తుండటంతో పర్యాటక రంగం పుంజుకుంటోంది. దీంతో థాయ్‌లాండ్ అధికారులు మళ్లీ తమ ఆదాయం పొందేందుకు భారీ ప్రణాళికలు సిద్ధం చేశారు.

అందులో భాగంగానే భారత్‌లోని వెడ్డింగ్ ప్లానర్లతో సంప్రదింపులు జరిపేందుకు అక్కడి అధికారులు కొత్త టీమ్‌ను ఏర్పాటు చేశారు. ముంబయి, దిల్లీ వంటి మెట్రో నగరాల్లో ఆసక్తిగలవారికి వివిధ ప్యాకేజీల కింద డెస్టినేషన్ వెడ్డింగ్ (Destination Wedding Thailand), హనీమూన్‌ (Honeymoon Packages) సౌకర్యాలను అందిస్తున్నారు. ముఖ్యంగా థాయ్‌లాండ్‌లో డెస్టినేషన్ వెడ్డింగ్‌లకు భారీ డిమాండ్ ఉండటంతో అక్కడి అధికారులు భారత మార్కెట్‌పై భారీ అంచనాలు పెట్టుకున్నారు. ఈ క్రమంలోనే కొత్త టీమ్‌ను ఏర్పాటు చేసుకొని తమ ఆదాయం పెంచుకునేలా కసరత్తులు చేస్తున్నారు. అక్కడి అధికారులు భారత మార్కెట్ నుంచి సుమారు 1,30,000 కోట్ల నుంచి 1,52,000 కోట్ల వరకు ఆదాయాన్ని ఆశిస్తున్నారంటేనే.. థాయ్‌లాండ్‌కు ఎంత డిమాండ్ ఉందో అర్థం చేసుకోవచ్చు.

థాయ్‌లాండ్ టూరిజమ్ అథారిటీ డిప్యూటి గవర్నర్ సిరిపాకోర్న్ చీసామూత్ తాజాగా స్థానిక మీడియాలో మాట్లాడుతూ.. గత రెండేళ్లుగా చాలా మంది భారతీయ నూతన జంటలు (Indian Couples) తమ హనీమూన్ కోసం విదేశీ పర్యాటక ప్రాంతాలను చూస్తున్నారని, ఇంకొంత మంది తమ డెస్టినేషన్ వెడ్డింగ్‌లు చేసుకునేందుకు తమ వివాహాలనే వాయిదా వేసుకున్నారని చెప్పారు. అలాంటి దేశాల్లో థాయ్‌లాండ్ కూడా ఉందన్నారు. అక్కడ జరిగే 60 శాతం డెస్టినేషన్ వెడ్డింగ్‌లలో భారతీయులే ఉంటారన్నారు. దీంతో భారత్‌లోని ఈవెంట్‌ ప్లానర్లతో సంప్రదింపులు జరుపుతున్నట్లు వెల్లడించారు. మరోవైపు థాయ్‌లాండ్ అధికారులు వచ్చేనెల అక్టోబర్ నుంచి పలు టూరిస్ట్ వీసాల గడువును 15 రోజుల నుంచి 30 రోజులకు పెంచే ఆలోచనలో ఉన్నారు. దీంతో ఎలాగైనా టూరిస్టులను ఆకట్టుకునేందుకు అక్కడి అధికారులు కసరత్తులు చేస్తున్నారు.