మధ్యప్రదేశ్‌లోనూ కొన్ని అందమైన హిల్స్టేషన్లు ఉన్నాయనే సంగతి మీకు తెలుసా? బహుశా మీకు తెలియకపోతే ఇప్పుడైనా తెలుసుకునే అవకాశం దొరికింది. నిజంగానే మధ్య ప్రదేశ్‌లో పలు అందమైన, అద్భుతమైన హిల్స్టేషన్లు ఉన్నాయి. అవి స్థానికంగా మంచి పిక్‌నిక్ స్పాట్లుగానే కాకుండా చుట్టు పక్కల ప్రాంతాల వారికి చాలా తక్కువ సమయంలో వెళ్లి రాగల గొప్ప పర్యాటక ప్రదేశాలుగానూ కొనసాగుతున్నాయి. అయితే, వాటి గురించి బయటి ప్రపంచానికి పెద్దగా తెలియకపోవచ్చు. అధివాస్తవిక ప్రకృతి దృశ్యాలతో అలరించే ఆ హిల్స్టేషన్లు నిర్మలమైన వాతావరణంతోనూ టూరిస్టులను ఆకట్టుకుంటాయి. ఒకవేళ మీరు వాటిని చూడటానికి వెళ్లినా తప్పక అలరించేలా ఉంటాయి. ఆ అందమైన హిల్స్టేషన్లు ఏవో ఇక్కడ తెలుసుకుందాం.
ఓంకారేశ్వర్‌ హిల్స్టేషన్..
(Photo Credit: Unsplash)
ఓంకారేశ్వర పర్వతం మధ్య ప్రదేశ్‌లోని పవిత్ర ప్రదేశాల్లో ఒకటి. దీన్ని మినీ వారణాసి అని కూడా అంటారు. ఇక్కడ ప్రసిద్ధ ఓంకారేశ్వర ఆలయం ఉండటంతో హిందువులకు పవిత్ర పుణ్యక్షేత్రంగా మారింది. అలాగే ఇది దేశంలోని 12 జ్యోతిర్లింగ క్షేత్రాల్లో ఒకటి. అలాగే ఇక్కడ అమరకరేశ్వర్ అని పిలిచే మరో పుణ్యక్షేత్రం కూడా ఉంది. ఈ ఓంకారేశ్వర పర్వతం సమీపంలో ప్యాలెస్‌తో పాటు గోముఖ్ ఘాట్, మమ్లేశ్వర్ జ్యోతిర్లింగ, నర్మదా నది ఉన్నాయి. దీంతో మీరు ఓంకారేశ్వర్‌కు వెళితే పలు సందర్శనీయ ప్రాంతాలు కూడా చూడొచ్చు.
పాచ్‌మర్హి హిల్స్టేషన్..
(Photo Credit: Unsplash)
సాత్పురా పర్వత శ్రేణుల్లో ఉండే అందమైన పాచ్‌మర్హి అనే హిల్స్టేషన్ సైతం మధ్య ప్రదేశ్‌లో చూడదగ్గది. ఇది సముద్ర మట్టానికి 1,067 మీటర్ల ఎత్తులో ఉండటంతో గొప్ప వీక్షణలను కలిగి ఉంది. ఈ పాచ్‌మర్హి హిల్‌స్టేషన్‌ను సాత్పురాకి రాణి అని కూడా పిలుస్తారు. ఈ పర్వత శ్రేణుల్లో కొన్ని సందర్శనీయ స్థలాలు ఉన్నాయి. అవే పాండవుల గుహలు, ప్రియదర్శిని హిల్స్, అప్సర విహార్. ఫ్యామిలీతో విహరించడానికి ఈ హిల్స్టేషన్ చాలా గొప్పగా ఉంటుంది. అలాగే అక్కడ అద్భుతమైన సూర్యాస్తమయం వీక్షణలను ఆస్వాదించాలంటే రాజేంద్రగిరి వ్యూ పాయింట్‌కు వెళ్లొచ్చు.
మండు హిల్స్టేషన్..
(Photo Credit: Unsplash)
మధ్యప్రదేశ్‌లోని పురాతన నగరమైన మండు పలు అద్భుతమైన నిర్మాణాల సౌందర్యానికి ప్రసిద్ధి చెందింది. ఈ హిల్స్టేషన్ సైతం పర్యాటకులను విశేషంగా ఆకర్షించే సహజసిద్ధమైన దృశ్యాలను కలిగి ఉంది. వీలైతే ఈ ప్రాంతాన్ని వర్షాకాలంలో సందర్శించడానికి ప్లాన్ చేయడం మంచిది. ఎందుకంటే ఆ సమయంలో ఈ మండు హిల్స్ అత్యుత్తమ ప్రకృతి దృశ్యాలను కలిగి ఉంటాయి. ఈ గమ్యస్థానం సహజసిద్ధమైన రక్షణ వ్యవస్థను కలిగి ఉండటం కూడా చెప్పుకోదగ్గ విషయం. సంక్షిప్తంగా చెప్పాలంటే ఈ మండు ప్రాంతం పలు సందర్శనీయ స్థలాలను కలిగి ఉంది. ఇది కూడా ఫ్యామిలీతో విహరించడానికి అనువైన ప్రదేశం.
టామియా హిల్స్టేషన్..
(Photo Credit: Unsplash)
ఇది మధ్యప్రదేశ్‌లోని అత్యుత్తమ రహస్య ప్రదేశాల్లో ఒకటి. ఇక్కడ పర్యాటకులు పలు అద్భుతమైన పర్వతాలు, దట్టమైన అడవుల గుండా ప్రయాణించవచ్చు. దీంతో వారు కొన్ని అత్యుత్తమ వీక్షణలను ఆస్వాదించే అవకాశం ఉంది. మీరు గజిబిజి ఉరుకుల పరుగుల జీవితం నుండి కాస్త విశ్రాంతి తీసుకోవాలనే ఆలోచనలో ఉన్నట్లయితే మధ్యప్రదేశ్‌లోని ఈ ప్రాంతాన్ని తప్పక సందర్శించొచ్చని చెప్పొచ్చు. ఈ గమ్యస్థానం మీకు కొత్తదనాన్ని అందిస్తుంది. ఇక్కడ పలు రకాల జంతుజాలాన్ని, ఔషధ మొక్కలను కనుగొనొచ్చు.
శివపురి హిల్స్టేషన్..
(Photo Credit: Unsplash)
సముద్ర మట్టానికి సుమారు 462 మీటర్ల ఎత్తులో ఉండే ఈ శివపురి హిల్స్టేషన్ పలు అందమైన సరస్సులను కలిగి ఉంది. అక్కడ జాదవ్ సాగర్ జీల్, చాంద్‌పథ జీల్ వంటి వాటిని తప్పక చూడాలి. వాటికి తోడు మాధవ్ నేషనల్ పార్క్, బంగంగా దేవాలయం కూడా చూడవలసినవనే చెప్పాలి. అలాగే, కరేరా బర్డ్ శాంక్చురీ సైతం పర్యాటకులను ఆకట్టుకుంటుంది. ఇది ప్రకృతి అందాలతో నిండి ఉండటమే కాకుండా పలు రకాల అందమైన పక్షులను కూడా చూడొచ్చు. దీంతో ఈ హిల్‌స్టేషన్‌ను కూడా మీరు చూసితీరాల్సిందేనని చెప్పొచ్చు.