త్వరపడండి.. మనాలికి ఐఆర్‌సీటీసీ అదిరిపోయే ఆఫర్!

ఎండలు విసిగిస్తున్నాయా? అయితే, చల్లగా కులుమనాలికి చెక్కేయండి. ఈ మేరకు ఐఆర్‌సీటీసీ అదిరిపోయే ఆఫర్ ఒకటి ప్రకటించింది. అన్ని సీజన్లలో చల్లని వాతావరణంతో ఆహ్లాదాన్ని అందించే కులు మనాలికి వెళ్లాలనే మీ కలను నిజం చేసుకోడానికి ఇది చక్కని అవకాశం. 12 రోజులపాటు భూలోక స్వర్గంలో గడిపే ఈ అవకాశాన్ని సద్వినియోగం చేసుకోండి.

బ్రేక్‌ఫాస్ట్, లంచ్, టీ-స్నాక్స్, డిన్నర్‌తో కలిపి ఐఆర్‌సీటీసీ టూరిజం సంస్థ ఈ ప్యాకేజీని ప్రకటించింది. ఈ 12 రోజులు కేవలం కులుమనాలికి మాత్రమే కాకుండా తాజ్ మహాల్, ఆగ్రా కోట, కుతుబ్ మినార్, లోటస్ టెంపుల్, ఇండియా గేట్, ఇందిరా మేమోరియల్, రాజ్‌ఘాట్, వాఘా బోర్డర్, గోల్డెన్ టెంపుల్, హడింబా దేవి ఆలయం, వశిష్ట కుండ్, టిబేటియన్ మఠం, స్నో పాయింట్, రాక్ గార్డెన్, సుఖనా లేక్ తదితర ప్రాంతాలను చూసే అవకాశం కూడా కల్పించనుంది.

ఈ ప్యాకేజీలో పలు పర్యాటక ప్రాంతాల ప్రవేశ రుసుములు, వివిద వినోద కార్యక్రమాల ఛార్జీలు, మనాలి స్నోపాయింట్ ట్రిప్ ఛార్జీలు, లాండ్రీ, ఔషదాలు తదితర ఖర్చులను చేర్చలేదు. ఈ పర్యటన 12 రోజులు ఉంటుంది. ఈ నేపథ్యంలో ప్రయాణికులు సుదీర్ఘ ప్రయాణాన్ని తట్టుకునే విధంగా ఉండాలని ఐఆర్‌సీటీసీ పేర్కొంది.

ఐఆర్‌సీటీసికి చెందిన టూరిస్ట్ ఫెసిలిటేషన్ సెంటర్, జోనల్, రీజనల్ ఆఫీస్‌లలో ఈ ప్యాకేజీలను బుక్ చేసుకోవాలి. ఈ ప్యాకేజీ రూ.36,700‌తో మొదలవుతుంది. థ్రిపుల్ షేరింగ్ విధానంలో ప్యాకేజీ ఉంటుంది. గదుల షేరింగ్ ఇష్టంలేనివారికి వేరే ప్యాకేజీని బుక్ చేసుకోవాలి.