మైమరపించే మేఘాలయాలో అద్భుతాలెన్నో!

కాలుష్యం లేని సరికొత్త ప్రపంచాన్ని చూడాలని అనుకుంటున్నారా? అయితే, మేఘాలయకు బయల్దేరండి. అక్కడి చక్కని వాతావరణమే కాదు, ప్రజలు కూడా చాలా స్వచ్ఛమైన మనసుతో ఆహ్వానం పలుకుతారు. పచ్చని కొండకోనలు, జలాశయాలు, సెలయేళ్లు ఇలా.. ఎన్నో ప్రకృతి సోయగాలు.. మిమ్మల్ని మైమరపిస్తాయి. మేఘాలయ రాజధాని షిల్లాంగ్‌. ఇది సముద్ర మట్టానికి 1496 మీటర్ల ఎత్తులో ఉంది. మేఘాలయలో వాతావరణం కాస్త తేమగా ఉంటుంది.

ఇక్కడి ప్రజలకు వేసవి అంటే తెలియదు. మార్చి, ఏప్రిల్ నెలల్లో మాత్రమే సూర్యుడు కనిపిస్తాడు. మే నుంచి అక్టోబరు వరకు వర్షలు కురుస్తూనే ఉంటాయి. డిసెంబరు నుంచి ఫిబ్రవరి వరకు తీవ్రమైన చలి ఉంటుంది.

మేఘాలయలో నదులన్నీ వర్షాధారమే. ఉమియం, క్యన్ఛియాంగ్‌, మావపా, ఉమియం, మైన్గోట్‌, మిండూ నదులు ఇక్కడ ప్రధానమైనవి. ఉమాన్‌గోట్, దరింగ్‌, సంద, బాంద్రా, భోగాయి, దరెంగ్‌, సిమ్సంగ్‌, నితాయి, భూపాయి, లాంటివి గారో వంటి ఉపనదులు ఎంతో స్వచ్ఛంగా పర్యటకులను ఆకట్టుకుంటున్నాయి.

దాకిలో ఉన్న ఉమాన్‌గోట్ నది ఎంత స్వచ్చంగా ఉంటుందంటే.. పడవలో ప్రయాణిస్తుంటే గాల్లో తేలుతున్నామనే భావన కలుగుతుంది. నీటి అడుగు భాగం అద్దంలో చూసినంత స్వచ్ఛంగా, స్పష్టంగా కనిపిస్తుంది. ఈ నది ఇండో-బంగ్లాదేశ్‌ సరిహద్దున ప్రవహిస్తోంది.

నదులు.. ఎత్తైన కొండల మీద నుంచి దూకే దృశ్యాలు కట్టిపడేస్తాయి. మేఘాలయాలో వివిధ గిరిజన తెగల ప్రజలు జీవిస్తున్నారు. కాశీ, గారో, జయంతియాలు ఇక్కడి ప్రధాన తెగలు. వీళ్ల సాంప్రదాయాలు చాలా ఆసక్తికరంగా ఉంటాయి. ఇక్కడ ఆడవారినే వారసులుగా భావిస్తారు. తల్లి ఇంటి పెద్దగా వ్యవహరిస్తే.. ఆ వారసత్వం కూతురికి దక్కుతుంది. గారో తెగలో అందరికన్నా చిన్న కూతురికి కుటుంబ ఆస్తి లభిస్తుంది.

చిరపుంజి
ప్రపంచంలోనే అత్యంత ఎక్కువ వర్షపాతం నమోదయ్యే ప్రాంతంగా గిన్నిస్‌బుక్‌ ఆఫ్ వరల్డ్ రికార్డుల్లో స్థానం పొందింది. ఇక్కడ ఎటు చూసినా పచ్చని లోయలు, జలపాతాలు కనువిందు చేస్తాయి. సముద్రమట్టానికి 1290 అడుగుల ఎత్తులో ఈ ప్రాంతం ఉంది. వర్షాకాలంలో దాదాపు12,000 మిల్లీమీటర్ల వర్షపాతం నమోదవుతుంది. ఇక్కడి మాక్టో వ్యాలీలో సూర్యోదయం పర్యాటకులను విశేషంగా ఆకట్టుకుంటుంది.
ఆసియాలోనే అత్యంత పరిశుభ్ర గ్రామం!
బంగ్లాదేశ్‌ సరిహద్దుల్లో గల మాలినోంగ్‌ గ్రామం ఆసియాలోనే పరిశుభ్రమైన గ్రామంగా పేరుగాంచింది. షిల్లాంగ్‌ నుంచి రెండు గంటలు ప్రయాణిస్తే మలినోంగ్‌ వస్తుంది. ఇక్కడ సహజ సిద్ధంగా ఏర్పడిన లివింగ్ బ్రిడ్జిలు అద్భుతంగా ఉంటాయి. షిల్లాంగ్‌ నుంచి 25 కిలోమీటర్ల దూరంలో ఉన్న మఫ్లాంగ్‌ సేక్రెడ్‌ ఫారెస్ట్‌ ఇక్కడ చూడదగిన ప్రాంతాల్లో ఒకటి.

ఎలా చేరాలి?
★ షిల్లాంగ్‌కు 35 కిమీల దూరంలో ఉమ్రోయ్ ఎయిర్‌పోర్ట్ ఉంది. ఇక్కడికి చేరాలంటే హైదరాబాద్ నుంచి కనెక్టివ్ ఫ్లైట్లు ఉన్నాయి.
★ కోల్‌కతా లేదా గౌహతీ వరకు రైల్లో చేరుకుని అక్కడ నుంచి బస్సులో కూడా ప్రయాణించవచ్చు.

మేఘాలయ అందాలను ఈ వీడియోలో చూడొచ్చు!