ఏడ్చే పర్వతాలను ఎప్పుడైనా చూశారా?

పర్వతాలు ఏడవడం ఏమిటీ? ఇదెక్కడి చోద్యం అనుకుంటున్నారా? అవునండి అక్కడ పర్వతాలు ఎప్పుడూ ఏడుస్తూ ఉంటాయట. అందుకే వాటికి ‘వాల్ ఆఫ్ టీయర్స్’ అని పేరు పెట్టారు. ఇంతకీ ఈ పర్వతాలు ఎక్కడున్నాయో తెలుసుకోవాలని ఉందా? అయితే, చూడండి.

అమెరికాలోని హవాయి ద్వీపం గురించి వినే ఉంటారు. అక్కడ ఉండే ఎత్తైన వయాలెయాలే పర్వతాలు పర్యటకులను విశేషంగా ఆకట్టుకుంటాయి. ‘వయాలెయాలే’ అంటే పొంగి పొరిలే నీరు అని అర్థం. హవాయి ద్వీపంలో అతి పెద్ద అగ్నిపర్వతం ఒకటి ఉంది. ప్రస్తుతం అది ప్రశాంతంగానే ఉంది. అయితే, ఒకప్పుడు ఈ అగ్నిపర్వతం బద్దలు కావడం వల్ల లావాతో నిట్టనిలువు కొండలు ఏర్పడ్డాయి. హవాయిలోని ఈ ఎత్తైన అగ్నిపర్వతం మీద నిత్యం వర్షం పడుతుంటుంది. ఆ నీరంతా బిలంలోనే ఉండిపోతాయి. అయితే, ఆ బిలానికి ఉండే గోడలకు ఉండే రంధ్రాల నుంచి ఆ నీరు బయటకు వస్తుంది.

ఆ నీరు 5,148 అడుగుల ఎత్తు నుంచి ధారలా కిందికి దూకుతాయి. వీటిని దూరం నుంచి చూస్తే కన్నీటి ధారల్లా కనిపిస్తాయి. అందుకే వీటిని ‘ఏడ్చే కొండలు’ లేదా ‘ఏడ్చే గోడలు’ అని అంటారు. వీటిని చూసేందుకు ప్రపంచం నలుమూలల నుంచి పర్యటకులు విచ్చేస్తున్నారు. హవాయి.. కేవలం జలపాతాలకే కాదండోయ్, ఇక్కడ సర్ఫింగ్ కూడా చాలా ఫేమస్. ఇక్కడి సముద్రంలో ఎత్తైన అలల్లో సర్ఫింగ్ ఒళ్లుగగుర్పాటు కలిగిస్తుంది. మీ ట్రిప్ భిన్నంగా ఉండాలంటే.. ఒకసారి హవాయికి ప్లాన్ చేసుకోండి.