రక్త జలపాతం.. మిస్టరీ వీడింది!

ప్రపంచాన్ని ఆశ్చర్యపరిచిన ‘రక్త’ జలపాతం మిస్టరీ వీడింది. నిత్యం మంచుతో కప్పబడి ఉండే అంటార్కిటికాలోని ఓ ప్రాంతంలో చిక్కటి రక్తం రంగులో ఉన్న ఆ జలపాతం వెనక రహస్యాన్ని తెలుసుకునేందుకు శాస్త్రవేత్తలు 1911 నుంచి పరిశోధనలు జరుపుతున్నారు. దానికి ఇప్పటివరకు మూలాలు లభించక.. ఇదే సరైన కారణమనే నిర్ణయానికి రాలేకపోయారు.

ఇటీవల అత్యాధునిక సాంకేతికతను ఉపయోగించి.. ఈ జలపాతం పుట్టిన ప్రాంతంలోకి యంత్రాలను పంపి శాంపిల్స్‌ను సేకరించారు. ఈ సందర్భంగా.. పలు ఆశ్చర్యకరమైన విషయాలు వెల్లడయ్యాయి. జలపాతం పుట్టే ప్రాంతంలో ఇనుప ఖనిజంతో మిళితమైన ఉప్పునీటిని కనుగొన్నారు.

ఇనుము, ఉప్పునీరు కలిసినప్పుడు ఏర్పడే ఉష్ణం వల్ల మంచులో చీలిక ఏర్పడిందని తెలుసుకున్నారు. లోపల ఉండే ఉష్ణం ఒత్తడితో ఇనుము, ఉప్పు కలిసిన నీరు బయటకు ఉబికి వస్తోందని, బయటకు రాగానే అది గాలి(ఆక్సిజన్ తదితర వాయువులు)తో కలవడం వల్ల కలిగే రసాయనిక చర్యల వల్ల ఆ జలం రక్తం రంగులోకి మారిందని తెలుసుకున్నారు.