IRCTC: డబ్బు చెల్లించకుండానే టికెట్లు!

టికెట్ తీసుకోడానికి జేబులో చిల్లిగవ్వ కూడా లేదా? ఏం ఫర్వాలేదు. ముందు టికెట్ తీసుకొని నగదు మరెప్పుడైనా చెల్లించండి. అదెలా అనుకుంటున్నారా? IRCTC త్వరలో ఈ సదుపాయం అందుబాటులోకి తేనుంది. ‘Buy tickets now and pay later’ (ముందు టికెట్లు తీసుకోండి, నగదు తర్వాత చెల్లించండి) అనే సదుపాయం కల్పిస్తున్నట్లు రైల్వే అధికారులు గురువారం వెల్లడించారు.

ఐఆర్‌సీటీసీ అధికార ప్రతినిధి సందీప్ దత్త ఓ వార్తా సంస్థతో మాట్లాడుతూ.. ఈ సదుపాయం కోసం తాము ముంబయికి చెందిన ‘ఇ-పేలేటర్’ సంస్థతో కలిసి పనిచేస్తున్నామని తెలిపారు. ప్రయాణికులు జర్నీకి ఐదు రోజులు ముందుగా టికెట్ తీసుకుని 14 రోజుల లోపు చెల్లించాలి. అయితే, ఇందుకు 3.5 శాతం సర్వీస్ చార్జ్ పడుతుందని వివరించారు. అయితే, ఈ సదుపాయం కేవలం ఇ-టికెట్లకు మాత్రమే వర్తిస్తుంది.

ఈ విధానంలో టికెట్లు పొందే ప్రయాణికులు తమ పేరు, ఇ-మెయిల్ ఐడీ, మొబైల్ నెంబర్, పాన్ కార్డ్, ఆధార్ కార్డ్ వివరాలు ఇవ్వాలని రైల్వే అధికారులు తెలిపారు. వన్ టైమ్ పాస్‌వర్డ్ (OTP) ద్వారా వినియోగదారుడికి సేవలు పొందేందుకు అనుమతి ఇస్తామని వెల్లడించారు. క్రెడిట్ కార్డు తరహాలోనే ఈ సేవలు ఉంటాయన్నారు.