రైన్స్ @ HYD: వర్షాకాలంలో చూడదగిన ప్రాంతాలు!

హైదరాబాద్‌లో వర్షం ఎంత ఇబ్బందికరంగా ఉంటుందో అంతే ఆహ్లాదకరంగా ఉంటుంది. వర్షాల సమయంలో సరదాగా అలా ట్యాంక్ బండ్, నక్లెస్ రోడ్, గోల్కొండ, గండిపేట చెరువు, దుర్గంచెరువు పరిసరాల్లో విహరిస్తే మనసుకు భలే ఆహ్లాదంగా ఉంటుంది. ఇంకా టైమ్ ఉంటే.. సరదాగా ఈ ప్రాంతాలను కూడా చూసిరండి.

అనంతగిరి: హైదరాబాద్‌ నుంచి 80 కిమీ, వికారాబాద్‌కు 6 కిమీల దూరంలో ఉన్న అనంతగిరి కొండలు ప్రకృతి అందాలకు నెలవు. హైదరాబాద్‌ నుంచి ఇక్కడికి రెండు గంటల్లో చేరుకోవచ్చు. ఇక్కడ వాతావరణం ఎంతో ఆహ్లాదకరంగా ఉంటుంది. వర్షాకాలంలో ఈ ప్రాంతం మరింత అందంగా ఉంటుంది. అనంతగిరి కొండగుహలో అనంత పద్మనాభస్వామి దేవాలయం ఇక్కడ చూడదగినది. మూసీనది జన్మస్థలిగా పేరొందిన భవనాశి పుష్కరిని ఇక్కడే ఉంది.

మల్లెల తీర్థం: శ్రీశైలానికి 58 కిమీల దూరంలోని నల్లమల్ల అడవుల్లో ఉన్న ఈ జలపాతానికి చాలా సులభంగా చేరుకోవచ్చు. ఇది హైదరాబాద్‌కు 170 కిమీల దూరంలో ఉంది. ఈ జలపాతంలో స్నానాలు చేయాలంటే దాదాపు 250 మెట్లు దిగి కిందికి వెళ్లాలి. వర్షాకాలంలో ఈ ప్రాంతం చాలా ఆహ్లాదకరంగా ఉంటుంది. అయితే, నీటిలో దిగడం ప్రమాదకరం.

ఎత్తిపోతల జలపాతం: ఇది నగరానికి 173 కిమీల దూరంలో ఉంది. నాగార్జున సాగర్ నుంచి 14 కిమీలు ప్రయాణిస్తే ఎత్తిపోతల వస్తుంది. కృష్ణానది ఉపనదైన చంద్రవంక నది 70 అడుగుల ఎత్తు నుంచి దూకుతూ భలే ఆహ్లాదకరంగా కనిపిస్తుంది. వర్షకాలంలో ఈ జలపాతం చాలా వేగంగా ప్రవహిస్తుంది. ఇక్కడ స్నానాలు చేయడం ప్రమాదకరం.

భీముని పాదం జలపాతం: హైదరాబాద్‌కు 200 కిమీల దూరంలో వరంగల్ జిల్లాలోని గూడూరు మండలం.. సీతానాగారం సమీపంలో ఈ జలపాతం ఉంది. వరంగల్ నుంచి 51 కిమీల దూరంలో ఉన్న ఈ జలపాతం భలే ఆహ్లాదకరంగా, ఆకర్షనీయంగా ఉంటుంది. ఇక్కడ అన్ని కాలాల్లో నీరు ఉంటుంది.