అమర్‌నాథ్ యాత్ర.. చూడాల్సిన అందాలివే!

అమరనాథ్ యాత్రలో సహజసిద్ధంగా ఏర్పడే మంచు ''శివ లింగం”ను దర్శించుకోవడానికి భక్తులు అనేక వ్యయప్రయాసలకు గురవుతారు. ఇక్కడి సహజ గుహలు, ప్రకృతి రమణీయత మధ్య నెలకొన్న ఆధ్యాత్మిక వాతవరణం గురించి మాటల్లో చెప్పలేం. అమర్‌నాథ్ యాత్రలో దీనితోపాటు చూడాల్సిన అందమైన ప్రదేశాలు ఎన్నో ఉన్నాయి. ఎటుచూసినా మంచుతో కప్పి ఉండే పర్వతాలు, పొడవాటి వృక్షాలు, జల ప్రవాహాలు పర్యటకులను మంత్రముగ్ధుల్ని చేస్తాయి. అవేంటో చూద్దాం..

అమర్ నాథ్ గుహ, దేవాలయం
అమర్ నాథ్ యాత్రలో, ప్రయాణికులు 3888 మీటర్ల ఎత్తులో ఉన్న అమర్ నాథ్ గుహను తప్పక చూడాలి. ఈ గుహ లో సహజసిద్ధంగా ఏర్పడిన మంచు “శివ లింగం” ఉంటుంది. చంద్ర చక్రం ఆధారంగా మంచు శివ లింగం పెరగటం తరగటం జరుగుతుంది. మే నుంచి ఆగష్టు మధ్యలో గరిష్ట ఎత్తును చేరుకుంటుంది.ఈ గుహ 5000 ఏళ్ల నాటిదిగా చెప్పబడుతుంది.ఇది శివుడు పార్వతి దేవి కి అమరత్వ రహస్యం ఉపదేశించిన ప్రదేశంగా నమ్మబడుతుంది. గణేశునికి,పార్వతి దేవి కి కూడా ఇక్కడ రెండు మంచు లింగాలు ఉన్నాయి. భారతీయ సైన్యం, భారతీయ పారామిలటరీ దళాలు, సి.ఆర్.పి.ఎఫ్, ఈ ప్రదేశానికి గస్తీ కాస్తూ ఉంటాయి. అందువల్ల, అమర్ నాథ్గుహ ను సందర్శించాలంటే ఉన్నత అధికారుల నుంచి ముందే అనుమతి తీసుకోవాలి.

శేష్‌నాగ్ సరస్సు
పహల్గాంకి 27 కి.మీ దూరంలో, 3658 మీటర్ల ఎత్తు లో ఉన్న శేష్‌నాగ్ సరస్సు అమర్‌నాథ్‌లోని ఒక ప్రధాన ఆకర్షణ. దీని పేరు, హిందూ పురాణాలలోని ఏడు తలల సర్పరాజు 'శేష్ నాగ్' నుంచి వచ్చింది. దీని చుట్టుతా 7 శిఖరాలు ఉండటం కూడా విశేషం. ప్రయాణికులు పహల్గాం నుంచి రెండు రోజుల కాలి నడకన ఇక్కడికి చేరుకోవచ్చు. ఈ సరస్సు, శీతాకాలం మొత్తం, జూన్ నెల దాకా మంచు తో కప్పబడి ఉంటుంది. జన బాహుళ్యంలో వ్యాప్తి లో ఉన్న కథానుసారం, శేష్ నాగ్ సరస్సు వద్దే శివుడు, అమర్ నాథ్ గుహ కు వెళుతూ తన అధికారానికి ప్రాతినిధ్యం వహించే తన సర్పాన్ని విడిచిపెట్టాడు. అమర్ నాథ్ యాత్రకు వెళ్ళే వేలాది మంది భక్తులు వేసవి కాలం లో ఈ ప్రదేశాన్ని సందర్శిస్తారు. క్యాంపింగ్ చేయాలనుకునే యాత్రికులకు శేష్ నాగ్ సరస్సు సరైన గమ్యం.

అనంత్ నాగ్
అనంతనాగ్ జిల్లాలో (వెరినాగ్, అచబల్, కోకర్నాగ్, డక్సం, పహల్గాం, దండిపోరా, చతబాల్, మార్టాండ్ మరియు సింతాన్ టాప్ పలు పర్యాటక ఆకర్షణ కలిగిన ప్రదేశాలు ఉన్నాయి. వీటిలో అనతనాగ్‌కు 50 కిలోమీటర్ల దూరంలో ఉన్న పహెల్గాం మరియు కోకర్నాగ్ మరింత ప్రాబల్యం కలిగి ఉన్నాయి. ప్రధాన హిందూ పుణ్యక్షేత్రాలలో ఒకటైన అమర్నాథ్ క్షేత్రం పహల్గాంలో ఉంది. ఇక్కడకు ప్రతిసంవత్సరం వేలాది భక్తులు వస్తూ ఉంటారు.

బొటానికల్ గార్డెన్, కొకెర్‌నాగ్
అనంత్‌నాగ్‌ సమీపంలోని కొకెర్‌నాగ్ బొటానికల్ గార్డెన్ చాలా ప్రత్యేకమైనది. ఇందులో కొన్ని లక్షల సంఖ్యలో వృక్ష జాతులు ఉన్నాయి. దేశీయ రకాలేగాక విదేశీ జాతుల వృక్ష రకాలు ఉన్నాయి. చుట్టూ కొండల మధ్య ఉండే ఈ బొటానికల్ గార్డెన్ పర్యాటకులకు వినోదాన్ని పంచుతోంది. అనంత్‌నాగ్ నుంచి కేవలం 10 కి.మీ దూరంలో ఈ గార్డెన్ ఉంది.

పెహల్‌గామ్
ప్రపంచ ప్రసిద్ధిగాంచిన పహల్‌గామ్ హిల్‌స్టేషన్ అనంత్‌నాగ్‌కు 45 కి.మీ దూరంలో ఉంది. ఈ పట్టణం సముద్రమట్టానికి 7,200 మీ ఎత్తున లిద్దర్ నదీతీరంలో ఉంది. అనంత్‌నాగ్‌లోని 5 తెహ్సిల్స్‌లో పెహల్గాం ఒకటి. అత్యధికంగా యాత్రీకులను మరియు పర్యాటకులను ఆకర్షిస్తున్న ప్రదేశాలలో ఇది ఒకటి. అంతేకాక బాలీవుడ్ చిత్రాల చిత్రీకరణకు ప్రసిద్ధి చెందినది. ఇంకా దేశంలో అత్యుత్తమ ఆరోగ్యకేంద్రగా కూడా ఇది ప్రసిద్ధి చెందింది. అమర్‌నాథ్ యాత్రకు ఆరంభ ప్రదేశాలలో ఇది ఒకటి. పహల్గాం పైన్ అరణ్యాలకు, మనుదుప్పటి కప్పుకున్న పర్వతశిఖరాలకు, ఆరోగ్యకరమైన వాతావరణానికి మరియు విస్తారమైన మైదానాలు మరియు పచ్చికబయళ్ళతో ఆకర్షణీయంగా ఉంది. పహల్గాం నుండి పలు పర్వతారోహణా మార్గాలు ఆరంభమవుతుంటాయి. పహల్గాం నుండి 35 కి.మీ దూరంలో ఉన్న పైన్ అరణ్యాల ద్వారా పయనిస్తూ వెళ్లే కోలహోయి గ్లాసియర్ పర్వతారోహణా మార్గం వీటిలో ప్రధానమైంది.