ఖైదీ కాని ఖైదీగా జెల్లో ఉండొచ్చు

ఏదో ఒక నేరం చేస్తే తప్ప జైలుకు వెళ్లడం సాధ్యం కాదు. అయితే ఇప్పుడు ఆ పరిస్థితి మారిపోయింది. సరదాగా కాసేపు రిలాక్స్ అయ్యేందుకు కూడా జైలుకు వెళ్లొచ్చు. అది కూడా ఆసియాలోనే అతిపెద్దదైన తీహార్ జైలుకు. అక్కడ ఎంచక్క కరడుగట్టిన ఉగ్రవాది యాసిన్‌ భత్కల్‌, గ్యాంగ్‌స్టర్‌ ఛోటా రాజన్‌, నీరజ్‌ బవానా, ఆర్జేడీ నేత షాబుద్దీన్‌ లాంటి వాళ్లను చూడొచ్చు. ఖైదీలు వేసుకునే బట్టలు వేసుకోవచ్చు. ఖైదీలు తినే భోజనాన్నేతినొచ్చు. ఖేదీల మాదిరిగా మోబైల్, ఎలక్ట్రానిక్ వస్తువులు, ఇతర గ్యాడ్జెట్‌లకు దూరంగా ఉండవచ్చు. ఇంకా కావాలంటే జైల్లో మిగతా ఖైదీల మాదిరిగా చిన్నా చితకా పనులు కూడా చేయవచ్చు. ఇలా ఖైదీ కాని ఖైదీగా కొత్త అనుభవాన్ని సొంతం చేసుకోవచ్చు.

టూరిజాన్ని ప్రోత్సహించేందుకు దిల్లీలోని తిహార్‌ జైలుల్లో హోటల్‌ ఏర్పాటు చేయనున్నారు. ‘ఫీల్‌ లైక్‌ జైలు’ పేరుతో ఈ ప్రాజెక్టును ప్రారంభించనున్నారు. జైలు వాతావరణం ఎలా ఉంటుంది, ఖైదీలు ఎలా బతుకుతారు. ఏం తింటారు. ఎలా ఉంటారు తదితర వివరాలన్ని స్వయంగా అనుభవపూర్వకంగా తెలుసుకోవచ్చు. మీ జేబులో డబ్బులుంటే చాలు తీహార్ జైలు తలుపులు మీ కోసం తెరుచుకునే ఉంటాయి.

తిహార్‌ ప్రాంగణంలో పర్యాటకుల కోసం కొత్త కాంప్లెక్స్‌ నిర్మిస్తున్నారు. అయితే భద్రతా కారణాల దృష్ట్యా ఇందులోకి వచ్చిన అతిథులను ఇతర ఖైదీలతో మాట్లాడేందుకు అనుమతించరు. తెలంగాణ ప్రభుత్వం ఇదే తరహా కార్యక్రమాన్ని 2016లో ప్రారంభించింది. సంగారెడ్డిలోని 220ఏళ్ల నాటి జైలును ఈ రకంగా టూరిజం కోసం వాడుకుంటోంది. ఈ జైల్లో ఉండేందుకు రోజుకు రూ.500 ఫీజు వసూలు చేస్తోంది.