AbuDhabbi: కొవిడ్ నిబంధనల్ని మరింత సులభతరం చేసిన అబుధాబి.. తాజా నిర్ణయాలు ఏంటంటే?

అబుధాబి సాంస్కృతిక, పర్యాటక శాఖ COVID-19 నిబంధనల్ని మరింత సులభతరం చేసింది. దీంతో అంతర్జాతీయ ప్రయాణికులకు, పర్యాటకులకు ఇంకాస్త ఉపశమనం కలిగించింది. తాజా సమాచారం ప్రకారం.. ఇకపై అక్కడికి వెళ్లే పర్యాటకులు టీకా వేసుకున్నదీ.. లేనిదీ అనే సమాచారం ఫెడరల్ అథారిటీ ఫర్ ఐడెంటిటీ అండ్ సిటిజెన్‌షిప్ (ICA)లో నమోదు చేయాల్సిన అవసరం లేదని చెప్పింది. అలాగే అబుధాబిలోని సందర్శనీయ ప్రాంతాలకు వెళ్లినప్పుడు AI Hosn APPలో గ్రీన్ పాస్ స్టేటస్ కూడా ఉండాల్సిన అవసరం లేదని పేర్కొంది. తద్వారా పర్యాటకులు షాపింగ్‌ మాల్స్, హోటల్స్, రెస్టారెంట్స్, థీమ్ పార్కులల్లో హ్యాపీగా విహరించే అవకాశం దొరికింది.

మరోవైపు COVID-19 నిబంధనల్ని పూర్తిగా ఎత్తేయడంతో స్థానికులు కూడా తప్పనిసరిగా మాస్క్ ధరించాల్సిన అవసరం లేదని స్పష్టం చేసింది. అయితే, కొవిడ్ నుంచి జాగ్రత్తగా ఉండాలనుకునేవారు ఇష్టపూర్వకంగా మాస్క్ ధరించే సౌలభ్యం కల్పించింది. అలాగే అక్కడ ఉండే పౌరులు సైతం ఇకపై AI Hosn Appలో గ్రీన్ స్టేటస్ కొనసాగించుకునేందుకు నెలవారీ RT PCR టెస్టులు చేసుకోవాల్సిన అవసరం లేదని స్పష్టం చేసింది. దీంతో ఇప్పుడు ఆ యాప్‌ను కేవలం వాక్సినేషన్ స్టేటస్ తెలుసుకునేందుకే మాత్రమే పరిమితం చేసింది.

ఇదిలా ఉండగా, అబుధాబి ఇప్పుడు పర్యాటక రంగాన్ని ప్రోత్సహించేందుకు రెండు కొత్త ప్రచారాలను తెరపైకి తీసుకువచ్చేందుకు ప్రయత్నాలు చేస్తోంది. ‘ఎక్స్‌పీరియన్స్ అబుధాబి, ‘ఫైండ్ యువర్ పేస్’ అనే కార్యక్రమాలతో ప్రజలను ఉత్సాహపరిచేందుకు, ఇతర కార్యకలాపాల్లో పాలుపంచుకొనేందుకు వీటిని ప్రారంభించనుంది. దీంతో ఎమిరేట్స్‌లో ఎవరికి వారు సొంతంగా, ఉత్సాహభరితంగా గడిపేందుకు అధికారులు సన్నాహాలు చేస్తున్నారని తెలిసింది. అయితే, ఇప్పుడు నిబంధనల్ని ఎత్తేసినా కరోనా విషయంలో రాజీ పడే అవకాశం లేదని స్పష్టం చేసింది. ఎవరైనా కోవిడ్-19 బారిన పడితే ఐదు రోజులు తప్పనిసరిగా ఐసోలేషన్‌లో ఉండాలని తేల్చి చెప్పింది.

• Read All Latest Telugu News and Travel News