థంబ్ ఫింగర్ చూపించొద్దు..
ఫేస్‌బుక్‌లో మనకు ఏదైనా నచ్చితే వెంటనే లైక్ బటన్ నొక్కుతాం. అది థంబ్ సింబల్‌లో ఉంటుందనే సంగతి తెలసిందే. అయితే, అలాంటి సైగను మనం చేతివేళ్లతో అఫ్గానిస్థాన్, ఇరాన్, ఇటలీ, గ్రీస్ వంటి దేశాల్లో చూపిస్తే మరోలా అర్థమయ్యే ప్రమాదం ఉంటుంది. అలా చూపిస్తే మనం ఇతరులకు సభ్యత లేని వ్యక్తులుగా కనిపిస్తాం. మీరు ఎప్పుడైనా ఈ దేశాలకు వెళితే ఈ సింబల్‌ని అస్సలు చూపించకండి. (Photo Credit: Unsplash)
ఇక్కడ చూపుడు వేలితో పిలవద్దు..
వరైనా దూరంగా ఉన్న వ్యక్తుల్ని మనం పిలవాలంటే గట్టిగా అరవకుండా సింపుల్‌గా పిలవాలంటే చూపుడు వేళు చూపిస్తూ మన వద్దకు రమ్మని పిలుస్తుంటాం. ఇలాంటి సైగల్ని ఫిలిప్పీన్స్, సింగపూర్, జపాన్ వంటి దేశాల్లో చూపించకూడదు. ఫిలిప్పీన్స్‌లో కుక్కల్ని పిలవడానికి అలా చేస్తారట. అలాగే జపాన్, సింగపూర్‌లో ఈ సైగల్ని చావుకు ప్రతీకగా భావిస్తారట. దీంతో ఈ మూడు దేశాల్లో మనం ఈ సైగలు చేస్తే ఇబ్బందులు ఎదురయ్యే అవకాశం ఉంటుంది. (Photo Credit: Unsplash)
అక్కడ సూపర్ సైగలు చేయొద్దు..
ఇక మనం ఏదైనా అమితంగా నచ్చితే సూపర్ అని అర్థం వచ్చేలా చూపుడు వేలు, థంబ్ ఫింగర్‌ను గుండ్రంగా చూపిస్తూ ప్రత్యేకంగా మెచ్చుకుంటాం. అయితే ఆ సింబల్‌ను బ్రజిల్, వెనుజులా, ఫ్రాన్స్, టర్కీ వంటి దేశాల్లో ఉపయోగిస్తే మరో అసభ్యకరమైనది అనేలా అర్థం మారుతుంది. దీంతో మీరు ఎప్పుడైనా ఈ దేశాలకు వెళితే సూపర్ అని చెప్పేటప్పుడు ఈ విషయాన్ని గుర్తుకుపెట్టుకోండి. (Photo Credit: Unsplash)
వియత్నాంలో క్రాస్ ఫింగర్స్ చూపిస్తే..
అలాగే వియత్నాంలో చూపుడు వేలు, మధ్య వేలిని క్రాస్ ఫింగర్స్‌గా చూపిస్తే చెడుగా భావిస్తారు. అలా చూపిస్తే అక్కడ అదృష్టం వరించదనే నమ్మకం ఉంది. ముఖ్యంగా ఆడవారు ఇలాంటి సైగలు చేస్తే మీరు అవమానకర పరిస్థితులు ఎదుర్కొనే వీలుంది. కాబట్టి వియత్నాంకు వెళ్లినప్పుడు ఇలా క్రాస్ ఫింగర్స్ పెట్టకపోవడమే ఉత్తమం. (Photo Credit: Unsplash)
ఈ దేశాల్లో విక్టరీ సింబల్ వాడొద్దు..
ఎంతో అభివృద్ధి చెందిన ఇంగ్లాండ్, ఆస్ట్రేలియా, ఐర్లాండ్, న్యూజిలాండ్ వంటి దేశాల్లో విక్టరీ సింబల్‌ను రెండు చేతి వేళ్లతో చూపిస్తే ఇబ్బందికరం. ముఖ్యంగా మీ అరచేయి లోపలికి పెట్టుకొని చూపిస్తే అంతే సంగతి. అది ఏకంగా మిడిల్ ఫింగర్ చూపించినట్టని భావిస్తారు. దీంతో లేనిపోని ఇబ్బందులకు గురవుతారు. ఈ దేశాలకు వెళ్లినప్పుడు ఏదైనా విజయ కేతనంలా చూపించే ముందు జాగ్రత్తగా ఉండండి. (Photo Credit: Unsplash)