Canada Removes Travel Restrictions: కెనడా వెళ్లాలనుకునేవారికి భారీ ఉపశమనం.. వివరాలు తెలియాలంటే ఇది చదవండి

ప్రపంచ వ్యాప్తంగా కెనడాకు (Canada Eases Travel Restrictions) వెళ్లాలనుకునేవారు వేలాది మంది ఉన్నారు. ఇప్పటికే పర్మినెంట్ రెసిడెంట్ ఇన్విటేషన్లు వచ్చిన వారు, అంతర్జాతీయ పర్యాటకులు, విద్యార్థులు ఇలా చాలా మందే ఉన్నారు. ఇందులో కొంతమందికి ఇప్పటికే వీసాలు జారీ అయినా అక్కడున్న కఠిన నిబంధనల నేపథ్యంలో గందరగోళంలో పడ్డారు. అలాంటి వారికి ఇప్పుడు కెనడా ప్రభుత్వం తీపి కబురు చెప్పింది. అక్టోబర్ 1 నుండి కొవిడ్-19 నిబంధనల్ని ఎత్తేస్తున్నట్లు స్పష్టం చేసింది.

అక్కడి పబ్లిక్ హెల్త్ ఏజెన్సీ ఆఫ్ కెనడా (PHAC) తెలిపిన వివరాల ప్రకారం అక్టోబర్ 1 నుండి ఏ దేశస్థులైనా వీసా ఉంటే వెళ్లిపోవచ్చు. అందుకు వారు ఇకపై ArriveCAN యాప్‌లో తమ ఆరోగ్య సమాచారం పొందుపర్చాల్సిన అవసరం లేదు. అయితే, ప్రయాణికులకు ఇష్టమైతే ఆ యాప్‌లో వివరాలు వెల్లడించవచ్చు. అది ఆప్షనల్‌గా ఉంచారు. మరోవైపు వాక్సినేషన్‌కు సంబంధించిన ధ్రువపత్రం కూడా చూపించాల్సిన అవసరం లేదు. అలాగే కెనడాకు వెళ్లేముందు కరోనా టెస్టులు చేయించుకోవాల్సిన పనిలేదు. అక్కడికి వెళ్లాక కూడా చేయించుకోవాల్సిన అవసరం లేదు. క్వారంటైన్ లేదా ఐసోలేషన్‌లో ఉండాల్సిన పని కూడా లేదు. అయితే, కరోనాకు సంబంధించిన సింప్టమ్స్ ఉంటే కచ్చితంగా అక్కడ ఎయిర్‌పోర్ట్‌లో రిపోర్ట్ చేయాలి.

మరోవైపు దేశీయ పర్యాటకులు కూడా కెనడాలో విమానాలు లేదా రైళ్లలో ప్రయాణించేటప్పుడు ఇకపై మాస్క్‌లు ధరించడం తప్పనిసరి కాదు. కెనడాలోని ప్రజలకు తగిన మోతాదుల్లో టీకాలు వేయడంతో పాటు ప్రస్తుతం ఆస్పత్రుల్లో చేరుతున్న వారి సంఖ్య తక్కువగా ఉండటం, మరణాల రేట్ కూడా తగ్గడంతో ఈ ఆంక్షలను తొలగించేందుకు కారణం అని PHAC అధికారులు వెల్లడించారు. అయితే, మాస్క్‌లు ధరించడం తప్పనిసరి కాకపోయినా పౌరులు వీలైనంతవరకు వాటిని ధరించడం మంచిదని సూచించింది. అలాగే తమ ఆరోగ్యాల పట్ల జాగ్రత్తగా ఉండాలని కోరింది.

Read All Latest Telugu News and Travel News