Flipkart Hotels: ఫ్లిప్‌కార్ట్ కొత్త ఫీచర్.. ఇకపై హోటల్స్‌ కూడా బుక్ చేసుకునే సదుపాయం

ఇప్పటికే Flipkart flight పేరిట విమాన టికెట్లు బుక్ చేసుకునే సదుపాయాన్ని కల్పించిన ప్రముఖ దిగ్గజ ఈ-కామర్స్ సంస్థ ఫ్లిప్‌కార్ట్ తాజాగా హాస్పిటాలిటీ సెక్టార్‌లోనూ అడుగుపెట్టింది. కరోనా వ్యాప్తి తగ్గుముఖం పట్టడంతో ఇప్పుడిప్పుడే టూరిజం రంగం మెరుగు పడుతున్న దశలో మరో కొత్త ఫీచర్‌ని తమ వినియోగదారులకు అందుబాటులోకి తెచ్చింది. ఇప్పుడు హోటల్స్, ఫ్లైట్స్‌ బుకింగ్స్ రెండింటినీ ఒకే చోట బుక్ చేసుకునే అవకాశాన్ని కల్పిస్తోంది. ఈ సర్వీసులను క్రియర్ ట్రిప్ ఏపీఐ సహాయంతో అందిస్తోంది. దీంతో తమ వినియోగదారులకు మెరుగైన సేవలు అందించేందుకు కృషి చేస్తామని ఆ సంస్థ వెల్లడించింది.

ఈ ఫీచర్‌ను అందుబాటులోకి తేవడం ద్వారా తమ వినియోగదారులకు మరింత ఉత్తమమైన, అద్భుతమైన సేవలను అందించడానికి కట్టుబడి ఉన్నామని ఫ్లిప్‌కార్ట్‌ సీనియర్ వైస్ ప్రెసిడెంట్ ఆదర్ష్ మీనన్ పేర్కొన్నారు. దీని ద్వారా మెట్రో నగరాలతో పాటు టైర్ సిటీస్‌లోనూ ఈ సేవలను వినియోగించుకోవచ్చని తెలిపారు. తద్వారా భారతీయ వినియోగదారులకు Flipkart వన్‌స్టాప్ షాప్‌గా నిలుస్తుందని చెప్పారు. తమ ఫీచర్ ద్వారా మొత్తం జాతీయం, అంతర్జాతీయంగా 3 లక్షల హోటల్స్‌‌లో బుకింగ్స్ చేసుకోవచ్చని పేర్కొన్నారు.

ఇటీవల ప్రపంచ వ్యాప్తంగా కరోనా కేసులు తగ్గుముఖం పట్టడంతో ప్రపంచ వ్యాప్తంగా ఉన్న పర్యాటక ప్రాంతాలు పూర్వస్థితికి చేరుకున్నాయి. దీంతో పర్యాటకులు సైతం పెద్ద సంఖ్యలో కొత్త ప్రదేశాలకు వెళ్లేందుకు ఆసక్తి చూపుతున్నారు. దీంతో గడిచిన మూడు నెలల్లోనే టూరిస్టుల సంఖ్య విపరీతంగా పెరిగిపోయింది. అలా ట్రావెల్ ఇండస్ట్రీ 70 శాతం పెరుగుదలను చూసింది. అదే సమయంలో ఫ్లిప్‌కార్ట్ ఈ నూతన సదుపాయాన్ని తీసుకురావడం గమనార్హం. అయితే, మార్కెట్‌లో ఇప్పటికే పలు సంస్థలు ఈ సదుపాయాన్ని కల్పిస్తున్న సంగతి తెలిసిందే. వాటిని తట్టుకొని ఫ్లిప్‌కార్ట్ మార్కెట్‌లో ఎలా నిలుస్తుందో చూడాలి. అయితే, హాస్పిటాలిటీ రంగంలో హోటల్ బుకింగ్స్ అన్నీ ఇప్పుడు ఆన్‌లైన్‌లోనే జరుగుతుండటంతో ఫ్లిప్‌కార్ట్ తమ వినియోగదారులపై భారీ అంచనాలు పెట్టుకుంది. రాబోయే ఫెస్టివల్ సీజన్‌లో వారు ఈ సదుపాయాల్ని సద్వినియోగం చేసుకుంటారని ఆశిస్తోంది.

Read Latest Telugu News and Travel News