Guinness World Record: లేహ్-మనాలీ కాలినడక ప్రయాణం.. 5 రోజుల్లోనే..!

నాసిక్‌కు చెందిన దంతవైద్యుడు మహేంద్ర మహాజన్ అరుదైన ఘనత సాధించారు. లేహ్ నుండి మనాలి వరకు సుమారు 428 కిలోమీటర్లు కాలినడకన అత్యంత వేగవంతమైన ప్రయాణాన్ని పూర్తి చేసి గిన్నిస్ వరల్డ్ రికార్డ్ సాధించాడు. తాజా సమాచారం ప్రకారం.. ఈ నడక ప్రయాణం జులైలో చేపట్టగా నాలుగు నెలల తర్వాత గిన్నిస్ బుక్ ఆఫ్ వరల్డ్ రికార్డ్స్ దాన్ని అధికారికంగా ప్రకటించింది. (Photo Credit: mahendramahajan/Instagram)

ప్రపంచంలోనే అత్యంత క్లిష్టమైన వాతావరణ పరిస్థితులు కలిగిన రహదారిగా పేరున్న లేహ్-మనాలీ హైవేపై 428 కిలోమీటర్ల ప్రయాణం కేవలం 4 రోజుల 21 గంటల్లో పూర్తి చేశారు. అయితే ఈ ప్రయాణాన్ని పూర్తి చేయడానికి ఆయనకు ఎనిమిది రోజుల సమయం ఉన్నా మూడు రోజుల ముందే గమ్యస్థానం చేరుకొని ప్రపంచ రికార్డు నెలకొల్పారు.

కాగా, 2021లో లేహ్ నుండి మనాలి వరకు అల్ట్రా రన్నర్ సిఫియా ఖాన్ 6 రోజుల 12 గంటల వ్యవధిలో కాలినడకన ఇదే ప్రయాణం సాగించి రికార్డు నెలకొల్పారు. అప్పుడు అటల్ టన్నెల్ లేని సమయంలోనే ఆమె 480 కిలోమీటర్ల ప్రయాణంలో రోహ్తంగ్ పాస్ కూడా కాలినడకనే పూర్తి చేశారు. ఇప్పుడు మహాజన్ అటల్ టన్నెట్ గుండా వెళ్లి ఆమె రికార్డును బద్దలు కొట్టారు.

తన రికార్డుపై స్పందించిన మహేంద్ర మహాజన్ హర్షం వ్యక్తం చేశారు. తన ప్రయాణంలో ఆర్మీ సిబ్బందితో పాటు చాలా మంది సైక్లిస్టులు తనను దారి పొడవునా ప్రోత్సహించారని చెప్పుకొచ్చారు. మనాలి సమీపంలోని అటల్ టన్నెల్ గుండా నడవడం మినహా ప్రయాణానికి అనుమతులు పొందడానికి తనకు ఎలాంటి ఇబ్బందులు ఎదురుకాలేదని చెప్పారు. ఇప్పుడు తనకు గిన్నిస్ రికార్డు ధ్రువీకరణ పత్రం లభించడంతో సంతోషంగా ఉందన్నారు.

Read All Latest Telugu News and Travel News