గుజరాత్ టు అరుణాచల్ ప్రదేశ్..
ప్రీతి నవంబర్ 1న గుజరాత్‌లోని కోటేశ్వర్ (పాక్ సరిహద్దు) వద్ద ఈ ప్రయాణం మొదలుపెట్టగా.. నవంబర్ 15న అరుణాచల్ ప్రదేశ్‌లోని కిబితు (చైనా సరిహద్దు) వద్ద యాత్రను పూర్తి చేశారు. ఆమె ఇన్‌స్టాగ్రామ్‌లో తెలిపిన వివరాల ప్రకారం.. నవంబర్ 1న 5:07 గంటలకు ఈ యాత్రను ప్రారంభించి నవంబర్ 15 అర్ధరాత్రి 12:19 గంటలకు పూర్తి చేశారు. దీంతో ఆమె కేవలం 13 రోజుల 19 గంటల 12 నిమిషాల్లో ఈ సాహస యాత్రను పూర్తి చేశారు. (Photo credit: the_extreme_lady/Instagram)
వెన్నులో వణుకు పుట్టించే చలిలో..
ప్రీతి తన ప్రయాణానికి సంబంధించిన విషయాలన్నీ ఎప్పటికప్పుడు సామాజిక మాధ్యమాల్లో పోస్ట్ చేస్తూ వచ్చారు. ఈ క్రమంలోనే యాత్ర పూర్తయ్యాక ఆ వివరాలను కూడా తెలుపుతూ పోస్టులు పెట్టారు. అయితే, ఈ ప్రయాణంలో ఆమె పలు ఇబ్బందులు ఎదుర్కొన్నారు. శీతాకాలంలో వెన్నులో వణుకు పుట్టించే చలిలోనూ ఆమె ప్రయాణం కొనసాగించడం విశేషం. (Photo credit: the_extreme_lady/Instagram)
డిప్రెషన్ పోగొట్టుకోడానికి మొదలెట్టి..
మొదట ప్రీతి ఐదేళ్ల క్రితం తనకున్న డిప్రెషన్‌ను పోగొట్టుకోడానికి సైక్లింగ్ చేయడం ప్రారంభించారు. తర్వాత దానిమీద ఇష్టంపెరిగి దూర ప్రాంతాలకు తొక్కడం మొదలెట్టారు. అలా మెల్లిమెల్లిగా సుదూర ప్రాంతాలు చేరుకుంటూ ఇప్పుడు ఇలా ప్రపంచ రికార్డు నెలకొల్పే స్థాయికి చేరుకున్నారు. 45 ఏళ్ల వయసులో ఇద్దరి పిల్లల తల్లిగా ఉంటూ ఈ రికార్డు నెలకొల్పడం నిజంగా గర్వించదగ్గ విషయం. (Photo credit: the_extreme_lady/Instagram)
ఈ యాత్రకు ముందు ఇంకొన్ని..
అయితే, ఈ యాత్రకు ముందు ఆమె ఇదివరకే కొన్ని అద్భుతమైన సైకిల్ సవారీలు చేశారు. మహారాష్ట్రలోని నాసిక్ నుండి పంజాబ్‌లోని అమృత్‌సర్ వరకు కేవలం ఐదు రోజుల ఐదు గంటల్లోనే సైక్లింగ్ చేశారు. అలాగే లేహ్-మనాలీ రోడ్డు మార్గంలో కేవలం 55 గంటల్లోనే 430 కిలోమీటర్లు సైకిల్ తొక్కారు. మరోవైపు కశ్మీర్ నుండి కన్యాకుమారి వరకు 17 రోజుల 17 గంటల్లో ఇంకో రికార్డు నెలకొల్పారు. ఇప్పుడు భారత్‌లోని పశ్చిమ ప్రాంతం నుండి తూర్పు ప్రాంతం వరకు సైకిల్ యాత్ర పూర్తి చేశారు. (Photo credit: the_extreme_lady/Instagram)
ఈ యాత్ర ఉద్దేశం ఏంటంటే..
ఇప్పుడు ఆమె అవయవదానంకు సంబంధించిన విషయాలపై అవగాహన కల్పిస్తూ ఈ యాత్రను పూర్తి చేశారు. ఈ క్రమంలోనే ప్రపంచ రికార్డు నెలకొల్పి అందరి చేతా ప్రశంసలు పొందుతున్నారు. ఈ యాత్రకు సంబంధించిన ఫొటోలు, డాక్యుమెంట్లను వరల్డ్ అల్ట్రా సైక్లింగ్ అసోసియేషన్‌తో పాటు గిన్నిస్ వరల్డ్ రికార్డ్స్‌కు పంపామని ఆమె వెంట ఉన్న టీమ్ సభ్యుడు ఒకరు మీడియాకు తెలిపారు. దీంతో త్వరలోనే గిన్నీస్ బుక్ రికార్డ్స్‌లో ప్రీతి చోటు దక్కించుకుంటుందని తెలిపారు. (Photo credit: the_extreme_lady/Instagram)
- Read All Latest Telugu News and Travel News