Travel Alert: జులై వరకు ఆ విమానాశ్రయంలో రాత్రిపూట విమానాల రాకపోకలు బంద్..

లక్నోలోని చౌదరి చరణ్ సింగ్ విమానాశ్రయంలో ఇకపై రాత్రిపూట సుమారు 5 నెలల పాటు విమాన రాకపోకలు నిలిచిపోనున్నాయి. దీంతో జులై వరకు లక్నోకు వెళ్లాలనుకునే ప్రయాణికులు ఈ విషయాన్ని గమనించాల్సిన అవసరం ఉంది. ఈ మేరకు విమానాశ్రయ అధికారులు తాజాగా ఓ ప్రకటన విడుదల చేశారు. ఇకపై లక్నో విమానాశ్రయం నుండి రాత్రిపూట జులై 11 వరకు విమానాలు కార్యకలాపాలు సాగించవని అందులో పేర్కొన్నారు. (Photo Credit: Unsplash/Representational Image)

ఈ సమయంలో రన్‌వే మరమ్మతు పనులు జరుగుతాయని అధికారులు స్పష్టంచేశారు. ఈ క్రమంలోనే విమానయాన సంస్థలు కూడా అక్కడ రాత్రివేళల్లో నడిచే విమానాల సమయాలను డే టైమ్‌లోకి మార్చుకోనున్నాయి. అంటే ఉదయం 6 నుండి రాత్రి 9:30 గంటల మధ్యే విమానాలు అక్కడి నుండి ఆపరేట్ అవుతాయని వివరించారు. అన్నీ అనుకున్నట్లు జరిగితే ఈ మరమ్మతుల పనులు జులై 11 నాటికి పూర్తవుతాయి. దాంతో తర్వాత యాథావిధిగా రాత్రిపూట సైతం విమానాలు తిరిగి రాకపోకలు కొనసాగిస్తాయి. అందుకోసం డీజీసీఏ సైతం చెప్పిన పనులను నిర్ణీత సమయంలో పూర్తి చేయాలని విమానాశ్రయ వర్గాలను ఆదేశించింది.

మరోవైపు ఇక్కడ మరమ్మతు పనులు మొదలయ్యాక ఎలాంటి అత్యవసరమైన పరిస్థితుల్లోనూ ఏ విమానాన్ని కూడా ఎమర్జెన్సీ ల్యాండింగ్‌కు అనుమతించమని చరణ్‌సింగ్ విమానాశ్రయ అధికారులు వెల్లడించారు. ఒకవేళ ఏదైనా కారణం చేత ఇతర విమానాశ్రయాల నుండి రాత్రిపూట ఇక్కడికి దారి మళ్లించినా ల్యాండింగ్ చేయించలేమని తేల్చి చెప్పారు. అయితే, ఈ పనుల కారణంగా అక్కడ రాత్రిపూట నిత్యం ప్రయాణాలు సాగించే 17 విమానాలపై ప్రభావం చూపుతుందని తెలిసింది. అందులో కొన్ని అంతర్జాతీయ విమాన సర్వీసులు ఉండటం గమనార్హం. దీంతో రాబోయే ఐదు నెలల్లో లక్నో విమానాశ్రయం నుండి ప్రయాణాలు సాగించేవారు కాస్త అప్రమత్తంగా ఉండాలి.

• Read All Latest Telugu News and Travel News