US Visiting Visa: అమెరికా విజిటింగ్ వీసా రావాలంటే రెండేళ్లు ఆగాల్సిందే.. వారికైతే నిరీక్షణే..!

ఇప్పుడు ఎవరైనా భారతీయులు తొలిసారి పర్యాటక వీసా కింద తొలిసారి అమెరికా వెళ్లాలనుకుంటే కాస్త ఆలోచించాల్సిన విషయమే. ఎందుకంటే ఒకవేళ ఎవరైనా ఇప్పుడు ఆ వీసా కోసం దరఖాస్తు చేసుకుంటే ఇంటర్వ్యూ అపాయింట్‌మెంట్ వీసా రావడానికి రెండేళ్లపైనే పెట్టొచ్చు. ఈ విషయాన్ని సాక్షాత్తు యూఎస్ స్టేట్ డిపార్ట్‌మెంట్ వెబ్‌సైట్‌లో పేర్కొంది. ముఖ్యంగా దిల్లీ, ముంబయిలోని వారి వెయిటింగ్ పిరియడ్ ప్రస్తుతం 758, 752 డేస్‌గా చూపిస్తోంది. దీన్ని బట్టి ఎవరైనా ఇప్పుడు దరఖాస్తు చేసుకుంటే 2024 అక్టోబర్‌లో వచ్చే వీలుంది. అదే గత నెలలో ఈ రెండు నగరాల వారికి వెయిటింగ్ పిరియడ్ 581, 517 డేస్‌గా చూపించింది.

అయితే, వీసా ప్రాసెసింగ్‌లో వెయిటింగ్ టైమ్‌ని తగ్గించేందుకు తాము అన్ని చర్యలూ తీసుకుంటున్నామని, వీలైనంత త్వరగా ఈ సమయాన్ని తగ్గించేందుకు కృషి చేస్తున్నామని అమెరికా రాయబార కార్యాలయ అధికార ప్రతినిధి తాజాగా వెల్లడించారు. కరోనా పరిస్థితుల తర్వాత ప్రపంచ వ్యాప్తంగా వీసా జారీల్లో వేగం పెరిగిందని, దీంతో అన్ని విభాగాల్లోనూ తాము త్వరతగతిన సేవలు అందిస్తున్నామని చెప్పారు. అందుకు ఉదాహరణే ఈ వేసవిలో భారత విద్యార్థులకు 82 వేల మందికి వీసాలు మంజూరు చేసినట్లు వివరించారు. ఇక వచ్చే వేసవి నాటికి తాము పూర్తి స్థాయిలో సిబ్బందిని నియమించుకుంటామని, తద్వారా అన్ని రకాల వీసాల జారీల్లో దరఖాస్తు దారులు వేచి ఉండే సమయం తగ్గుతుందని ఆశాభావం వ్యక్తం చేశారు.

అయితే, ఇలా పర్యాటక వీసాల జారీలో ఇంత ఆలస్యమవ్వడానికి ప్రధాన కారణం రాయబార కార్యాలయాల్లో తగినంత సిబ్బంది లేకపోవడమే. కొవిడ్ ప్రారంభ దశలో అంతర్జాతీయ ప్రయాణాలపై అన్ని దేశాలు ఆంక్షలు విధించిన నేపథ్యంలో రాయబార కార్యాలయాల్లోని సిబ్బందిని ఆయా దేశాలు వెనక్కి పిలిచాయి. అందులో చాలా మంది కాంట్రాక్ట్ ఉద్యోగులే ఉండటంతో చాలా మంది ఇప్పుడు ఇతర ఉద్యోగాల్లో చేరి ఉంటారు. అందువల్లే ఇప్పుడు ప్రయాణాలు తిరిగి మొదలైనా సిబ్బంది లేక ఇలా ఆలస్యమవుతోందని తెలుస్తోంది.

Read All Latest Telugu News and Travel News