West Bengal Durga Puja: బెంగాల్ పర్యాటక ప్యాకేజీల్లో త్వరలో దుర్గామాత ఉత్సవాలు కూడా..

వెస్ట్ బెంగాల్ ప్రముఖ పర్యాటక ప్రదేశాలకు నెలవైన సంగతి తెలిసిందే. ప్రకృతి సహజసిద్ధమైన అందాలతో పాటు హిల్‌స్టేషన్లు (Hill Stations), నదులు, చారిత్రక కట్టడాలు ఇక్కడ కొలువై ఉన్నాయి. అలాగే దసరా సీజన్‌లో దుర్గామాత ఉత్సవాలు (Durga Puja 2022) మరింత ఘనంగా జరుగుతాయి. దీంతో కోల్‌కతాతో పాటు బెంగాల్ మొత్తం ఈ నవరాత్రులను భక్తిశ్రద్ధలతో జరుపుకొంటారు. ఈ నేపథ్యంలోనే దసరా ఉత్సవాల సమయంలో పర్యాటకులను ప్రోత్సహించేందుకు పలు ప్యాకేజీలను తీసుకురావడానికి అడుగులు వేస్తున్నట్లు పర్యాటక శాఖ పేర్కొంది.

ఇక ఈ ప్యాకేజీలకు సంబంధించి బెంగాల్ ప్రభుత్వం 7 ప్యానెల్స్‌ను నియమించింది. పర్యాటక రంగంలో నిపుణులైన వారిని ఇందులో చేర్చింది. ఈ క్రమంలోనే బెంగాల్ పర్యాటక శాఖ మంత్రి బబుల్ సుప్రియో తాజాగా ఓ కార్యక్రమంలో మాట్లాడుతూ ఆ ప్యాకేజీలకు సంబంధించిన వివరాల్ని వెల్లడించారు. అందులో వివిధ ప్రాంతాల్లో నిర్వహించే దుర్గామాత ఉత్సవాలను కూడా కలపనున్నట్లు తెలిపారు. అలాగే బెంగాల్ పర్యాటక స్థలాలకు ప్రసిద్ధి అని.. దీంతో పబ్లిక్, ప్రైవేట్ భాగస్వామ్యాలతో టూరిజాన్ని (Tourism Packages) ప్రోత్సహించేందుకు కృషి చేస్తామని మంత్రి వివరించారు. ఈ ప్యాకేజీలకు సంబంధించిన పూర్తి వివరాలను ఆ ప్యానెల్స్‌ సెప్టెంబర్ చివరి నాటికి వెల్లడిస్తాయని చెప్పారు.

వీటితో పాటు గంగాసాగర్ ప్యాకేజీలో (Gangasagar Packages) భాగంగా గంగా నదిలో క్రూయిజ్ ఫెసిలిటీ కూడా టూరిస్టులకు అందుబాటులోకి తెచ్చేందుకు ప్రణాళికలు రూపొందిస్తున్నట్లు అభిప్రాయపడ్డారు. ఇది 15 రోజుల ప్యాకేజీ అని, అందులో వివిధ ఘాట్లను చూపిస్తూ సాగర్ ఐలాండ్‌కు కూడా తీసుకెళ్లనున్నట్లు పేర్కొన్నారు. అందులోనే సుందర్బన్స్‌ పర్యాటక ప్రదేశం కూడా చూపించనున్నట్లు చెప్పుకొచ్చారు.