సిల్లీ ఉమెన్: ‘గడ్డం’ సెల్ఫీలతో భలే నవ్విస్తోంది!

అందమైన ప్రాంతం కనిపిస్తే.. చక్కని ఫోజుతో ఫొటో తీసుకుంటారు. కానీ, ఆమె మాత్రం తన గడ్డం(Chin) కనిపిచేలా ఫొటో తీసుకుంటుంది. అయితే, దీని వెనుక ఒక మంచి కారణం ఉంది. 21 ఏళ్ల మిచిలీ లియూకి తన గడ్డం అంటే చాలా ఇష్టం. తన స్కూల్లో తోటి విద్యార్థులు తన గడ్డం చూసి ఆటపట్టించేవారట. అయితే, ఇందుకు ఆమె కుమిలిపోలేదు. వారి నవ్వులాటను పాజిటివ్‌గా తీసుకుంది. ‘‘నా గడ్డం స్నేహితులను సంతోషపెడుతోంది’’ అని భావించిన మిచిలీ.. తన ఫొటోలన్నీ గడ్డం కనిపించేలా తీసుకుంటూ ఇన్‌స్టాగ్రమ్‌లో పోస్ట్ చేయడం మొదలుపెట్టింది.

ఆ ఫొటోలు తన స్నేహితులకు భలే నచ్చేశాయి. అవి సోషల్ మీడియాలో వైరల్‌గా మారాయి. దీంతో, మిచిలీ తన గడ్డాన్ని ప్రపంచం మొత్తానికి చూపించాలని డిసైడ్ అయ్యింది. ఇదిగో ఇలా వివిధ పర్యటక ప్రాంతాలకు తిరుగుతూ.. తన గడ్డం కనిపించేలా సెల్పీలు తీసుకుని పోస్ట్ చేస్తోంది. ఇప్పుడీ గడ్డం ఫొటోలు చూసి సోషల్ మీడియా ఆమెకు ఫిదా అయిపోయింది. తన ఫొటోలు ఇతరుల్లో చిరునవ్వు నింపుతున్నందుకు మిచిలీ తెగ సంబరపడిపోతోంది.