ఆమె.. ప్రపంచాన్ని ఒంటరిగా, చౌకగా చుట్టేస్తోంది!

అమ్మాయిలు ఇంటి నుంచి ఒంటరిగా బయటకు వెళ్తేనే ఎంతో కలవరపడే మనం... తప్పకుండా ఆమె గురించి తెలుసుకోవాల్సిందే. ఒంటరిగా ప్రపంచాన్ని చుడుతోన్న ఆమె... ఇప్పటి వరకు 25 దేశాల్లో పర్యటించింది. దాదాపు 70 వేల కిలోమీటర్లు ప్రయాణించింది. ఆమె ప్రయాణం సాఫీగా సాగిపోదుందని అనుకుంటే పొరపాటే. ఆమె ‘ఒంటరి’గా ఉందని తెలిసి... ఎన్నో మానవ మృగాలు వెంటాడాయి, వేధించాయి. అయితే, ఆమె ఆత్మవిశ్వాసం ముందు... అవి ఓడిపోయాయి.

ఆమె పేరు.. అనా బక్రాన్. వయస్సు 34 ఏళ్లు. క్రొయేషియా దేశంలోని సాగ్రెబ్ నగరానికి చెందిన ఆమె... ఓ డిజిటల్ మార్కెటింగ్ కంపెనీలో పనిచేసేది. ఒంటరిగా, తక్కువ ఖర్చుతో ప్రపంచాన్ని చుట్టాలనే లక్ష్యంతో ఆమె ఉద్యోగాన్ని మానేసి... పర్యటన మొదలు పెట్టింది.


ప్రపంచ యాత్రకు చాలా ఖర్చవుతుందని తెలిసి... మొదటి రోజు నుంచే పొదుపుగా డబ్బులు వాడటం మొదలుపెట్టింది. రాత్రి వేళ్లల్లో ఒంటరిగా పార్కుల్లో పడుకునేది. చర్చి, మందిరాలు.. చౌక హోటళ్లు ఇలా ఎక్కడిపడితే అక్కడ తలదాచుకుంటూ నాలుగేళ్లుగా యాత్రలు చేస్తోంది.


ఇటీవల ఇండియాకు వచ్చిన ఆమె ‘ఇండియా టైమ్స్’తో మాట్లాడుతూ తన అనుభవాలను పంచుకుంది. ప్రయాణాలకు, హోటళ్లకు తాను పెద్దగా ఖర్చు చేయడంలేదని తెలిపింది. ‘‘నా ఒంటరి ప్రయాణంలో నాతో అసభ్యంగా ప్రవర్తించిన వాళ్లనూ చూశా, ఇంటికి పిలిచి మర్యాదలతో ఆశ్రయం కల్పించినవాళ్లనూ చూశా’’ అని తెలిపింది.


వివిధ దేశాల్లో తనకు ఎదురైన చేదు అనుభవాల గురించి చెబుతూ.. ‘‘ఉచితంగా ప్రయాణించాలనే ఉద్దేశంతో వాహనాలను లిఫ్టు అడిగేదాన్ని. కొంతమంది... నా శరీరాన్ని తడిమేసేవారు. మోకాలిపై చేయి పెట్టి అసభ్యంగా ప్రవర్తించేవారు. మరికొందరు రహస్యాంగాలు చూపించి.. కోరిక తీర్చమనేవారు. వారి నుంచి చాలా కష్టంగా బయటపడేదాన్ని. హద్దు మీరినవారిపై పెప్పర్ స్ప్రే చల్లి తప్పించుకున్నా. నాపై చెడు ఆలోచనలు రాకుండా డ్రైవర్లను మాటల్లో పెట్టేదాన్ని’’ అని తెలిపింది.

‘‘ప్రపంచ యాత్రలో కలుగుతోన్న ఈ ఆనందం ముందు అవి చాలా చిన్నవి. వాటిని మనసులో పెట్టుకుని కుంగిపోకుండా... నా ప్రయాణం కొనసాగిస్తున్నా’’ అని బక్రాన్ వివరించింది. All the best Bakran. Have safe Journey!