ఉరికే ‘కుంతాల’.. శకుంతల పరవశించిన వేళ!

తెలంగాణలోనే అత్యంత ఎత్తైన జలపాతం ‘కుంతాల’ను ఎప్పుడైనా చూశారా? 147 అడుగుల ఎత్తు నుంచి.. రాతి ఫలకల మీదుగా సొగసుగా జారే ఈ జలపాతం చూడాలంటే రెండు కళ్లు సరిపోవు. సహ్యాద్రి పర్వత శ్రేణిలో దట్టమైన అడవుల నుంచి ప్రవహించే ఈ జలపాతం.. గోదావరి ఉపనది కడెం నది పరివాహక ప్రాంతంలో సహజసిద్ధంగా ఏర్పడింది.

తెలంగాణలోని ఆదిలాబాద్ జిల్లాలో 60 కిమీల దూరంలోని నేరెడిగొండ మండలంలో ఈ జలపాతం ఉంది. జులై నుంచి అక్టోబరు మాసం వరకు ఈ జలపాతంలో జలకళ ఉట్టిపడుతుంది. నీటి వేగం కూడా ఎక్కువగా ఉంటుంది. జలపాతం పాదాల దగ్గరకు వెళ్లాలంటే 400 మెట్లు దిగాలి. ఈ జలపాతానికి ‘కుంతాల’ అని పేరు రావడం వెనుక ఓ కథ ఉంది.

దుష్యంతుడి భార్య శకుంతల ఇక్కడ ప్రకృతి అందాలను చూసి మైమరిపోయిందని, నిత్యం ఆమె ఈ జలపాతంలోనే జలకాలాడేదని అప్పటి నుంచి ఈ జలపాతాన్ని శకుంతల జలాపాతం అని పిలిచేవారిని చెబుతుంటారు. ‘శకుంతల’ పేరు కాస్తా.. ఇప్పుడు ‘కుంతాల’గా మారిందని స్థానికుల కథనం.

ఈ జలపాతం దట్టమైన అటవీ ప్రాంతాంలో ఉంది. నీరు నిత్యం రాతి పర్వతం మీదుగా ప్రవహిస్తుంటుంది. దీంతో ఇక్కడ రాళ్లపై నడవడం చాలా ప్రమాదకరం. ఇవిచాలా చదునుగా, జారుడుగా ఉంటాయి. ఇక్కడ నీటిలో దిగి స్నానాలు చేయడం కూడా ప్రమాదకరమే.

జలపాతంలో ఉన్న రాతి గుహల్లో సోమేశ్వరుడు, నాగదేవత విగ్రహాలు ఉన్నాయి. శివరాత్రి నాడు శివభక్తులు ఇక్కడి సోమేశ్వరుడ్ని దర్శించుకుంటారు. ఇక్కడ నిర్వహించే జాతరను సోమన్న జాతరగా పిలుస్తారు.

నేరేడిగొండ నుంచి 15 కి.మీ దూరంలో సిరిచెల్మ ప్రాంతం కూడా పర్యటకులను విశేషంగా ఆకట్టుకుంటుంది. ఇక్కడి అడవిలో ఉన్న చెరువు మధ్యలో హిందూ, బౌద్ధ, జైన దేవాలయాలు, శిల్పాలు, శాసనాలు ఉన్నాయని చెబుతారు. నేరేడిగొండ నుంచి 10 కి.మీ దూరంలో ఉన్న బుంగనాల, కొరటికల్ జలపాతాలను కూడా తప్పకుండా చూడండి.

ఇలా చేరుకోవాలి: హైదరాబాద్ నుంచి 271 కిలోమీటర్ల దూరంలో ఈ జలపాతం ఉంది. నిర్మల్ వెళ్లి అక్కడ్నుంచి నేరేడిగొండ వెళ్లాలి. నేరేడుగొండ నుంచి 10 కిలోమీటర్ల దూరంలో కుంతాల జలపాతం ఉంది. బస్సు సౌకర్యం ఉంది.