Namada Chilume: శ్రీరాముడు చేసిన ఈ నీటి గుంత ఎక్కడుందో తెలుసా?

శ్రీరాముడు తండ్రి దశరథుని మాటకు తలవంచి సీతాదేవీ, సోదరుడు లక్ష్మణుడితో కలిసి 14 ఏళ్లు వనవాసం చేసిన సంగతి తెలిసిందే. దీంతో వారు అడవుల బాట పట్టి అనేక కష్టాలు పడ్డారు. అలా ఒకసారి బెంగళూరు (Bengaluru) సమీపంలోని దేవరాయనదుర్గ అనే అటవీ ప్రాంతంలో నివసిస్తుండగా ఈ ‘నామద చిలుమే’ అనే నీటి గుంతను సృష్టించుకున్నారు. వాళ్లు అక్కడ ఉన్నప్పుడు ఒకరోజు రాముడు తన నుదుటిపై తిలకం దిద్దుకునేందుకు నీటిని వెతికాడు. చుట్టుపక్కల ప్రాంతాల్లో ఎంతసేపు వెతికినా చుక్క నీటి జాడ కనిపించలేదు. (Photo Credit: AjithBhatt/Wikipedia)

చివరికి తానే ఎందుకు స్వయంగా నీటి వనరును తయారు చేయొద్దని ఆలోచించి ఒక నిర్ణయానికి వచ్చాడు. ఆ ప్రాంతంలో ఉన్న ఒక బండరాయిపై తన బాణం విసిరడంతో అక్కడ చిన్న రంధ్రం ఏర్పడి నీరు ఊరటం ప్రారంభమైంది. దీంతో ఏడాది పొడవునా ఆ నీటి గుంత నుంచి నీరు వస్తూనే ఉంటుందని అంటారు. అది ఎప్పుడూ ఇంకిపోదని స్థానికులు చెబుతారు. ఈ నేపథ్యంలోనే ఆ గుంతకు ‘నామద చిలుమే’ అనే పేరొచ్చినట్లు కూడా ప్రసిద్ధి. కన్నడలో ‘నామం అంటే తిలకం, చిలుమే అంటే నీటి ఊట’ అని అర్థం. అందులో నుంచి వచ్చే నీటిని స్థానికులు, పర్యాటకులు తీర్థ జలంగా భావిస్తారు.

ఈ ప్రదేశం బెంగళూరు నుండి సుమారు 80 కిలో మీటర్ల దూరంలో తుమకూరు నుండి 14 కిలోమీటర్ల దూరంలో దట్టమైన దేవరాయనదుర్గ రిజర్వ్ ఫారెస్ట్‌లో ఉంటుంది. దీంతో ఇది కర్ణాటక అటవీ శాఖ పరిధిలో ఉండటం గమనార్హం. మరోవైపు మెట్రో నగరమైన బెంగళూరులో కాలుష్యం ఉన్నప్పటికీ ఇక్కడ ప్రశాంతమైన వాతారణం ఉంటుంది. దీంతో పర్యాటకులు ఎవరైనా ఈ నామద చిలుమే ప్రాంతంలో మంచి సమయాన్ని ఆస్వాదించవచ్చు. అక్కడికి వెళ్లేవారు ఆ నీటి గుంతలో నుంచి నీరు తాగొచ్చు. ఆ గుంత చుట్టూ రెయిలింగ్ ఉన్నా నీరు బయటకు ప్రవహించే వీలుంది. దీంతో అక్కడి నుంచి ఒడిసిపట్టి మీరు కూడా తీర్థ జలాన్ని సేవించవచ్చు. ఇది వీకెండ్ డెస్టినేషన్‌గా చాలా బాగుంటుంది.

• Read All Latest Telugu News and Travel News