China Wall: సందర్శకుల కోసం తెరువబడిన గ్రేట్ వాల్ ఆఫ్ చైనా

కరోనా వైరస్ మహమ్మారి బారి నుండి ఇప్పుడిప్పుడే కోలుకుంటున్న చైనాలో మరలా పర్యాటక రంగం పుంజుకునే అవకాశాలు కనిపిస్తున్నాయి. సందర్శకుల కోసం గ్రేట్ వాల్ ఆఫ్ చైనా తెరువబడింది. బీజింగ్ లో ఉన్న ఈ వాల్ యొక్క ప్రఖ్యాత బాడలింగ్ విభాగాన్ని మంగళవారం స్థానిక ప్రజల కోసం పాక్షికంగా తెరిచారు.

కరోనా వైరస్ వ్యాప్తి కారణంగా దాదాపు రెండు నెలలు మూసివేయబడిన తరువాత చైనాలో గ్రేట్ వాల్ తిరిగి తెరువబడింది. ఇది ఒక పెద్ద వార్తగా మారింది. వైరస్ బారి నుండి ఆ దేశం సాధారణ స్థితికి చేరుకుందని ఈ చర్య ప్రతిబింబిస్తుంది. అదే విధంగా సెంట్రల్ హుబీ ప్రావిన్స్ లో నివసిస్తున్న 50 మిలియన్లకు పైగా ప్రజలపై కూడా లాక్ డౌన్ ఎత్తివేయబడింది. వైరస్ యొక్క మొదటి కేసు 2019 చివరిల్లో ప్రావిన్స్ లో నివేదించబడింది.

చైనాలో తాజా పరిణామాలు ఇక్కడ పరిస్థితి సాధారణ స్థితికి చేరుకుందనే సంకేతాన్ని ఇస్తున్నాయి. దీనికి సంబంధించిన ఫోటోలు సోషల్ మీడియాలో చక్కర్లు కొడుతున్నాయి. ఈ ఫొటోల్లో చాలా మంది ప్రజలు, పిల్లలతో సహా మాస్కులను ధరించి గ్రేట్ వాల్ ఆఫ్ చైనాను సందర్శించడం చూడవచ్చు. అయితే ఈ సందర్శనపై కొన్ని ఆంక్షలు కూడా ఉన్నాయి. గ్రేట్ వాల్ ఆఫ్ చైనాను చూడాలనుకునే పర్యాటకులు ఆరోగ్య శాఖ నుండి తప్పనిసరిగా హెల్త్ క్లియరెన్స్ కోడ్ ను కలిగి ఉండాలి. అంతేకాదు ఇక్కడి పరిపాలన విభాగం రోజు వారీ సందర్శకుల సంఖ్యను 19500కు పరిమితం చేసింది.

Read Also:ఇండియాలోని ఐదు అంతర్జాతీయ సరిహద్దులు ఇవే

ఈ ప్రాంతం ఉదయం 9 గంటల నుండి సాయంత్రం 4 గంటల వరకు తెరిచి ఉంటుంది. మంగళవారం (మార్చి 25) మధ్యాహ్నం 2 గంటల వరకు ఈ పర్యాటక ప్రాంతం సందర్శన కోసం 892 టికెట్లను అధికారిక వెబ్ సైట్ లో రిజర్వ్ చేశారు. ప్రజలు ముందుగానే వీ చాట్ ద్వారా టికెట్లను బుక్ చేసుకోగలిగారు.

అదే విధంగా కరోనా వైరస్ మొట్ట మొదట తాకిన వూహాన్ లో కూడా ప్రయాణ పరిమితులు ఏప్రిల్ 8న ఎత్తివేయబడతాయి. వూహాన్ ప్రావిన్స్ జనవరి 23 నుండి పూర్తి లాక్ డౌన్ లో ఉంది. అయితే విదేశాల నుండి మరలా ప్రజలు రాకపోకలు చేయడం ప్రారంభిస్తే వైరస్ రెండవ సారి తిరిగి వస్తుందనే భయాలు కూడా ఇక్కడ ఉన్నాయి.

Read Also: కరోనా అంటే వైరస్ మాత్రమే కాదు నగరం కూడా