Telangana Tiger Reserves: తెలంగాణలోని టైగర్ రిజర్వ్‌లను చూశారా? లేకపోతే వీటిని ఓ లుక్కేయండి..

దేశంలో మొత్తం 53 పులుల సంరక్షణ కేంద్రాలు (Tiger Reserve) ఉండగా తెలంగాణలో 3 కేంద్రాలు ఉన్నాయి. అవే నాగార్జునసాగర్-శ్రీశైలం పులుల సంరక్షణ కేంద్రం, కవాల్ కేంద్రం, ఆమ్రాబాద్ కేంద్రం. ఈ మూడు కేంద్రాల్లో 100కు పైగా పులులు ఉన్నట్లు సమాచారం. అయితే కచ్చితమైన లెక్క తెలియదు. ఈ మూడింటిలో సాగర్-శ్రీశైలం సంరక్షణ కేంద్రంలోనే సుమారు 60కి పైగా ఉన్నట్లు అనధికార సమాచారం. అలాగే ఆమ్రాబాద్ టైగర్ రిజర్వ్ కేంద్రంలో 16 ఉన్నట్లు, కవాల్ అటవీ ప్రాంతంలో 45కిపైగా ఉన్నట్లు తెలుస్తోంది. దీంతో తెలంగాణలోని పర్యాటకులు ఎవరైనా పులులను చూడాలనుకుంటే ఈ మూడు కేంద్రాలకు వెళ్లొచ్చు.

దేశంలోనే అతిపెద్దది సాగర్-శ్రీశైలం అభయారణ్యం..
సాగర్-శ్రీశైలం పులుల సంరక్షణ కేంద్రం (Nagarjunasagar-Srisailam Tiger Reserve) దేశంలోనే అతిపెద్దది. ఇది సుమారు 3,568 చదరపు కిలీమీటర్ల విస్తీర్ణంలో ఉంది. అందుకే ఈ కేంద్రంలో అత్యధిక పులులు ఉన్నాయి. ఇది నాగర్ కర్నూల్, నల్గొండ జిల్లాల పరిధిలో ఉంది. ఇది దట్టమైన నల్లమల అడవుల్లో ఉండటంతో వన్యప్రాణి సంరక్షణ కేంద్రానికి వీలుగా ఉంది. అలాగే ఇది కృష్ణా నది పరివాహక ప్రాంతం కాబట్టి పులులకు అనువైన ప్రాంతంగా పేరుగాంచింది. ఈ అభయారణ్యం 1978లో అధికారికంగా ప్రకటించినా 1983లో గుర్తింపు దక్కింది. తర్వాత 1992లో రాజీవ్ గాంధీ వన్యప్రాణుల అభయారణ్యంగా మారింది. ఇది హైదరాబాద్ నుండి సుమారు 200 కిలో మీటర్ల దూరంలో ఉంది. రోడ్డు మార్గం వెంటే వెళ్లాలి. ఇక్కడికి ఏ రోజైనా ఉదయం 7 గంటల నుంచి సాయంత్రం 4 గంటల వరకు వెళ్లొచ్చు. జీప్ సఫారీలో అడవిలోకి వెళ్లి రావచ్చు. పర్యాటకుల సంఖ్యను బట్టి ధరలు ఉంటాయి.

ఆమ్రాబాద్ అభయారణ్యం రెండో అతిపెద్దది..
ఇక ఆమ్రాబాద్ పులుల సంరక్షణ కేంద్రం (Amrabad Tiger Reserve) కూడా తెలంగాణలో ముఖ్యమైనదే. అతిపెద్ద అభయారణ్యాలలో ఇది కూడా ఒకటి. నాగర్ కర్నూల్, నల్గొండ జిల్లాల్లో పరిధిలోని నల్లమల అడవుల్లోనే విస్తరించింది. దీని విస్తీర్ణం సుమారు 2,611 చదరపు కిలోమీటర్లు. ఇక్కడ కూడా చెప్పుకోదగినన్ని పులులు ఉన్నాయి. నల్లమల అడవి అంటేనే ప్ర‌కృతి అందాలకు నెలవు. కొండకోనల నడుమ పచ్చదనంతో విరాజిల్లుతున్న ఈ ప్రాంతం కేవలం పులులకే కాకుండా ఇతర జంతుజాలానికి కూడా మంచి నిలయం. ఇది కూడా 1983లోనే వన్యప్రాణి సంరక్షణ కేంద్రంగా గుర్తింపు పొందింది. ఈ అభయారణ్యం హైదరాబాద్ నుంచి సుమారు 140 కిలోమీటర్ల దూరంలో ఉంది. రోడ్డు మార్గంలోనే వెళ్లాలి.ఇక్కడ ఉదయం 9 గంటల నుంచి సాయంత్రం 4 గంటల వరకు జీప్ సఫారీ చేయొచ్చు.

కవాల్ అభయారణ్యం..తెలంగాణలో మూడో పులుల సంరక్షణ కేంద్రం అయిన కవాల్ అభయారణ్యం (Kawal Tiger Reserve) మంచిర్యాల జిల్లా జన్నారం మండలంలో ఉంది. 2012లో భారత ప్రభుత్వం దీన్ని టైగర్ రిజర్వ్‌ కేంద్రంగా ప్రకటించింది. ఇది గోదావరి, కడం నదుల పరివాహక ప్రాంతంలో సుమారు 2,015 చదరపు కిలీమీటర్ల విస్తీర్ణంలో ఉంది. ఈ అభయారణ్యం కేవలం పులులకు మాత్రమే కాకుండా ఇతర జంతుజాలానికి కూడా ఆశ్రయం కల్పిస్తోంది. ఇది హైదరాబాద్ నుండి సుమారు 260 కిలోమీటర్ల దూరంలో ఉంది. రోడ్డు మార్గంలోనే వెళ్లాల్సి ఉంటుంది. ఈ అభయారణ్యాన్ని సందర్శించాలంటే ఉదయం 7 నుంచి సాయంత్రం 6 వరకు అందుబాటులో ఉంటుంది.