మీకు తెలుసా?: ఆయనకు 39 మంది భార్యలు, 94 మంది పిల్లలు!

ఒక్క భార్యతోనే వేగలేకపోతున్నాం, నా ముఖానికి ఇంకొక భార్య అంటూ చాలామంది వేళాకోలంగా చెబుతుంటారు. అయితే, ఆయన ఏకంగా 39 మందిని పెళ్లి చేసుకుని, 94 మంది పిల్లలకు తండ్రయ్యాడు. 33 మంది మనవళ్లకు తాత కూడా అయ్యాడు. ఆయన పరాయి దేశానికి చెందినవాడు అనుకుంటే పొరపాటే. ఆయన పక్కా ఇండియన్!!

ఒక్క కుటుంబాన్ని పోషించడమే కష్టం.. అలాంటిది ఆయన 181 మందితో ఒకే ఇంటిలో ఉంటున్నాడు. అందుకే, ప్రపంచంలోనే అతిపెద్ద కుటుంబం కలిగిన వ్యక్తిగా ఆయన రికార్డులకెక్కాడు. మిజోరంలోని బక్త్వాంగ్ గ్రామంలో నివసిస్తున్న జియోనా చనా.. 17వ ఏటనే పెళ్లి చేసుకున్నాడు. అప్పటి నుంచి ఆయన పెళ్లిలు చేసుకుంటూనే ఉన్నాడు. ఒకే ఏడాదిలో పది పెళ్లిల్లు చేసుకున్న సందర్భాలు కూడా ఉన్నాయి.

ఎందుకలా అని ప్రశ్నిస్తే.. అది తమ జాతి సంప్రదాయమని చెబుతున్నాడు మన 73 ఏళ్ల మిస్టర్ పెళ్లి కొడుకు. తన జాతిని ప్రపంచవ్యాప్తంగా విస్తరించాలనే లక్ష్యంతో ఆయన ఈ పెళ్లి చేసుకుంటున్నాడట. మరి, అంతమందితో ఒకే ఇంటిలో ఎలా జీవిస్తున్నాడు అనే కదా మీ ప్రశ్న? ఆ కుటుంబం నివసించడానికి ఏకంగా నాలుగు అంతస్తుల భవనాన్ని నిర్మించాడు చనా.
చనా ఇంటికి మొత్తం 100 గదులు ఉన్నాయి. 15 మంది కోడళ్లు కూడా అదే ఇంట్లో నివసిస్తున్నారు. ఇక చనా పడక విషయానికి వస్తే.. తన భార్యల్లో చిన్న వయస్కురాలు ఆయన పక్కన పడుకోవాలి. ఇలా రోజుకు ఒక్కరు చొప్పున ఆయనతో పడుకుంటారు. ఎనిమిది మంది భార్యలు ఆయన అవసరాలు తీర్చుతారు. చనా కుమారుల్లో కొంతమంది వ్యవసాయం చేస్తుంటే, మరికొందరు వ్యాపారం చేస్తున్నారు.

ఇంట్లో అందరికీ కలిపి ఒకే వంట గది ఉంది. రోజుకు 100 కిలోల బియ్యం, 60 కిలోల కూరగాయలు, 30 కోళ్లు అవసరమవుతాయట. వీరి డైనింగ్ హాల్.. ఓ హోటల్‌నే తలపిస్తుంది. కొసమెరుపు ఏమిటంటే.. చనా కుటుంబంలోని పిల్లలు చదువుకోడానికి అక్కడ ఏకంగా ఒక స్కూలే ఉంది. అందులో మిజోరం స్టేట్ సిలబస్‌తో పాటు, చనా జీవిత చరిత్ర కూడా బోధిస్తుండటం గమనార్హం. మిజోరం వెళ్తే.. ఈ సారి తప్పకుండా జియోనా చనా కుటుంబంతో సెల్ఫీ తీసుకోవడం మరిచిపోవద్దు.