Wular Lake Kashmir: ఆసియాలోనే అతిపెద్ద మంచినీటి సరస్సు వులార్.. త్వరలోనే నాన్ మోటార్ వాక్‌వే

భారత దేశంలోనే కశ్మీర్ పర్యాటక ప్రాంతానికి ప్రత్యేకమైన స్థానం ఉంది. అక్కడి పర్వత శిఖరాలు, మంచుకొండలు, లోయలు, సరస్సులు కశ్మీర్ వ్యాలీ అందాలను రెట్టింపు చేస్తాయి. దీంతో ప్రతి ఒక్కరికీ ఒక్కసారైనా అక్కడికి వెళ్లి ప్రకృతి అందాలను ఆస్వాదించాలని ఉంటుంది. అయితే, ఆసియాలోనే అతిపెద్ద మంచినీటి సరస్సుల్లో ఒకటైన వులార్ లేక్ ప్రస్తుతం నిర్లక్ష్యానికి గురవుతోంది. దాని చుట్టు పక్కల ప్రాంతాలను మెరుగుపర్చి పర్యాటక రంగాన్ని కాపాడాలని స్థానికులు కోరుతున్నారు.

ఈ వులార్ లేక్ కశ్మీర్‌లోని బందిపొర ప్రాంతంలో ఉంది. అయితే, గత ప్రభుత్వాల నిర్లక్ష్యాల వల్ల దాన్ని పట్టించుకునేనాథుడే కరవయ్యాడు. దీంతో ఆ సరస్సు తన సహజసిద్ధమైన అందాలను కోల్పోతుంది. అయినా, ఆ సరస్సును చూడటానికి నిత్యం చాలా మంది పర్యాటకులు వస్తుంటారు. దీంతో స్థానికులు ఆ సరస్సును పరిరక్షించాలని కోరినా ఎవరూ పట్టించుకోలేదు. ఈ క్రమంలోనే ఇటీవల జరిగిన వులార్ ఫెస్టివల్‌లో పాల్గొన్న స్థానిక డివిజన్ కమిషనర్ గట్టి నిర్ణయం తీసుకున్నారు. ఆ వులార్ లేక్ చుట్టూ నాన్ మోటార్ వాక్‌వే నిర్మించనున్నట్లు వెల్లడించారు. దీంతో అక్కడి పర్యాటక రంగాన్ని మరింత బలోపేతం చేయాలనుకుంటున్నట్లు స్పష్టం చేశారు.
అతి పెద్ద మంచినీటి సరస్సు అయిన ఈ వులార్ లేక్ అక్కడి పర్యాటక రంగాన్ని అభివృద్ధి చేయడంతో పాటు స్థానిక ప్రజల సామాజిక స్థితిగతులను కూడా మార్చుతుందని కమిషనర్ అభిప్రాయపడ్డారు. ఈ ఏడాది కశ్మీర్ వ్యాలీని చూసేందుకు పర్యాటకులు అధికంగా వస్తారని, దీంతో వారిని ఆకట్టుకునే విధంగా వులార్ చుట్టూ వాక్‌వేను నిర్మిస్తున్నట్లు వరించారు. మరోవైపు కమిషనర్ ప్రకటనతో స్థానిక ప్రజలు హర్షం వ్యక్తం చేశారు. ఎన్నో ఏళ్లుగా ఈ సరస్సు అందాలు అంతరించుకుపోతున్నాయని, దీన్ని అభివృద్ధి చేస్తే పర్యాటకుల సంఖ్య పెరిగి కొంతమందికైనా జీవనోపాధి లభిస్తుందని ఆశాభావం వ్యక్తం చేశారు.