Bigg Boss OTT Telugu: నటరాజ్ vs అఖిల్ ఫైట్.. నువ్వొక్కడివే కష్టపడుతున్నావా? నీకు అత్యాశ అంటూ ఏకేశాడు

మొన్నటి వరకూ అఖిల్, నటరాజ్ మాస్టర్ ఇద్దరూ కలిసే గేమ్ ఆడారు. అయితే ఎప్పుడైతే రోజ్ టాస్క్‌లో అఖిల్ తనకి సపోర్ట్ చేయలేదో నటరాజ్ మాస్టర్ రకరకాల నటనల్ని బయటకు తీస్తున్నారు.

ఆ టాస్క్‌లో బాబా భాస్కర్ నటరాజ్ మాస్టర్‌కి సపోర్ట్ చేయగా.. అఖిల్ అనీల్‌కి సపోర్ట్ చేశాడు. దీంతో నటరాజ్ మాస్టర్ బోరు బోరు ఏడుస్తూ హౌస్‌లో రచ్చ రచ్చ చేశారు. ఎప్పటిలాగే తన కూతురు ప్రస్తావన తీసుకుని వస్తూ.. నన్ను టాప్‌కి పంపకపోతే చంపెయ్ అంటూ దేవుడితో మాట్లాడుతూ గోల గోల చేశారు. ఆ రోజు ఎపిసోడ్‌లో నటరాజ్ మాస్టర్ ప్రవర్తనకి అందరి మైండ్‌లు బ్లాక్ అయ్యి పోయాయి. చివరికి నటరాజ్ మాస్టర్ మొర దేవుడు ఆలకించాడో ఏమో కానీ.. ఓటర్లను ఓటు అప్పీల్ చేసుకునే అవకాశం అనసూయ ద్వారా ఆయనకే లభించింది.

ఇక ఈరోజు (మే 14) ఎపిసోడ్‌కి సంబంధించిన ప్రోమో విడుదల కాగా.. ఇందులో మరోసారి నటరాజ్ మాస్టర్, అఖిల్‌ల మధ్య తీవ్ర వాగ్యుద్ధం నడిచింది. గతంలో మాదిరిగానే.. బిగ్ బాస్ హౌస్‌లో ఒక ఆవును పెట్టి.. సమయానుసారంగా ఆ ఆవునుంచి పాలు వస్తాయని.. వాటిని డబ్బాలలో పట్టుకోవాలని బిగ్ బాస్ టాస్క్ ఇవ్వడంతో పాలు పట్టడం కోసం అఖిల్, నటరాజ్‌లు పోటీపడ్డారు.

నిజానికి వీళ్లిద్దరూ ఫిజికల్ టాస్క్ అనేసరికి ప్రాణం పెట్టేస్తారు.. అందర్నీ పక్కన నెట్టేసి గెలివడానికే ఆడతారు. అయితే మొన్నటి వరకూ వీళ్ల మధ్య వివాదం లేదు కాబట్టి నడిచింది.. ఇప్పుడు నటరాజ్ అఖిల్‌ని బద్ధ శత్రువులా చూస్తున్నారు. దీంతో టాస్క్‌లో నువ్వా నేనా అంటూ పోటీపడ్డారు.

వీళ్లిద్దరూ పాలు పట్టుకుంటుండగా.. ఒకర్నొకరు తోసుకున్నారు. అనంతరం అఖిల్ పాల కేన్ నేలపాలు కావడంతో అఖిల్ ఆగ్రహంతో ఊగిపోయాడు. ‘ఈయనకి సంతృప్తి అనేదే ఉండదు’ అని ఫైర్ అయ్యాడు. ‘ఎదురువాళ్లని ఓడించాలనే సంతృప్తి నీకు ఉంటుంది నాకు కాదు’ అని అన్నాడు నటరాజ్.

నీకు అత్యాశ ఎక్కువ అని అఖిల్ అంటే.. నీలా నేను మనసులో ఒకటి పెట్టుకుని మాట్లాడను.. నేను కష్టపడి ఆడుతున్నాను’ అని నటరాజ్ అనడంతో.. అఖిల్‌కి మండిపోయింది.

నువ్వొక్కడివే కష్టపడి ఆడుతున్నావా? అందరూ కష్టపడి ఆడుతున్నారు అని రెచ్చిపోయాడు అఖిల్. చివరి నిమిషంలో చాలా ఇంపార్టెంట్ అనుకున్న టైంలో నా దగ్గర నుంచి లాగేసుకున్నావ్ అని టాస్క్‌లో తనకి సపోర్ట్ చేయకపోవడాన్ని ప్రస్తావించారు నటరాజ్. దీంతో అఖిల్.. ‘అనీల్ ఫస్ట్ టైం బిగ్ బాస్ ‌కి వచ్చాడు.. వీడికి నీకంటే ఎక్కువ ఇంపార్టెంట్’ అని అన్నాడు. ‘నన్ను ఎక్కడకొట్టకూడదో సరిగ్గా అక్కడే కొట్టావ్.. కానీ దేవుడు ఉన్నాడు.. మళ్లీ నాకు వచ్చింది.. నా కష్టానికి ఫలితం దక్కింది’ అని అన్నారు నటరాజ్ మాస్టర్. మొత్తానికి ఈ ఇద్దరు మిత్రుల మధ్య వార్ ఓ రేంజ్‌లో నడిచింది. మొన్నటి వరకూ నీ మాటే నా మాట అన్నట్టుగా బిందుపై కత్తి కట్టిన వీళ్లిద్దరూ ఇప్పుడు సై అంటే సై అంటున్నారు.