Ariyana Glory: మీరు ‘అతి’యాానాని చూశారు.. నేను నిజాయితీ చూశా: దేవి నాగవల్లి వైరల్ పోస్ట్

బిగ్ బాస్ హౌస్‌కి లేడీ బాస్ అవుతానంటూ సీజన్ 4లో అడుగుపెట్టిన టీవీ 9 యాంకర్ దేవి నాగవల్లి.. తాను కన్న కలను అరియానా గ్లోరితో తీర్చుకునేందుకు తన వంతు ప్రయత్నం చేస్తోంది. బిగ్ బాస్ సీజన్ 4 ఫైనల్‌కి చేరిన అరియానా గ్లోరికి తన మద్దతు ప్రకటిస్తూ.. ఆసక్తికరమైన పోస్ట్‌ను తన ఫేస్ బుక్‌లో షేర్ చేశారు.

బిగ్ బాస్‌కి లేడీ బాస్ కావాలని బిగ్ బాస్ సీజన్ 4లో అడుగుపెట్టిన టీవీ 9 యాంకర్ దేవి నాగవల్లి.. అనూహ్యంగా మూడోవారంలో ఎలిమినేట్ అయ్యి బిగ్ బాస్ హౌస్ నుంచి బయటకు వచ్చేసింది. అయితే ఆమె హౌస్‌లో ఉన్నది మూడు వారాలే అయినా.. బలమైన కంటెస్టెంట్ అనవసరంగా ఎలిమినేట్ చేశారే అన్న పేరు అయితే సంపాదించింది దేవి నాగవల్లి. టీవీ దేవి వేరు.. బిగ్ బాస్ దేవి వేరు అన్నట్టుగా తన మార్క్ చూపించింది.


ఆ ఛానల్‌పై ఉన్న వ్యతిరేకతే దేవి నాగవల్లి ఎలిమినేట్ కావడానికి కారణం అనే వాదన కూడా బలంగానే వినపడింది. మొత్తానికి ఒక యాంకర్‌గానే పరిచయం ఉన్న దేవి నాగవల్లి తనలో ఉన్న అన్ని కోణాలను బిగ్ బాస్ వేదికగా బయటపెట్టింది. చాలా మంది ప్రేక్షకులతో శెభాష్ అనిపించింది. నిజానికి దేవి నాగవల్లి వ్యక్తిత్వానికి బిగ్ బాస్ షో సెట్ కాదనే అభిప్రాయాలు కూడా వ్యక్తమయ్యాయి.


ఇదిలా ఉంటే.. బిగ్ బాస్ హౌస్‌కి లేడీ బాస్ అవుతానని సీజన్ 4లో అడుగుపెట్టిన దేవి నాగవల్లి.. మూడో వారంలోనే ఎలిమినేట్ కావడంతో.. తాను వెళ్తూ వెళ్తూ అరియానా గ్లోరికి ఫుల్ హైప్ ఇచ్చి వెళ్లింది. తన కలను నెరవేర్చే బాధ్యతలో భాగంగా.. తనకు లభించిన ఇమ్యునిటీ పవర్ సాయంతో నాలుగో వారంలో నామినేషన్స్ అరియానా లేకుండా చేసి సేవ్ చేసింది.

ఈ తరువాత నుంచి అరియానా ఆట తప్ప వేరే ధ్యాస లేకుండా గ్రాఫ్‌ని అంతకంతకూ పెంచుకుంటూ ఫైనల్‌కి చేరుకుంది. అయితే అరియానా టాస్క్ పరంగా పర్ఫెక్ట్ అయినప్పటికీ చేయాల్సిన దానికంటే ఎక్కువ చేసి విమర్శల పాలౌతోంది. కాస్త అతి చేస్తుందనే విమర్శలతో అరియానాను అతియానా చేసేశారు కొంతమంది నెటిజన్లు.

ఈ తరుణంలో అరియానాకు తన మద్దతు ప్రకటిస్తూ.. ‘మీరు అతి చూశారు.. నేను నిజాయితీ చూశా’ అంటూ దేవి నాగవల్లి అదిరిపోయే క్యాప్షన్ పెట్టారు. ఈ సందర్భంగా దేవి ఎలిమినేషన్ సందర్భంగా అరియానా ఏడుస్తూ భావోద్వేగానికి గురైన ఫొటోని ఫేస్ బుక్‌లో షేర్ చేసి.. అరియానా గ్లోరికి ఓటు వేసి గెలిపించాలని ప్రేక్షకుల్ని కోరారు దేవి నాగవల్లి.