Vj Sunny: అలియా భట్ పెళ్లి.. బాధలో బిగ్ బాస్ సన్నీ ఫన్నీ పోస్ట్

బీ-టౌన్ గ్లామరస్ జోడీ.. బాలీవుడ్ లవ్‌ బర్డ్స్ అలియా భట్- రణ్‌బీర్ కపూర్ వివాహబంధంతో ఒక్కటయ్యారు. ఏప్రిల్ 14న కొత్త జీవితాన్ని ప్రారంభించారు. సుమారు ఐదేళ్లుగా రిలేషన్‌లో ఉన్న ఈ జంట బంధువులు, స్నేహితుల సమక్షంలో మూడుముళ్ల బంధంతో ఒక్కటయ్యారు. దీంతో సోషల్ మీడియా వేదికగా ఈ కొత్త జంటకు శుభాకాంక్షల్ని తెలియజేస్తున్నారు. కొత్త జంటకు విషెష్ తెలియజేస్తూ అందరూ సంతోషంలో ఉంటే.. బిగ్ బాస్ విన్నర్ వీజే సన్నీ మాత్రం బాధపడిపోతున్నాడు. అతను కూడా అలియా భట్-రణ్‌బీర్ కపూర్ జంటకు కంగ్రాట్స్ తెలియజేశాడు కానీ.. ఫన్నీగా తలపట్టుకుని వెళ్తున్నా అన్నట్టుగా ఉన్న ఎమోజీని తన ఇన్‌స్టాగ్రామ్ స్టోరీలో షేర్ చేశాడు సన్నీ.

అలియాభట్‌కి సన్నీ వీరాభిమాని మాత్రమే కాదు.. సన్నీ డ్రీమ్ గర్ల్ అలియా.. ఆమెను తెగ ప్రేమించి ఆరాధించేస్తుంటాడు సన్నీ. జర్నలిస్ట్‌గా ఉన్నప్పుడు అలియాను కలిసిన సన్నీ.. ఆమెతో దబిడిదిబిడి అనే బాలయ్య బాబు పాపులర్ డైలాగ్‌ను చెప్పించాడు. బిగ్ బాస్ హౌస్‌లో ఆ విషయాన్ని గుర్తు చేసుకుని.. తనకి అలియా అంటే చాలా ఇష్టం అని చెప్పాడు.

అయితే యాదృచ్ఛికంగా సన్నీ బిగ్ బాస్ విన్నర్ అయిన రోజున గెస్ట్‌గా వచ్చింది అలియా. సన్నీ నేర్పించిన 'దబిడి దిబిడే' అనే డైలాగ్ చెప్పి సర్ ప్రైజ్ చేసింది. అంతేకాదు సన్నీకి ఐలవ్యూ కూడా చెప్పడంతో మనోడికి దెబ్బకి మూర్ఛపోయినంత పని అయ్యింది. ఇక బిగ్ బాస్ విన్నర్ అయిన తరువాత కూడా అలియా నామ స్మరణతోనే ఉన్నాడు సన్నీ. ఫినాలే ఎపిసోడ్‌కి అలియా రావడం తన జీవితంలోనే పెద్ద సర్ ప్రైజ్ అని చెప్పిన సన్నీ.. అలియా ఐ లవ్యూ చెప్పినప్పుడు లవ్యూ టూ అనేద్దాం అనుకున్నాగానీ పక్కన రణ్‌బీర్‌ని చూసి కామ్ అయిపోయా అని చెప్పుకొచ్చాడు సన్నీ. మొత్తానికి అలియా భట్‌ని రణ్‌బీర్ కపూర్ పెళ్లాడటంతో సన్నీ ఫీలింగ్‌ని ఇన్‌స్ట్రాగ్రామ్ ద్వారా అభిమానులతో పంచుకున్నాడు.