Lahari Shari: పవన్‌తో నాకు ఎలాంటి రిలేషన్ లేదు.. నాలుగో భార్య అని తప్పుడు రాతలు: బిగ్ బాస్ లహరి షాకింగ్ విషయాలు

ఇటీవల కారు యాక్సిడెంట్‌లో మరణించిన కత్తి మహేష్‌కి విమర్శకుడిగా మంచి పేరు ఉంది. ముఖ్యంగా పవన్ కళ్యాణ్‌పై ఈయన చేసిన విమర్శలు అనేక గొడవలకు కారణం అయ్యాయి. అయితే ఎంతమంది ఎన్ని విధాలుగా విమర్శించినా కత్తి మహేష్ విషయజ్ఞానంతో సమర్ధవంతంగా ఎదుర్కొనేవారు. అయితే అప్పట్లో ఓ టీవీ ఛానల్ డిబేట్‌లో కత్తి మహేష్ గట్టి ఝలక్ ఇచ్చింది ఓ యాంకర్. పవన్ కళ్యాణ్ పర్సనల్ విషయాలపై విమర్శలు గుప్పిస్తున్న కత్తి మహేష్‌ని మీ తల్లిగారి పేరేంటి? అని అడిగింది. అదే డిబేట్‌లో పాల్గొన్న వివేక్ అనే వ్యక్తి కూడా కత్తి మహేష్‌ని అతని తల్లి గురించి అడిగి ఇబ్బంది పెట్టారు.


అయితే ఎన్నిసార్లు అడిగినా కత్తి మహేష్ తన తల్లి గురించి చెప్పకపోగా.. ఆ ఇంటర్వ్యూ మధ్యలోనే లేచి వచ్చేశారు. అప్పట్లో ఈ ఇంటర్వ్యూ పెద్ద సంచలనం కాగా.. ఆ ఇంటర్వ్యూ చేసిన యాంకర్ ఎవరో కాదు.. ప్రస్తుతం బిగ్ బాస్ సీజన్ 5 కంటెస్టెంట్ అయిన లహరి. ఆ ఒక్క ఇంటర్వ్యూ ఈమెను సెలబ్రిటీని చేసేసింది. పవన్ కళ్యాణ్ ఫ్యాన్స్ ఈ యాంకర్‌కి అప్పట్లో బ్రహ్మరథం పట్టారు. అదే సందర్భంలో ఆమె పవన్ కళ్యాణ్ స్థాపించిన జనసేన పార్టీ కవరేజ్‌కి వెళ్లడం.. బైక్‌పై జనసేన జెండా పెట్టుకుని చక్కర్లు కొట్టడం.. పవన్ కళ్యాణ్‌ని పర్సనల్‌గా కలిసి ఫొటోలు దిగడంపై అనేక రూమర్లు నడిచాయి.

అయితే వీటన్నింటిపైన లహరి స్పందిస్తూ అసలు విషయాన్ని చెప్పింది. ప్రస్తుతం ఈ వీడియో సోషల్ మీడియాలో వైరల్ అవుతుంది. ఇంతకీ లహరి ఏం చెప్పిందంటే.. ‘నిజానికి కత్తి మహేష్ వల్లే నేను ఫేమ్ అయ్యాను. పవన్ కళ్యాణ్ గురించి ఆయన ఆ ఇంటర్వ్యూలో అలా మాట్లాడటం.. దాన్ని ఖండించడంతో ఎక్కడ చూసినా ఆ ఇంటర్వ్యూ బాగా వైరల్ అయ్యింది. నిజానికి కత్తి మహేష్ గారితో నాకు ఎలాంటి గొడవలు లేవు.


అయితే ఆయన ఈ ఇంటర్వ్యూలో పవన్ కళ్యాణ్‌పై విమర్శలు చేస్తుంటే.. ఒక యాంకర్‌గానే కాకుండా ఒక అభిమానికి స్టాండ్ తీసుకోవచ్చేమో అనిపించింది. అందుకే ఆయన మాటల్ని ఖండించాను. కత్తి మహేష్ గారు ఆ ఇంటర్వ్యూ మధ్యలో లేచి వెళ్తారని కానీ.. అది పెద్ద వైరల్ అవుతుందని కానీ నేను ఊహించలేదు.

నేను ఆ ఇంటర్వ్యూలో కత్తి మహేష్ తల్లి గురించి అడగడాన్ని చాలామంది తప్పు పట్టారు. నాకైతే అందులో తప్పు ఉందని అనిపించలేదు. ఆ ప్రశ్న వేసినందుకు ఆయన లేచివెళ్లపోవడం కరెక్ట్ కాదనిపించింది. ఆ ఇంటర్వ్యూలో పాల్గొన్న వివేక్ గారు కూడా మీ తల్లి పేరు ఏంటి ఆవిడ ఏం చేస్తారని మాత్రమే అడిగారు. నేను కత్తి మహేష్ గారిని చాలా రిక్వెస్ట్ చేశా.. అలా వెళ్లిపోవద్దు అని. కత్తి మహేష్ తల్లిని కించపరచాలనే ఉద్దేశం నాకు లేదు. ఎందుకంటే అమ్మ ఎవరికైనా అమ్మే.


పవన్ కళ్యాణ్‌కి నాలాంటి అభిమానులు కోట్లలో ఉన్నారు.. పదే పదే పవన్‌ని విమర్శిస్తుంటే.. ఎంతవరకూ అని ఊరుకుంటారు. ఎక్కడో చోట రియాక్ట్ అవుతారు. నేను కాస్త ముందు రియాక్ట్ అయ్యాను. ఈ ఇష్యూలో నాపై చాలా నెగిటివ్‌గా కామెంట్స్ చేశారు.. పవన్ కళ్యాణ్ నాలుగో భార్య అని తప్పుడు రాతలు రాశారు. నాకు అలాంటి ఆలోచన ఏమీ లేదు.

ఆ రూమర్ ఎందుకు వచ్చిందంటే.. పవన్ కళ్యాణ్ అంటే అభిమానం.. అభిమానం ఓ పది మంది దగ్గర చెప్పేసరికి అది జనంలోకి వేరే విధంగా వెళ్లింది. నేను పవన్ కళ్యాణ్‌కి ప్రేమలేఖలు ఏం రాయలేదు.. నేను నేషనల్ మీడియా ఛానల్స్‌లో పవన్ కళ్యాణ్ తరుపున మాట్లాడటం చాలామందికి నచ్చలేదు. పైగా నేను రియాక్ట్ అవుతానని అనుకున్నారు.. నాకు అంత అవసరం లేదు. అయినా పవన్ కళ్యాణ్ ఎక్కడ? నేను ఎక్కడ?? నేను మీడియా ప్రతినిధిగా నాలుగు రోజులు జనసేన పార్టీ కవరేజ్‌కి వెళ్లాను.

కానీ కత్తి మహేష్ ఇష్యూతో నేను నాలుగు రోజులు కాదు.. గంట కూడా అక్కడ ఉండలేకపోయాను. ఎందుకంటే.. పవన్ కళ్యాణ్ ఫ్యాన్స్ చాలామంది నా దగ్గరకు వచ్చి సెల్ఫీలు అడిగి.. ఫొటోల కోసం గోల చేస్తుంటే మా ఛానల్ వాళ్లు నన్ను అక్కడ నుంచి పంపించివేశారు. ఎందుకంటే చాలా హడావిడి జరిగింది.

ఆ కవరేజ్‌కి నేను ఎందుకు వెళ్లానంటే.. ఒక అభిమానిగా ఆయన్ని చూడొచ్చనే వెళ్లాను. ఇది పచ్చినిజం. కవరేజ్‌కి వెళ్లినప్పుడు చాలామంది జర్నలిస్ట్‌లు ఉన్నప్పటికీ పవన్ కళ్యాణ్ నాతోనే మాట్లాడారంటే నేను ముందు ఉన్నాను కాబట్టి అంతే తప్ప మరోటి లేదు’ అంటూ తనపై వచ్చిన రూమర్లను ఖండించింది యాంకర్ లహరి.