Karthika Deepam Hima: బిగ్ బాస్‌ని పంచుకున్న ‘కార్తీకదీపం’ సిస్టర్స్.. హిమ ఇక్కడ.. శౌర్య అక్కడ.. చెల్లి కంటే అక్క ఆటే సూపర్

బిగ్ బాస్ అంటే రియాలిటీ సెలబ్రిటీ షో. కానీ ఇది ఫస్ట్ సీజన్ వరకే. ఎన్టీఆర్ హోస్ట్ చేసిన ఫస్ట్ సీజన్‌లోనే సెలబ్రిటీ షో అనే పేరుకి న్యాయం జరిగింది. ఆ సీజన్‌లో కనిపించిన వాళ్లంతా దాదాపు సెలబ్రిటీలే. ఆ తరువాత సీజన్.. అదేనండీ.. మన కౌశల్ విన్నర్ అయిన రెండో సీజన్ నుంచి మిక్సింగ్ మొదలైంది. సినిమా వాళ్లే కాకుండా.. సీరియల్ వాళ్లు.. ఆ తరువాత యాంకర్లు.. ఆ తరువాత యూట్యూబ్ వాళ్లు.. సోషల్ మీడియా వాళ్లు ఇలా అంతకంతకూ ఎవరు తక్కువకి వస్తే వాళ్లు అన్నట్టుగా బిగ్ బాస్‌ని నాసిరకం చేశారు. ఏ పిండికి ఆ రొట్టే అన్నట్టుగా వాళ్ల వాళ్ల పరిధి మేరకు బిగ్ బాస్‌కి వచ్చి మమ అనిపిస్తున్నారు. ఇక ఈ సీజన్ విషయానికి వస్తే.. ఒక్కరంటే ఒక్కర్నైనా భలే కంటెస్టెంట్‌ని పట్టకొచ్చారా? అనడానికి లేకుండా పోయింది. అంతా అగరబత్తి బ్యాచ్‌‌లే.. వెలిగిస్తే వాసన.. లేకుండా పత్తేపారం అనేమాదిరిగానే ఉన్నారు ఈ సీజన్ కంటెస్టెంట్లు.

వీళ్లలో కార్తీకదీపం హిమ అదేనండీ మనసిచ్చి చూడు సీరియల్‌లో భానుగా అందర్నీ ఆకట్టుకున్న కీర్తి భట్ (Keerthi Keshav Bhat) ఇప్పుడు బిగ్ బాస్ హౌస్‌లో కంటెస్టెంట్‌గా ఉంది. ఇప్పుడంటే కార్తీకదీపం కథలోకి మళ్లీ వంటలక్క కార్తీక్‌లు వచ్చేశారు కానీ.. ఆ మధ్య వీళ్లిద్దర్నీ చంపేసి.. హిమ, శౌర్యలతో నెక్స్ట్ జనరేషన్ కథ మొదలుపెట్టారు. పిల్లలు పెద్దవాళ్లు కావడం.. వీళ్లిద్దరూ మళ్లీ కలుసుకోవడం అమ్మనాన్నల చావుకి హిమే కారణం అనే శౌర్య ద్వేషం పెంచుకోవడం లాంటివి చూపించారు. ఈ కథలో హిమగా కీర్తి భట్‌ని శౌర్యగా అమూల్య గౌడని చూపించారు.

అయితే ఈ అక్కాచెల్లెల కథను సడెన్ బ్రేక్ వేసి.. మళ్లీ దీప కార్తీక్‌లను ట్రాక్ ఎక్కించారు. ఇప్పుడు మళ్లీ మోనితతో కలిసి వాడు నావాడే.. కాదు నావాడే అంటూ డాక్టర్ బాబు కోసం కొట్టుకుని తిట్టుకునే కథనే లాక్కొస్తున్నారు. ప్రస్తుతం అంతా ఫ్లాష్ బ్యాక్ స్టోరీనే నడుస్తోంది. ఇంకెన్నాళ్లు ఈ ఫ్లాష్ బ్యాక్ స్టోరీ నడుస్తుందో తెలియదు.. అసలు అవుతుందో కూడా తెలియదు కాబట్టి.. నెక్స్ట్ జనరేషన్ కథలో వచ్చిన అమూల్య గౌడ, కీర్తిలను ఖాళీగా ఉంచకుండా ఈ అక్కాచెల్లెల్లు ఇద్దరికీ బిగ్ బాస్ షో‌ని పంచేశారు.

అమూల్య గౌడ కన్నడ బిగ్ బాస్ షోలో హౌస్‌ని అల్లాడిస్తుంది. తెలుగు బిగ్ బాస్ షోలో కీర్తి కన్నీళ్లు కార్చుతూ కనిపిస్తుంది. కీర్తితో పోల్చుకుంటే అమూల్య బెటర్ అనేట్టుగా కన్నడ బిగ్ బాస్‌లో అదరగొట్టేస్తుంది. ఈమె టాప్ 5కి వెళ్తుందంటూ అప్పుడే అక్కడ చర్చలు మొదలయ్యాయి. ఇక్కడైతే కీర్తి.. బయటకు వెళ్లడానికి ఈవారమా? లేక నెక్స్ట్ వారమా? అనేట్టుగా ఆడుతుంది. సీరియల్ నటిగా మంచి పేరు తెచ్చుకున్న కీర్తికి ఈ బిగ్ బాస్ పెద్దగా కలిసి రాలేదు.. చాలామందికి మాదిరిగానే కీర్తికి బిగ్ బాస్ పీడకలే. ఆమె ఇమేజ్‌ని డ్యామేజ్ చేసేట్టుగా మారింది. మరి ఎన్నివారాలు ఉంటుందో తెలియదు కానీ.. కీర్తి అయితే బిగ్ బాస్‌లో తన మార్క్ చూపించలేకపోయింది.