Keerthi Bigg Boss: కీర్తి కోసం బిగ్ బాస్ హౌస్‌లోకి వెళ్తున్నది నేనే.. ఆమె అనాధ కాదు మీ తరఫున నేనున్నా

బిగ్ బాస్ హౌస్‌లో ఉన్న కీర్తి (Keerthi Bhat) అనాధ. ఆమెకు ఎవరూ లేరు. ఫ్యామిలీ మెంబర్స్ అంతా యాక్సిడెంట్‌లో చనిపోయారు. తల్లిదండ్రులతో పాటు.. అన్న, వదినలను కోల్పోయింది. ఆ ప్రమాదంలో కీర్తి భట్ తీవ్ర గాయాలపాలై చానాళ్లు కోమాలో ఉండి ప్రాణాలతో బయటపడింది. తను అనాధ అయినప్పటికీ అలాంటి కష్టం మరో అనాధకి లేకుండా.. తనూ భట్ అనే చిన్నారిని దత్తత తీసుకుని ఆ చిన్నారికి కొత్త జీవితాన్ని ఇచ్చింది కీర్తి కేశవ్ భట్ (keerthi keshav bhat).అయితే ఎక్కడా కూడా ఆ పాప అనాధ అనే విషయం చెప్పలేదు. ఎందుకంటే.. ఫ్యూచర్‌లో ఆ చిన్నారి తెలిస్తే బాధపడుతుందని.. ఎప్పుడూ మీడియా ముందుకు తీసుకుని రాలేదు. అయితే కష్టాల కడలిని దాటి బిగ్ బాస్ హౌస్‌కి చేరిన కీర్తి.. 12 వారాలుగా బిగ్ బాస్ హౌస్‌లో ఉంటూ.. టాప్ రేస్ 5 రేస్‌లోకి దూసుకొచ్చింది.

అయితే ఇప్పుడు బిగ్ బాస్ హౌస్‌లో ఫ్యామిలీ వీక్ నడుస్తోంది. హౌస్‌లో ఉన్న వాళ్లందరికీ సొంత ఫ్యామిలీలు ఉన్నాయి కాబట్టి.. వాళ్ల తరుపున హౌస్‌లోకి వెళ్తున్నారు. అయితే కీర్తి కోసం ఎవరు వెళ్తారనే చర్చ నడుస్తుండగా.. ఆమె కోసం వెళ్లేది ఎవరో కాదు.. ‘మనసుసిచ్చి చూడు’ సీరియల్ హీరో ఆది అలియాస్ మహేష్. మనిసిచ్చి చూడు సీరియల్‌లో భానుగా కీర్తి.. ఆదిగా మహేష్ నటించి ఆకట్టుకున్నారు. అప్పటి నుంచి వీళ్లిద్దరి మధ్య మంచి అనుబంధం ఉంది. దీంతో కీర్తి ఫ్యామిలీ మెంబర్‌గా తాను హౌస్‌లోకి వెళ్తున్నానని వీడియో విడుదల చేశాడు మహేష్.


తాజా వీడియోలో మహేష్ మాట్లాడుతూ.. ‘కీర్తి కోసం బిగ్ బాస్ హౌస్‌లోకి వెళ్తున్నారా? అని చాలామంది అడుగుతున్నారు. అవును నేను కీర్తి కోసం బిగ్ బాస్ హౌస్‌లోకి వెళ్తున్నాను. కీర్తి ఫ్యామిలీ మెంబర్‌గా మనందరి తరుపున నేను వెళ్తున్నా. నువ్వు ఒంటరి కాదు.. మీమంతా నీ ఫ్యామిలీనే అని చెప్పడానికి మీ బదులుగా నేను హౌస్‌లోకి వెళ్తున్నా.

హౌస్‌లోకి వెళ్లి.. తన గేమ్‌ గురించి మాట్లాడబోతున్నాను. వీలైనంత వరకూ తనని హ్యాపీగా ఉంచి వస్తాను. ఒంటరి అనే ఫీలింగ్ ఉండకూడదు అని చెప్పడానికే నేను వెళ్తున్నా.. విన్నర్‌గా ఆమెను చూడాలని ఉందని మీ మాటగా చెప్తాను. కీర్తికి నేను ఏం చెప్పాలని మీరు అనుకుంటున్నారో.. కామెంట్స్‌లో తెలియజేయండి.. కీర్తిని అభిమానించే వాళ్లు బయట చాలామంది ఉన్నారు. వాళ్లు కీర్తి కోసం ఆమెకు ఇష్టమైన వంటకాలు చేసి ఇస్తానని అన్నారు. వాటిని తీసుకుని వెళ్తాను. మరి బిగ్ బాస్ వాళ్లు అంగీకరిస్తారో లేదో చూడాలి మరి. కీర్తి ఎప్పటి నుంచో అడుగుతున్న తన పాప ఫొటోని ఇవ్వమని రిక్వెస్ట్ చేశాను. బిగ్ బాస్ పాప ఫొటో తీసుకుని వెళ్లడానికి పర్మిషన్ ఇస్తే తను చాలా హ్యాపీ ఫీల్ అవుతుంది. కోట్లాది మంది తెలుగు ప్రేక్షకులు కీర్తి కోసం ఉన్నారని ఆమెకు గట్టిగా చెప్పేసి వస్తాను. కీర్తి ఖచ్చితంగా బిగ్ బాస్ విన్నర్ అవుతుందనే నమ్మకం ఉంది’ అంటూ చెప్పుకొచ్చాడు కీర్తి క్లోజ్ ఫ్రెండ్ మహేష్ (Mahesh Babu Kalidasu).