Shilpa Chakravarthy: బిగ్ బాస్ నుండి శిల్పా ఔట్.. ఎక్కువ ఓట్లు హిమజకే!

ఇండియన్ బిగ్గెస్ట్ రియాలిటీ షో బిగ్ బాస్‌ సీజన్ 3లో ఈవారం ఎలిమినేషన్ ఆసక్తికరంగా మారింది. వైల్డ్ కార్డ్ ఎంట్రీలతో కలుపుకుని 17 మందితో ప్రారంభమైన బిగ్ బాస్ గేమ్‌లో ఎనిమిదవ వారానికి 11 మంది సభ్యుల మాత్రమే మిగిలారు. ఈవారం ఎలిమినేషన్‌లో శ్రీముఖి, హిమజ, మహేష్ విట్టా, శిల్పా చక్రవర్తి, పునర్నవిలు ఉండగా వీరిలో ఒకరు బిగ్ బాస్ హౌస్‌ని బ్యాగ్ సర్దేయనున్నారు.

అయితే ఈ ఐదుగురిలో ఎవరు ఎలిమినేషన్ అవుతారన్నదానిపై ‘సమయం తెలుగు’ పోల్ నిర్వహించగా.. నెటిజన్ల నుండి అద్భుతమైన స్పందన లభించింది. ఇందులో 3255 మంది పాల్గొని బిగ్ బాస్ హౌస్‌ నుండి ఎవరు వెళిపోతున్నారన్న దానిపై స్పందన తెలియజేశారు.

అయితే ఈవారం ఎలిమినేషన్‌లో అత్యధికమంది వైల్డ్ కార్డ్ ఎంట్రీతో బిగ్ బాస్ హౌస్‌కి వచ్చిన శిల్పా చక్రవర్తిని ఎలిమినేట్ చేస్తూ ఓట్లు వేశారు. 3255 ఓట్లలో 38 శాతం ఓట్లు శిల్పా చక్రవర్తి ఎలిమినేట్ అవుతారన్నారు. అయితే వీరందరిలో హిమజ బిగ్ బాస్ హౌస్‌లో కొనసాగాలనుకునే వారి శాతం ఎక్కువగా ఉండటం విశేషం.

ఎవరికి ఎన్ని ఓట్లు వచ్చేయి.. ఎవరి స్థానం ఎంత?
1. శిల్పా చక్రవర్తి (38 శాతం)
2. పునర్నవి (21 శాతం)
3. శ్రీముఖి (15 శాతం)
4. మహేష్ విట్టా (14 శాతం)
5. హిమజ (12 శాతం)

ఈ లెక్కన చూస్తే.. ఈవారం ఎలిమినేట్ అయ్యే కంటెస్టెంట్స్‌లో తొలి స్థానంలో శిల్పా చక్రవర్తి ఉండగా.. రెండో స్థానంలో పునర్నవి ఉంది. మొత్తానికి వైల్డ్ కార్డ్ ద్వారా బిగ్ బాస్ హౌస్‌లోకి వచ్చిన తొలి కంటెస్టెంట్ తమన్నా సింహాద్రి రెండో వారంలోనే బ్యాక్ సర్దేయగా.. శిల్పా చక్రవర్తి సైతం బిగ్ బాస్ హౌస్‌కి వచ్చి రెండు వారాలే అవుతుంది. మరి బిగ్ బాస్ ఈమెపై దయతలచి ఈవారానికి కొనసాగిస్తారో.. లేక బ్యాగ్ సర్దేయాలని ఆదేశిస్తారో చూడాలి. ఎందుకంటే బిగ్ బాస్ హౌస్‌లో ఓటింగ్ కంటే రేటింగ్.. ఇతరత్రా సమీకరణాలు ఎక్కువగా పనిచేస్తుండటం గత మూడు సీజన్లుగా చూస్తూనే ఉన్నాం. మరి ఈసారైనా ఓటింగ్‌ను పరిగణలోనికి తీసుకుంటారేమో చూడాలి.