Uma Devi: మా డాక్టర్ బాబు జైలు నుంచి విడుదలయ్యాడో లేదో.. వచ్చేస్తున్నా అంటూ కార్తీకదీపం భాగ్యం.. లైవ్‌లో ముచ్చట్లు

బిగ్ బాస్ హౌస్ నుంచి రెండో వారంలో ఎలిమినేట్ అయిన ఉమాదేవి ఇన్ స్ట్రాగ్రామ్ లైవ్ ద్వారా అభిమానులతో ముచ్చటించారు. అభిమానులు అడిగిన ప్రశ్నలకు సమాధానాలు ఇచ్చారు ఉమాదేవి. ‘మీ లవ్ సపోర్ట్ వల్లే నేను ఇంతవరకూ వచ్చాను.. బిగ్ బాస్ నుంచి మంచి పేరుతో బయటకు రావడం హ్యాపీగా ఉంది.. రెండోవారంలో బయటకు రావడం బాధగానే ఉంది కానీ.. ఉంటే మాత్రం ఇంకా ఎక్కువ నవ్వంచేదాన్ని’ అని అన్నారు ఉమాదేవి.

ఇక ఎలిమినేషన్, రీ ఎంట్రీ గురించి మాట్లాడుతూ.. ‘నాకు కూడా ఎలిమినేషన్ అనేది అన్ ఫెయిర్‌గానే అనిపించింది. ఆ విషయంలో చాలా బాధపడుతున్నా. ఏది జరిగినా మన మంచికే అనుకోవాలి.. ఒకవేళ నాకు మళ్లీ రీ ఎంట్రీ ఇస్తే తప్పకుంటా వెళ్తాను.. నేను బిగ్ బాస్ హౌస్ నుంచి వచ్చిన తరువాత నన్ను ఎంతలా అభిమానించి సపోర్ట్ చేశారో తెలిసింది.. నాకు మళ్లీ అవకాశం వస్తే ఖచ్చితంగా వెళ్తాను.. వెళ్లి మీ మనసు దోచుకునే వస్తాను.

వాళ్లు భయపడిపోయారు..
నేను ఏ విషయాన్ని అయినా ఫెయిర్‌గా ఓపెన్‌గా అడుగుతా.. పాయింట్ పాయింట్ అడుగుతా.. అలా అడిగేసరికి వాళ్లు భయపడ్డారు.. తప్పుగా అర్థం చేసుకుని నేను అరుస్తున్నా అని అన్నారు. ఎవరు ఏం అనుకున్నా.. నేను నాలాగే ఆడాను.

లోబో ఒంటరి.. మిస్ అవుతున్నా
నేను బయటకు వచ్చేయడంతో పాపం లోబో ఒంటరి అయిపోయాడు. ఇప్పుడు లోబోని ఎవరు దగ్గరకు తీసుకుంటారో చూడాలి. నిజంగానే నేను నా బంగూని మిస్ అవుతున్నా.

బిగ్ బాస్ స్క్రిప్ట్ కాదు..
బిగ్ బాస్ రియాలిటీ షోనే. స్క్రిప్ట్ కాదు.. ఎవరో ఏదో చెప్తారని చాలామందికి అనుమానాలు ఉన్నాయి కానీ.. బిగ్ బాస్ మాత్రం స్క్రిప్ట్ కాదు.. అక్కడ ఎవరూ ఏమీ చెప్పరు. ఎందుకంటే అక్కడ మనకి స్క్రిప్ట్ ఇవ్వాల్సిన అవసరం ఉండదు.. చాలామంది ఉంటారు కాబట్టి.. కావాల్సిన ఫుటేజ్ వచ్చేస్తుంది. దాన్ని కూడా ఫుల్‌గా చూపించడం వీలు లేనప్పుడు స్క్రిప్ట్‌తో పనేం ఉంటుంది. నిజంగానే స్క్రిప్ట్ కాదు.

మళ్లీ కార్తీకదీపం భాగ్యంగా వస్తా..
నేను చేసిన పాత్రల ద్వారానే నన్ను ఇంతిలా ఆదరిస్తున్నారు.. కాబట్టి మళ్లీ షూటింగ్‌లకు వెళ్తాను. కార్తీకదీపం సీరియల్ భాగ్యంగా మళ్లీ అలరిస్తాను. అర్ధపావు భాగ్యంగా ఆకట్టుకుంటాను.. మా డాక్టర్ బాబు జైలు నుంచి వచ్చారో లేదో తెలియడం లేదు.. మా డాక్టర్ బాబు బాగుండాలి.. దీప బాగుండాలి.. త్వరలోనే మీ ముందుకు అర్ధపావు భాగ్యంగా మళ్లీ వస్తాను అంటూ అభిమానులతో ముచ్చటించారు కార్తీకదీపం భాగ్యం అలియాస్ ఉమాదేవి అప్పాల.