Mister And Misses Show: జడ్జిగా నటి స్నేహ ఎంట్రీ.. 'మిస్టర్‌ అండ్‌ మిసెస్‌' షోతో అలరించనున్న శ్రీముఖి

ఈటీవీలో ట్రెండీగా సరికొత్తగా 'మిస్టర్‌ అండ్‌ మిసెస్‌' (Mister And Misses Show) అనే రియాలిటీ షో రాబోతుంది. ఈ షోకు యాంకర్‌గా శ్రీముఖి (Anchor Sreemukhi) వ్యవహరించనుంది. డైరెక్టర్ అనిల్ కడియాల దర్శకత్వంలో జ్ఞాపిక ఎంటర్‌టైన్‌మెంట్‌ సంస్థ ఈ షోను నిర్వహంచనుంది. అనిల్‌ కడియాల దర్శకత్వంలో ఈటీవీలో గత ఆరేళ్లుగా ‘ఆలీతో సరదాగా’ ప్రసారం అవుతున్న సంగతి తెలిసిందే. అంతేకాకుండా 'వావ్‌', 'పాడుతా తీయగా', 'స్వరాభిషేకం' వంటి అనేక షోలతో పాటు పండగల పూట ప్రసారమయ్యే స్పెషల్‌ షోలను డిజైన్‌ చేసి డైరెక్ట్ చేశారు.

'మిస్టర్‌ అండ్‌ మిసెస్‌' ఒకరికి ఒకరు అనే ట్యాగ్‌లైన్‌తో సరికొత్తగా షోను డిజైన్‌ చేసి పది ఫేమస్‌ జంటలతో ప్రేక్షకుల ముందుకు తీసుకొస్తున్నారు. ఈ షో నిర్మాత ప్రవీణా కడియాల మాట్లాడుతూ.. మిస్టర్‌ అండ్‌ మిసెస్‌ షో ఈటీవీలో అక్టోబర్‌ 11న ప్రారంభం అవుతుందన్నారు. ప్రతి మంగళవారం రాత్రి 9:30 నిమిషాలకు ప్రసారం కానుండగా.. ఈ షో ద్వారా ప్రముఖ నటి స్నేహ తొలిసారి జడ్జిగా వ్యవహరిస్తుండటం విశేషమని చెప్పారు.

స్నేహతో పాటు నటుడు శివబాలాజీ మరో జడ్జిగా ఉంటారని చెప్పారు. ప్రముఖ డైరెక్టర్ అనిల్‌ రావిపూడి స్పెషల్‌ జడ్జిగా వ్యవహరించటం ఈ షోకే హైలెట్‌ అని అన్నారు. ఈ షోలో పాల్గొంటున్న పది జంటలకు రకారకాల టాస్క్‌లు ఉంటాయని.. ఆ టాస్క్‌ల్లో విజేతగా నిలిచిన వారు ఫైనల్‌కి వెళ్లి గ్రాండ్‌ ఫినాలే టైటిల్‌తో పాటు భారీ ప్రైజ్‌మనీని సొంతం చేసుకుంటారని తెలిపారు. మిస్టర్‌ అండ్‌ మిసెస్‌ పోటీలో రవికిరణ్‌–సుష్మా, పవన్‌–అంజలి, సందీప్‌–జ్యోతి, హ్రితేష్‌–ప్రియా, శ్రీవాణి–విక్రమ్‌, మధు–ప్రియాంక, ప్రీతమ్‌–మానస, సిద్దు–విష్ణుప్రియ, రాకేశ్‌–సుజాత, విశ్వ–శ్రద్ధ జంటలు పాల్గొనబోతున్నాయన్నారు.