‘జబర్దస్త్‌’లో భారీ మార్పులు.. కాస్ట్ కటింగ్‌తో ఆ టీంలు ఫసక్!

ఖతర్నాక్ కామెడీ షో ‘జబర్దస్త్’ భారీ మార్పులు చోటు చేసుకున్నాయి. కరోనా ప్రభావంతో సుమారు మూడు నెలల పాటు జబర్దస్త్‌తో మిగతా అన్ని షోలు ఆగిపోగా.. తిగిరి షూటింగ్‌లు ప్రారంభం కావడంతో ఈవారం నుంచి సీరియల్స్‌‌తో పాటు జబర్దస్త్, ఎక్స్ ట్రా జబర్దస్త్‌లు ప్రారంభమయ్యాయి.

గురు,శుక్రవారాల్లో ప్రసారం కాబోతున్న జబర్దస్త్, ఎక్స్ ట్రా జబర్దస్త్ ప్రోమోలను ఇప్పటికే విడుదల చేయగా మార్పులు చేర్పులతో సరికొత్తగా తయారైంది జబర్దస్త్. కరోనా ప్రభావంతో టీవీ ఇండస్ట్రీకి కోలుకోలేని నష్టాలు ఏర్పడటంతో ఖర్చుల్ని తగ్గించుకునే పనిలో పడ్డారు యాజమాన్యాలు. ఈ నేపథ్యంలో రెమ్యునరేషన్స్ తగ్గించడంతో పాటుగా టీంల సంఖ్యను కూడా తగ్గించేశారు.

ఇదే విషయాన్ని ప్రోమోలో కూడా ప్రస్తావిస్తూ.. ఆ రెండు టీంలో పోయాయి.. `ఆ రెండు టీంల నుంచి తీసేస్తే ఇలా వచ్చాం` అని జీవన్‌ శాంతి కుమార్‌లు చెప్పడాన్ని బట్టి భారీగానే మార్పులు కనిపిస్తున్నాయి. ఆరే టీంలు టీం లీడర్లుగా.. హైపర్ ఆది, చలాకీ చంటి, వెంకీ మంకీ, అభి, రాకెట్ రాఘవ, తాగుబోతు రమేష్‌లు కనిపిస్తున్నారు. ఒక్కో టీంకి ఐదుగురు కంటెస్టెంట్స్ సపోర్ట్‌తో జబర్దస్త్ నవ్వులు కురిపించేందుకు రంగం సిద్ధం చేశారు. ఈ లెక్కన జిగేల్‌ జీవన్‌, మస్తీ మహీదర్‌, శాంతికుమార్‌, ఫసక్‌ శశి టీంలను జబర్దస్త్ నుంచి ఫసక్ చేశారు. కాస్ట్ కటింగ్‌లో భాగంగానే ఈ భారీ మార్పులు చేసినట్టు తెలుస్తోంది. ఇక ఎక్స్ ట్రా జబర్దస్త్‌లో సైతం ఇదే రకమైన మార్పులు చేశారు. జబర్దస్త్‌లోకి తాగుబోతు రమేష్ రాగా.. ఎక్స్ ట్రా జబర్దస్త్‌లోకి షకలక శంకర్ రీ ఎంట్రీ ఇచ్చారు.