Intinti Gruhalakshmi సెప్టెంబర్ 28 ఎపిసోడ్: ప్రేమ్‌తో మనసు విప్పి మాట్లాడిన అక్షర.. లవ్ ఫెయిల్యూర్‌‌నా ప్రేమ్ అంటూ..

తన ప్రేమను మనసులోనే సమాధి చేసుకున్న శ్రుతి.. ఎలాగైనా ప్రేమ్-అక్షరతో పెళ్లికి ఒప్పించాలనే నిర్ణయానికి వచ్చింది. మరోవైపు శ్రుతి మనసులో తాను లేనని తెలుసుకున్న ప్రేమ్.. తనని పంచ ప్రాణంగా ప్రేమిస్తున్న అక్షరతో పెళ్లికి గ్రీన్ సిగ్నల్ ఇచ్చేయడంతో.. అక్షర తండ్రి జీకే పెళ్లి చూపులకు నందు ఇంటికి వచ్చేశాడు.

ఇక నేటి (సెప్టెంబర్ 28) ఎపిసోడ్‌లో ఏమైందంటే.. ప్రేమ్ అయిష్టంగానే పెళ్లి చూపులకు వస్తుంటాడు. మధ్యలో శ్రుతి కనిపించడంతో ఒకర్నొకరు చూసుకుని మౌనం వహిస్తాడు. ప్రేమ్ వచ్చి అక్షరకి ఎదురుగా కూర్చుంటాడు కానీ.. ఆమెను అస్సలు చూడడు.. మాట్లాడడు. దీంతో అక్షర, జీకేలు ప్రేమ్ ఎందుకు మాట్లాడటం లేదు.. అని అడగడంతో.. వాడు అంతే కొత్తవారితో మాట్లాడలేడు అని అంటాడు నందు. నేను కూడా కొత్తే కదా అందరితోనూ మాట్లాడుతున్నా కదా అని అక్షర అనడంతో.. ఒక్కొక్కరూ ఒక్కోలా ఉంటారు.. నీకు అందరితో కలిసిపోవడం అలవాటు.. వీడికి కలిశాక మాట కలపడం అలవాటు అని చెప్తుంది తులసి. అవును ఒకే మనస్తత్వాలు ఉన్నవారిని దేవుడు కలపడు అంటూ.. ఎలాగూ ఒకరికొకరు నచ్చేశారు కాబట్టి.. పెళ్లి పనులు మొదలుపెట్టేద్దామా? అని అడుగుతాడు జీకే.

నేను కూడా అదే అడుగుదాం అని అనుకుంటున్నా జీకే గారు అని అంటాడు నందు. ఇక అక్షర.. ప్రేమ్‌ని చూస్తూ.. ‘నీతో ఎలా మాట్లాడించాలో నాకు తెలుసు’ అంటూ ప్రేమ్‌తో పర్సనల్‌గా మాట్లాడాలని అందరి ముందు అడుగుతుంది. హ్యాపీగా మాట్లాడొచ్చు.. దాంట్లో ఏముంది? అని నందు అనడంతో.. ప్రేమ్ మౌనంగానే ఉండిపోతాడు. అక్షరను లోపలికి తీసుకుని వెళ్లు అని నందు చెప్పినప్పటికీ సందేహిస్తూనే అక్షరను లోపలికి తీసుకుని వెళ్తాడు ప్రేమ్.

అయితే అక్షర ఎదురుగా ఉన్నప్పటికీ మాట్లాడకుండానే ఉండిపోతాడు ప్రేమ్. దీంతో అక్షర చనువు తీసుకుంటుంది. ‘నీకు పాటలు పాడటం తప్ప మాటలు రావా??’ అని అడుగుతుంది. ‘నువ్ నాకు కొత్త కదా ఏం మాట్లాడాలో తెలియక అలా ఉన్నా’ అని అంటాడు ప్రేమ్. ‘కొత్త అని మాట్లాడటం మానేస్తే.. పరిచయం ఎలా పెరుగుతుంది. పరిచయంతోనే దూరం తగ్గుతుంది’ అని అంటుంది అక్షర.

మనం కలిసింది ఫస్ట్ టైం కదా.. అందుకే కొత్తగా ఉంది అని ప్రేమ్ అనడంతో.. మనం కలవడం ఇది ఫస్ట్ టైం కాదు.. సెకండ్ టైం.. మొన్న కాఫీ షాప్‌లో కలిశాం.. ప్రేమ్ గురించి నీ అభిప్రాయాన్ని అడిగిన యూట్యూబర్‌ని నేనే అని గుర్తు చేస్తుంది అక్షర. హో అవునా అది మర్చిపోయా అని ప్రేమ్ అనడంతో.. అంత అందమైన అమ్మాయి నీ దగ్గరకు వచ్చి లవ్ గురించి అడిగితే అలా ఎలా మర్చిపోతావ్ అని అడుగుతుంది అక్షర. నిన్ను ఫస్ట్ టైం చూసినప్పుడు చాలా ఎనర్జీతో ఉన్నావ్.. కానీ ఇప్పుడు చాలా దిగులుగా ఉన్నావ్.. కొంపతీసి లవ్ ఫెయిల్యూర్‌నా అని అడుగుతుంది. దీంతో ప్రేమ్‌లో కంగారు మొదలౌతుంది.


అది గమనించిన అక్షర.. నవ్వుతూ ‘కంగారు పడకులే.. జోక్ చేశా అంతే’ అని అంటుంది.. నువ్ ఆరోజు ప్రేమ గురించి.. అమ్మ గురించి చెప్పిన మాటలు నాకు తెగ నచ్చాయి. తల్లినే ఇంత ప్రేమిస్తున్నావ్ అంటే నన్ను ఎంతలా చూసుకుంటావో అని అనిపించింది.. వీలైనంత త్వరగా నిన్ను పెళ్లి చేసుకుని లైవ్ స్టార్ట్ చేయాలని ఉంది అంటూ అక్షర ప్రేమ్‌పై ప్రేమను వ్యక్తపరుస్తుండగా.. ప్రేమ్ మనసు శ్రుతి వైపుకి వెళ్తుంది.. బాల్కనీ లోనుంచి కింద ఉన్న శ్రుతిని చూస్తుంటాడు. దీంతో అక్షర.. ఏంటి ప్రేమ్.. నేను ఇక్కడ మాట్లాడుతుంటే నువ్ ఎక్కడో ఆలోచిస్తున్నావ్ అని అడుగుతుంది. అదేం లేదు అక్షర అని చెప్పి కవర్ చేస్తాడు ప్రేమ్.