Gruhalakshmi Today డిసెంబర్ 06 ఎపిసోడ్: లాస్యని కూడా వదిలేస్తున్న నందు.. ఇంటి పత్రాలు ఇచ్చేసిన లాస్య కన్నీళ్లు
Intinti Gruhalakshmi December 06 Today Episode: ఇంటిని సొంతం చేసుకుంటే ఇంట్లో ఉన్న వాళ్లంతా తన మాట వింటారని ఆశపడిన లాస్యకి ఎదురుదెబ్బ తగిలింది. ఇల్లుని అయితే సొంతం చేసుకుంది కానీ.. ఇంట్లో వాళ్లంతా ఆమెను వెలివేస్తారు. ఈరోజు ఎపిసోడ్లో ఏమైందంటే..
నీ చెవి ఒకసారి ఇలా పడెయ్..
‘నీ కడుపు మంట ఇంకా చల్లారలేదా? అనాల్సినవన్నీ అనేశావ్ కదా’? ఏం చేయాలో చెప్పు అని అంటుంది లాస్య. ‘నిన్ను ఇంట్లోవాళ్లంతా మోసగత్తెగా చూస్తున్నారు.. ఆ మరక చెరుపుకుంటేనే గానీ.. నిన్ను ఇంట్లో వాళ్లు నమ్మరు. నీ చెవి ఒకసారి ఇలా పడెయ్.. ఆ మరక చెరుపుకునే ఐడియా చెప్తానని.. లాస్య చెవిలో ఏదో ఊదేస్తుంది భాగ్య. అయితే భాగ్య చెప్పిన ప్లాన్ విన్న లాస్య.. అమ్మో నీ ప్లాన్ నా కొంప ముంచేట్టుఉందని అంటుంది. ‘ఏం కాదు లాస్యా.. ముళ్లుని ముళ్లుతోనే తీయాలి’ అని అంటుంది. నువ్ చెప్పినట్టు చేస్తే.. నా పరిస్థితి చివరికి ఉన్నది పాయే.. ఉంచుకున్నది పాయేలా అవుతుంది. నేను రిస్క్ తీసుకోలేను అని అంటుంది లాస్య.
ఉన్నది పాయే.. ఉంచుకున్నది పాయే.. భాగ్య ప్లాన్
రిస్క్ నుంచి బయటపడాలంటే రిస్క్ చేయాల్సిందే. ప్లాన్ రివర్స్ అయితే జన్మలో నా ముఖం నీకు చూపించను.. ప్లాన్ సక్సెస్ అయితే.. మాత్రం నిన్ను వదిలిపెట్టను’ అని అంటుంది భాగ్య. ఆ మాటతో లాస్య.. ‘సరే కానియ్.. నువ్ అంత నమ్మకంగా చెప్తున్నప్పుడు ఎందుకు కాదనాలి.. వెంటనే ఈ ప్లాన్ని ఇంప్లిమెంట్ చేస్తా’ అని అంటుంది లాస్య. అయితే భాగ్య ప్లాన్ ఇచ్చింది అంటే.. అది లాస్య కొంప ముంచే ప్లాన్ అయ్యే ఉంటుంది. ఎందుకంటే.. భాగ్య ప్లాన్ ఇచ్చిన ప్రతిసారీ లాస్య బొక్కబోర్లా పడుతూనే ఉంది. ఈసారి కూడా లాస్య కొంపముంచడమే కాదు.. ఉన్నది పాయే ఉంచుకున్నది పాయే కాబోతుందని చెప్పకనే చెప్పేసింది.
బస్సులో తులసి పెర్ఫామెన్స్..
ఇక తులసి.. సామ్రాట్తో బస్సు ప్రయాణాన్ని కంటిన్యూ చేస్తూనే ఉంది. అబిడ్స్, మాదాపూర్, కోఠి, సికింద్రాబాద్ అంటూ సామ్రాట్ని బస్సులో తిప్పుతూ అతనితో బ్యాగ్లు మోయిస్తుంది. ఇక హీరోయిన్కి రోజ్ మిల్క్ తాగాలని అనిపించడంతో.. హీరోగారు జనంలోకి తోసుకుంటూ వెళ్లి రోజ్ మిల్క్ సాధించి తీసుకుని వస్తాడు. అక్కడో కుళ్లు కామెడీ సీన్ పెట్టారు. ఆ తరువాత ఇద్దరూ కలిసి బస్ ఎక్కేస్తారు. అయితే ఆ బస్లో మన హీరోయిన్ ప్రతాపం చూపించే సీన్ పెట్టారు. ఒక ఆకతాయి బస్లో అమ్మాయిని ఏడిపిస్తూ.. ఆమెను తాకుతూ ఉంటాడు. అది మన హీరోయిన్ కంటపడుతుంది.
చప్పట్లు కొట్టండీ.. ఏడుపు రాకుండా కళ్లు తుడిచేస్తుంది
దీంతో బస్ ఆపండీ.. బస్ ఆపండీ అని అరుస్తుంది తులసి. బస్ ఆపిన తరువాత.. బస్లో ఉన్నవాళ్లంతా తులసి వైపు చూస్తారు. ‘బస్ ఆపమన్నది నా వైపు చూడ్డానికి కాదండీ.. అక్కడొక హీరోలోని రొమాంటిక్ యాంగిల్ చూపించడానికి చప్పట్లు కొట్టి ప్రోత్సహించండి’ అని అంటుంది తులసి. దీంతో బస్లో ఉన్నవాళ్లంతా తెగ చప్పట్లు కొట్టేస్తారు. వెంటనే ఆ ఆకతాయి.. సిగ్గుతో తల దించుకుంటాడు. ఆ తరువాత తులసి.. ఆ అమ్మాయి దగ్గరకువెళ్లి.. ఆమె ఏడ్వకుండానే కళ్లు నీళ్లు తుడిచేసి.. తెగ ఓదార్చేస్తుంది. ఆ సీన్ చూసి మనకి నవ్వు రావడం కాదు.. ఆ బస్లో ఉన్న వాళ్లు కూడా నవ్వుకుంటారు.. అంత నాటకీయంగా ఉంది ఆ సీన్.
ఈ అమ్మాయి ప్లేస్లో నీ అమ్మనో అక్కనో ఊహించుకోరా?
ఆ తరువాత ఆ ఆకతాయి దగ్గరకు వెళ్లిన తులసి.. ‘ఏంట్రా తల దించుకున్నావ్.. చేసేది తప్పని తెలిసిందా?? తప్పని తెలిసి ఈ అమ్మాయిని ఎందుకు ఏడిపిస్తున్నావ్.. ఈమె కాబట్టి ఊరుకుంది వేరేవాళ్లు అయితే చెప్పుతో కొట్టేవాళ్లు.. ఈ అమ్మాయి ప్లేస్లో నీ అమ్మనో అక్కనో ఊహించుకోరా? అంటూ క్లాస్ పీకుతుంది తులసి. వెంటనే ఆ ఆకతాయి మారిపోయి.. తులసికి చేతులెత్తి దండం పెట్టేస్తాడు. ‘నాకు దండం పెట్టడం కాదురా.. ఈ అమ్మాయికి సారీ చెప్పు’ అని అంటుంది తులసి. అతను ఆ అమ్మాయికి సారీ చెప్తే.. ఆమె ఇట్స్ ఓకే అని అంటుంది. ‘చూశావ్ రా ఈ అమ్మాయి మంచితనం.. తప్పు తెలుసుకుని పశ్చాత్తాప పడ్డావ్ అది చాలు.. పారిపోవాల్సిన పనిలేదు.. నువ్ బస్సు ఎక్కడ దిగాలో అక్కడే దిగు’ అని అంటుంది తులసి.
భజన.. భజన.. మామూలు భజన కాదు..
ఇది చూసిన మన పులిహోర రాజా.. మళ్లీ చిడతలు అందుకుంటాడు తులసి భజన కోసం. ‘మిమ్మల్ని పొగడొద్దని అంటారు కానీ.. మీరు చేసే పనులు పొగడకుండా ఉండలేనట్టుగానే ఉంటాయి.. బస్సులో ఆ కుర్రాడిని భలే డీల్ చేశారు’ అంటూ భజన చేస్తాడు. ఈ సోది చాలా సేపు సాగుతుంది. ఆ తరువాత.. ప్రేమ్ మీయాపూర్లో గిటార్ రిపేర్కి ఇచ్చాడు అక్కడికి వెళ్లాలి అని అంటుంది తులసి. దీంతో బ్యాగ్లు మోసుకుంటూ తులసి ఎక్కడికి అంటే.. అక్కడికి వెళ్లిపోతుంటాడు సామ్రాట్.
నన్ను కూడా మీలో ఒకరిగా ఒప్పుకోండి మామయ్యా..
ఇక పరంధామయ్యని చెస్ ఆడమని బలవంతం చేస్తుంది అనసూయ. రోజూ మన ఇంట్లో చూసేది చదరంగమే కదా.. మళ్లీ అదే ఆట ఆడటం ఎందుకు చెప్పు అని అంటాడు పరంధామయ్య. ఇంతలో లాస్య వచ్చి.. ‘నన్ను ఎందుకు పరాయిదానిలో చూస్తున్నారు మామయ్యా?? నాతో మాట్లాడొచ్చు కదా.. నన్ను కూడా మీలో ఒకదానిలో చూడొచ్చు కదా.. అని అంటుంది లాస్య. అలా అనుకోవాలంటే మనసు ఒప్పుకోవాలి లాస్య.. అనుకున్నరోజున తప్పకుండా ఒప్పుకుంటామ్ లాస్యా.. అని అంటాడు పరంధామయ్య.
ఈ ఇంటి యజమాని లాస్య.. ఏం చెప్తుందో విను..
ఇంతలో లాస్యని చూసి అనసూయ అక్కడ నుంచి వెళ్లిపోవడానికి ప్రయత్నిస్తుంది. దీంతో లాస్య.. ‘మీతో మాట్లాడటానికి వచ్చాను.. ఒక్క నిమిషం ఆగండి’ అని అంటుంది. మనం మాట్లాడుకునే గొప్ప విషయాలు ఏం ఉన్నావ్ అని అంటుంది అనసూయ. ‘ఏదో మాట్లాడాలని అంటుంది కదా అనసూయా.. ఏం చెప్తుందో విను.. అయినా ఆమె ఈ ఇంటి యజమాని.. మనం ఆమె ఇంట్లోనే ఉంటున్నాం .. ఆమె చెప్పింది వినాలి కదా’ అని అంటాడు పరంధామయ్య. దీంతో అనసూయ.. కూర్చుని లాస్య మాటని వినడానికి అంగీకరిస్తుంది. ఇంతలో తులసి భజనమేళంలోని మిగిలిన సభ్యులు కూడా సీన్లోకి వస్తారు.
ఆస్తి కాగితాలు తిరిగి ఇచ్చేసిన లాస్య.. యాక్టింగ్ చింపేసింది
చచ్చినపాముని ఇంకా చంపకండి మామయ్యా.. ఈ ఇల్లు నా పేరు మీదున రాయించుకున్నందుకు నాపై అందరికీ కోపం ఉందని తెలుసు.. అందుకే నేనొక నిర్ణయానికి వచ్చాను. ఈ క్షణం నుంచి ఈ ఇంటికి నాకు ఎలాంటి సంబంధం లేదు.. ఈ ఇంటి మీద హక్కుని పూర్తిగా వదులుకుంటున్నాను మామయ్యా.. ఇది మీ కష్టార్జితం.. ఇది మీ ఇల్లు.. ఇది ఎవరి పేరు మీద రాయమంటే తిరిగి వాళ్లకి రాసేస్తా. మీరు ఎక్కడ సంతకం పెట్టమంటే అక్కడ పెడతాను. ఈ ఇంటి మీద మోజు పడి నేను ఈ పని చేయలేదు. అంతా కలిసి నన్ను ఎక్కడ ఒంటరి చేస్తారనే భయంతోనే ఇలా చేశాను. ఈ ఇంటికి కోడలుగా వచ్చినా కూడా నేను ఒంటరే.. ఏ నిమిషంలో మీరంతా ఏకం అయ్యి నన్ను బయటకు తోసేస్తారో అని భయంతోనే ఇలా చేశాను’ అని అంటుంది లాస్య.
నీకు నాకు మధ్య బంధం తెగిపోయింది..
నందుకు కూడా నా ఫీలింగ్స్ని అర్ధం చేసుకోలేకపోయాడు.. చెప్పి చూసిన ఫలితం లేకుండా పోయింది.. అందుకే ఈ ఇల్లు కోసమైనా మీరంతా నన్ను మీలో కలుపుకుంటారని ఇలా చేశాను తప్ప.. మిమ్మల్ని బాధపెట్టాలని కాదు’ అంటూ కన్నీళ్లు పెట్టుకుంటుంది లాస్య. ఇక రేపటి ఎపిసోడ్లో నందు ప్లేట్ తిప్పేశాడు. తులసికి విడాకులు ఇచ్చి.. లాస్యని పెళ్లి చేసుకున్న నందు.. ఇప్పుడు లాస్యతో బంధాన్ని తెంపేసుకుంటున్నాడు.. మనం లోకం దృష్టిలోనే భార్యభర్తలం.. ఈ నాలుగు గోడల మధ్య నువ్వెవరో నేను ఎవరో అని అని లాస్యని దూరం పెడుతున్నాడు. అయతే ఈ మాటల్ని నందు మాజీ భార్య తులసి వింటుంది. మరి ఏవండీ.. అని వచ్చి నందుని పట్టుకునే సీన్ ఏమైనా ఉందేమో రేపటి ఎపిసోడ్లో చూద్దాం.