శివజ్యోతి నాకు అమ్మ.. నన్ను చిన్న పిల్లాడిలా చూసుకుంది: ఏడిపించేసిన రవికృష్ణ

బిగ్ బాస్ రియాలిటీ షో సీజన్ 3లో పాల్గొన్న టీవీ నటుడు రవికృష్ణ, యాంకర్ శివజ్యోతి ఎంత మంచి స్నేహితులుగా మారారో అందరికీ తెలిసిందే. శివజ్యోతి తనకు దేవుడు ఇచ్చిన చెల్లెలు అని రవికృష్ణ చాలా సార్లు చెప్పారు. అయితే, ఆమె తనకు చెల్లి కాదని అమ్మ అని తాజాగా అన్నారు రవికృష్ణ. శివజ్యోతికి, ఆమె భర్తకి కాళ్లు మొక్కినా తప్పులేదని భావోద్వేగానికి గురయ్యారు. అందరినీ ఏడిపించేశారు. ఈ ఎమోషనల్ సీన్‌కు స్టార్ మా ఛానెల్‌లో ప్రసారమైన ‘జాతరో జాతర’ కార్యక్రమం వేదికైంది.

రవికృష్ణకు జూలైలో కరోనా సోకిన విషయం తెలిసిందే. తనకు కొవిడ్-19 పాజిటివ్ వచ్చినట్టు ఆయనే స్వయంగా సోషల్ మీడియా ద్వారా వెల్లడించారు. అయితే, తనకు కొవిడ్ పాజిటివ్ వచ్చినప్పుడు తాను శివజ్యోతి ఇంట్లో ఉన్నానని ‘జాతరో జాతర’ కార్యక్రమంలో రవికృష్ణ చెప్పారు. రవికృష్ణ మాట్లాడుతుంటే అక్కడే ఉన్న శివజ్యోతి కన్నీళ్లు పెట్టుకుంటూ అతని వద్దకు పరుగున వెళ్లారు. ‘‘కొవిడ్-19 పాజిటివ్ వచ్చినప్పుడు మీకు ఎలా అనిపించింది’’ అని యాంకర్ రవి అడగడంతో రవికృష్ణ తన అనుభవాన్ని చెప్పుకొచ్చారు. తనకు ఎంతో సాయం చేసిన శివజ్యోతికి కృతజ్ఞతలు చెప్పారు.

‘‘ఆ టైమ్‌లో నేను జ్యోతి వాళ్ల ఇంట్లో ఉన్నాను. ఇప్పటి వరకు తనకు థ్యాంక్స్ చెప్పడానికి పెద్ద ప్లాట్‌ఫాం దొరకలేదు. నేను ‘అమ్మ’ అని తనని పిలుస్తుంటాను.. కరెక్ట్ టైమ్‌లో ఆమె ప్రూవ్ చేసుకుంది. ఆ సమయంలో మా ఇంట్లో ఎవరూ లేరు. నాకు పాజిటివ్ అని తెలిసి కూడా ‘నువ్వు ఉండు నాన్న నేను చూసుకుంటాను’ అని ఇంట్లో పెట్టుకుంది. బయట పరిస్థితి ఎలా ఉందంటే.. నేను అద్దె ఇంటిలో ఉంటాను, నెగిటివ్ వచ్చిన తరవాత కూడా ఇంటికి రానివ్వలేదు. అంత భయంకర పరిస్థితిలో కూడా నన్ను ఇంట్లో పెట్టుకుని చూసుకుంది. చిన్న పిల్లాడిలా చూసుకుంది. నేనెప్పుడూ చెల్లి అని పిలుస్తాను కానీ.. ఇది చెల్లి కాదు, నాకు అమ్మ. తనకి, బావకి కాళ్లు మొక్కినా తప్పులేదు. ఎవరైతే మనకు మెంటల్‌గా హెల్ప్ చేస్తారో అప్పుడు కొవిడ్ చాలా చిన్నది అనిపిస్తుంది. ఇలాంటి మనుషులు ఉండటం వల్ల నాకు కొవిడ్ పెద్దగా ఏమీ అనిపించలేదు’’ అంటూ తాను కంటతడి పెట్టుకోవడమే కాకుండా కార్యక్రమంలో పాల్గొన్న టీవీ స్టార్స్‌తో కూడా కన్నీళ్లు పెట్టించారు రవికృష్ణ. ఇక శివజ్యోతి గురించి చెప్పాల్సిన అవసరమే లేదు.

Also Read:

• అఖిల్‌లో మహానటుడు.. మళ్లీ మోనాల్ కోసం ఏడుపు, సమంత ముందు కన్నీళ్లు
• ‘కార్తీకదీపం’ అక్టోబర్ 26 ఎపిసోడ్! ఫ్లోలో నిజం వాగిన మౌనిత!‘నాకు పిల్లలు పుట్టరని నువ్వే చెప్పావ్‌గా?’