Chandra Haas Trolls: ఉప్పల్ స్టేడియంలో ఈటీవీ ప్రభాకర్ కొడుకు హంగామా.. దారుణమైన ట్రోలింగ్

నిన్న హైదరాబాద్‌లోని ఉప్పల్ స్టేడియంలో జరిగిన క్రికెట్ మ్యాచ్‌కి వేలాది మంది క్రికెట్ ఫ్యాన్స్ హాజరయ్యారు. వీరితోపాటు చాలామంది సెలబ్రిటీలు కూడా హాజరయ్యారు. వీరిలో సినిమా హీరోలు, హీరోయిన్లు, టీవీ ఆర్టిస్ట్‌లు, యాంకర్లు ఇలా చాలామంది టీవీ స్క్రీన్‌లపై కనిపించారు. అయితే ఈటీవీ ప్రభాకర్‌తో పాటు అతని కొడుకు చంద్రహాస్ కూడా ఇండియా, ఆస్ట్రేలియా ఫైనల్ టీ20 మ్యాచ్‌లో సందడి చేశారు. ఈ ఫొటోలను సోషల్ మీడియాలో షేర్ చేయడంతో దీనిపై కూడా ట్రోలింగ్ మొదలైంది. నా కొడుకుని ట్రోల్ చేయొద్దు మొర్రో అని ఈటీవీ ప్రభాకర్ మొత్తుకున్నా.. ట్రోలర్స్ మాత్రం 22 ఏళ్ల చంద్రహాస్‌ని విడిచిపెట్టడం లేదు.

పుత్రోత్సాహము తండ్రికి
పుత్రుడు జన్మించినపుడె పుట్టదు జనులా
పుత్రుని కనుగొని పొగడగ
పుత్రోత్సాహమునాడు పొందుర సుమతీ!!

నిజంగా తల్లిదండ్రులకు పుత్రోత్సాహానికి మించిన ఆనందం ఏముంటుంది. కళ్లముందే కొడుకు కీర్తిస్తుంటే ఆ కన్నమనసులు పొంగిపోతాయి. ఇటీవల టీవీ నటుడు ప్రభాకర్ కొడుకు చంద్రహాస్‌ని హీరోగా పరిచయం చేస్తూ మీడియా సమావేశం నిర్వహించారు. ఈ మీడియా సమావేశంలో ప్రభాకర్ భార్య మలయజ తన కొడుకుని హీరోగా పరిచయం చేయడం తనకి అసలైన పుత్రోత్సాహం అని పొంగిపోయింది. అయితే ప్రభాకర్ మాత్రం చాలా మెచ్యూర్డ్‌గా మాట్లాడారు. హీరోగా అయినంత మాత్రాన గొప్ప విషయం కాదు.. సక్సెస్ కావడం గొప్ప అని మాట్లాడారు.

అయితే ఈ ప్రెస్ మీట్‌లో ప్రభాకర్ కొడుకు ప్రవర్తన అన్ మెచ్యూర్డ్‌గా అనిపించింది. మాటి మాటికీ చుట్టు ఎగరేయడం.. జేబులో చేతులుపెట్టుకుని అటూ ఇటూ చూస్తూ స్టైల్ చేస్తూ తన యాటిట్యూడ్ చూపించడంతో.. వీడెవడ్రా బాబూ ఇంత ఓవరాక్షన్ చేస్తున్నాడనుకున్నారంతా.

అయితే చంద్రహాస్ యాటిట్యూడ్ ట్రోలింగ్ రాయుళ్లకు ఫుల్ కంటెంట్ అయ్యింది. ఇతన్ని ఇష్టం వచ్చిన రీతిలో దారుణంగా ట్రోల్ చేసిపారేశారు. యాటిట్యూడ్ స్టార్.. నిబ్బా స్టార్.. అంటూ పేర్లు పెట్టి.. మనోడిని పాపులర్ చేసి పారేశారు. దీంతో ప్రభాకర్ కొడుకు చంద్రహాస్ ఒక్కసారిగా ఫేమస్ అయిపోయాడు. అయితే మంచిగా అయితే బాగానే ఉండేది కానీ.. ట్రోలింగ్ రూపంలో పాపులర్ కావడంపై ప్రభాకర్ కూడా హర్ట్ అయ్యారు.

తన కొడుకుపై వస్తున్న ట్రోల్స్‌పై హుందాగా స్పందిస్తూ.. తన కొడుకుది చిన్న వయసు అని.. ముందు ముందు మీడియా ముందు.. అభిమానులు ముందు ఎలా మాట్లాడాలో ఎలా ఉండాలో నేర్చుకుంటాడని.. ఈరోజు అతను నిలబడే పద్దతిని విమర్శించిన వాళ్లే అతని యాక్టింగ్ స్కిల్స్ నచ్చితే మెచ్చుకుంటారని అన్నారు. ఏదో విధంగా పాపులర్ అయ్యాడులే అని ట్రోలింగ్‌పై స్పందించారు ప్రభాకర్. అయితే కొడుకుతో కలిసి ఆదివారం నాడు క్రికెట్ మ్యాచ్‌కి వెళ్లడా.. ఆ ఫొటోలను సోషల్ మీడియాలో షేర్ చేయగా దానిపై కూడా ట్రోలింగ్ నడుస్తోంది.