Intinti Gruhalakshmi: గృహలక్ష్మి సీరియల్ నటుడుకి కరోనా పాజిటివ్.. టీవీ పరిశ్రమలో కలకలం

లాక్ డౌన్ ప్రభావంతో తీవ్ర సంక్షోభాన్ని ఎదుర్కొన్న టీవీ పరిశ్రమను కరోనా మహమ్మారి మరోమారు కోలుకోలేని దెబ్బ కొట్టింది. లాక్ డౌన్ అనంతరం ఇప్పుడిప్పుడే తిరిగి షూటింగ్‌లు ప్రారంభం కాగా.. షూటింగ్ స్పాట్‌లలో కరోనా విజృంభిస్తుడటం టీవీ పరిశ్రమలో కలకలం రేగుతోంది. ఇటీవల సీరియల్ నటుడు ప్రభాకర్‌కు (ఈటీవీ ప్రభాకర్ కాదు) కరోనా పాజిటివ్ నిర్ధారణ కాగా.. బెంబేలెత్తిపోయారు టీవీ ఆర్టిస్టులు.

తాజాగా మరో సీరియల్‌ నటుడు హరికృష్ణకు కరోనా పాజిటివ్‌గా అని తేలింది. హరికృష్ణ ప్రస్తుతం గృహలక్ష్మీ సీరియల్‌లో‌ నటిస్తున్నాడు. కాగా హరికృష్ణకు కరోనా పాజిటివ్ అని తేలడంతో యూనిట్ షూటింగ్‌ను రద్దు చేసింది. నేటి నుంచి గృహలక్ష్మీ సీరియల్‌ షూటింగ్‌ని నిలిపివేసి.. హరికృష్ణతో కాంటాక్ట్ అయిన వాళ్లను టెస్ట్‌లకు పంపించారు. అయితే హరికృష్ణ.. ఇటీవల కరోనా సోకిన ప్రభాకర్‌తో కాంటాక్ట్ అయ్యాడు. ఇతనితో పాటు మరో 33 మంది ప్రభాకర్‌తో కాంటాక్ట్ అయినట్టు తెలుస్తోంది. అయితే ఆ రిపోర్టులు రాకుండానే షూటింగ్‌లకు హాజరుకావడంతో హరికృష్ణ కరోనా బారిన పడటానికి కారణంగా తెలుస్తోంది.

లాక్ డౌన్ లో సడలింపు నేపథ్యంలో సినిమా ,టీవీ రంగాలకు షూటింగ్లకు అనుమతిస్తూ ప్రభుత్వం ఆదేశాలు జారీ చేసింది. జూన్ 15 తరవాత నుంచి సినిమా, టీవీ షూటింగ్‌లు తిరిగి ప్రారంభమయ్యాయి. అయితే తప్పనిసరిగా కొవిడ్ నిబంధనలు పాటించాలని ఆదేశించింది ప్రభుత్వం. ప్రతి షూటింగ్ స్పాట్ లో 40 మంది కంటే మించి ఉండకూడదని నిబంధనల్ని మార్గదర్శకాల్ని విడుదల చేసింది. దీంతో పాటుగా షూటింగ్ కి వచ్చి వెళ్ళేటప్పుడు తప్పనిసరిగా థర్మల్ స్క్రీనింగ్ పరీక్షలు నిర్వహించాలని కూడా పేర్కొంది. అంతేకాకుండా టెంపరేచర్ ఎప్పటికప్పుడు పరిశీలించాలని , ఆర్టిస్టులు సొంతంగా మేకప్ వేసుకొని రావాలని ఆదేశించింది. వంటశాలలు కూడా నీటిగా పెట్టాలని, మాస్కులు ప్రతి ఒక్కరూ వాడే విధంగా చూడాలని ఆదేశించింది. అయితే ఈ నిబంధనల్ని సరిగా పాటించకపోవడంతో ఆర్టిస్టులు కరోనా బారిన పడుతున్నారు.