కష్టాల్లో ఉన్న నన్ను ‘జబర్దస్త్’కు తీసుకెళ్లింది ఆయనే: నెమలి రాజు

ప్రస్తుతం టీవీలో కామెడీ షో అంటే తెలుగు ప్రేక్షకులకు ముందుగా గుర్తొచ్చేది ‘జబర్దస్త్’. వారానికి రెండు రోజులు టీవీలో ప్రసారమయ్యే ఈ షో ప్రేక్షకులను కడుపుబ్బా నవ్విస్తోంది. ఇక యూట్యూబ్‌లో అయితే ప్రతిరోజూ నవ్వులే. ఇలాంటి షోలో భాగం కావాలని చాలా మంది ఔత్సాహికులు ప్రయత్నిస్తున్నారు. కానీ, అవకాశమనేది కొందరినే వరిస్తుంది కదా! అలా అవకాశం పొందిన ఆర్టిస్టుల్లో నెమలి రాజు ఒకరు. ఇటీవల రాకింగ్ రాకేష్ టీమ్‌లో చేరిన ఈ మరగుజ్జు కమెడియన్ ‘జబర్దస్త్’లో నవ్వులు పువ్వులు పూయిస్తున్నాడు. ఇప్పటికే రాకేష్ టీమ్‌లో ఉన్న మరో మరగుజ్జు ఆర్టిస్ట్ నరేష్‌ను డామినేట్ చేస్తూ కామెడీని పండిస్తున్నాడు.

అయితే, పేద వ్యవసాయ కుటుంబానికి చెందిన నెమలి రాజు తాను ‘జబర్దస్త్’లోకి అడుగుపెట్టడంపై ఇటీవల మాట్లాడాడు. ఇప్పుడు ఆ వీడియో ఇంటర్నెట్‌లో వైరల్‌గా మారింది. ఈ వీడియోలో నెమలి రాజు వెల్లడించి వివరాల ప్రకారం.. అతని స్వస్థలం ప్రకాశం జిల్లా పొదిలి మండలం జువ్వలేరు గ్రామం. తండ్రి వ్యవసాయ కూలీ. కొంచెం పొలం కూడా ఉంది. కాకపోతే, సాగునీటి సౌకర్యం లేదు. వర్షం పడితే కానీ పంట వేసుకోలేరు. ఆర్థికంగా ఇబ్బందులు తలెత్తడంతో కుటుంబంతో విజయవాడకు వలస వెళ్లారు. అక్కడ నెమలి రాజు తండ్రి ముఠా పని చేస్తున్నారు. ఈ ఆదాయం కూడా కుటుంబ పోషణకు సరిపోయేది కాదు.

ఆయన వల్లే నెమలి రాజు జబర్దస్త్‌లోకి..
విజయవాడలో ఒకరోజు ఢీ జోడి ఆడిషన్స్ జరుగుతున్నాయి. ఈ విషయం తెలుసుకున్న నెమలి రాజు అక్కడికి వెళ్లాడు. ప్రస్తుతం పటాస్, జబర్దస్త్ షోలకు రచయితగా పనిచేస్తోన్న రాజ్ కుమార్.. రాజును చూసి ఆకర్షితుడయ్యారు. ఆయనే రాజును జబర్దస్త్‌లోకి తీసుకొచ్చారు. తాను ఈ స్థాయిలో ఉన్నానంటే దానికి రైటర్ రాజ్ కుమారే కారణమని, ఆయనకి రుణపడి ఉంటానని నెమలి రాజు అంటున్నాడు. ఒకప్పుడు తానెవరినో ఎవరికీ తెలీదని, ఇప్పుడు తన లైఫ్‌స్టైల్ మారిందని నెమలి రాజు చెప్పాడు. ఇప్పుడు అందరూ గుర్తుపడుతున్నారని, సెల్ఫీలు దిగుతున్నారని ఆనందంగా వెల్లడించారు. ఇక తనకు ఆర్థిక ఇబ్బందులు తీరినట్టేనని అన్నాడు.