Jabardasth: ప్రోమో కోసం అనసూయ ఇలా చేస్తుందా? వాళ్ల ఆయన చెక్ బుక్ కహానీ.. గాలి తీసేసిన రోజా

తెలుగు రానీ యాంకర్.. ఎందుకు నవ్వుతారో తెలియని జడ్జీలు.. ఎప్పుడు కామెడీ చేస్తారో తెలియని టీం లీడర్లు.. కలిసి చేసే వినూత్న కార్యక్రమమే ఇది.. హ హ!! రాకెట్ రాఘవ నవ్వుతూ చెప్పినా అతను చెప్పింది జబర్దస్త్ నిజం. తాజా ప్రోమోలో రాకెట్ రాఘవ వేసిన పంచ్‌ గుచ్చుకోవల్సిన వాళ్లకి గట్టిగానే గుచ్చుకునేట్టు ఉంది.

జబర్దస్త్ కామెడీ షో అంతగా క్లిక్ కావడానికి పొట్టచెక్కలు చేసే స్కిట్లతో పాటు ఆ షో యాంకర్ అనసూయ.. జడ్జీ రోజా కూడా. ఏదో చేశాం అంటే చేశాం అన్నట్టుగా కాకుండా ఈ ఇద్దరూ కూడా స్కిట్లలో ఇన్వాల్వ్ అవుతూ నవ్వులు కురిపిస్తుంటారు. ఇక అనసూయ యాంకరింగ్‌తో పాటు ఆమె గ్లామర్ షో చూడటం కోసం జబర్దస్త్‌ని చేసేవాళ్లు చాలామందే ఉంటారు. అదేం ఆరబోత బాబోయ్ అనేవాళ్లు కొందరైతే.. అనసూయ లేకుండా జబర్దస్త్ కళ తప్పినట్టే ఉంటుంది అనే వాళ్లు ఉన్నారు.

ప్రతివారం జబర్దస్త్ కామెడీ షోలో ఒక ఇంట్రో సాంగ్‌తో ఎంట్రీ ఇచ్చే అనసూయ.. అందాలు అదరహో అన్నట్టుగానే పెర్ఫామెన్స్ ఇస్తూ ఉంటుంది. ఇక ఆమెను యాంకర్‌గానే కాకుండా స్కిట్స్‌లోనూ ప్రాధాన్యత కల్పిస్తూ ఉంటారు. ఇక ఎపిసోడ్ ప్రోమోల్లో సైతం అనసూయ మస్ట్ అనేట్టుగానే ప్రోమో కట్ చేస్తుంటారు.

తాజాగా వచ్చేవారానికి సంబంధించిన ప్రోమోను విడుదల చేయగా.. ఇందులో అనసూయపై రోజా వేసిన పంచ్ హైలైట్ అయ్యింది. జబర్దస్త్‌లో బూతు స్కిట్‌లకు కేరాఫ్ అడ్రస్ అయిన హైపర్ ఆది స్కిట్‌లో కనిపించారు రోజా. ‘మేం ఇద్దరం .. నా పేరు రంగడు.. వీడి పేరు *** అంటూ బూతు సైగలు చేస్తూ.. పేరేం పెట్టలేదండీ బాబూ అంటూ తన పైత్యం చూపించాడు ఆది. ఇతను బూతు పంచ్ రోజాకి అర్థం కావడంతో తెగ ఇకిలించేశారు ఎప్పటిలాగే.

రాజా సినిమాలో సౌందర్య ఇంటిలోకి వెంకటేష్, సుధాకర్ దొంగతనం చేయడానికి వెళ్లడం.. అక్కడ సౌందర్య వాళ్లని లోపలి పెట్టి తాళం వేయడం.. కాన్సెప్ట్‌లో ఈ స్కిట్ చేయగా.. ఇందులో రోజా సౌందర్య అన్నమాట. ఏదో ఒకరాగం పాటతో పాటు రాజా క్లైమాక్స్ సీన్ కూడా చేసి చూపించి నవ్వులు పూయించారు రోజా.

ఇక అదిరే అభి స్కిట్‌లో.. నీకు అన్ని బుక్‌లలోకెల్లా ఏ బుక్ అంటే ఇష్టం అని అనసూయను అడిగాడు అభి. మా ఆయన కనిపించడం లేదు కానీ.. ఆయన చెక్ బుక్ అంటే ఇష్టం అని తెగ సిగ్గుపడిపోతూ చెప్పింది అనసూయ. ఇంత సంపాదిస్తుంది కానీ మళ్లీ వీళ్ల ఆయన చెక్ బుక్‌ మీదే కన్ను అని అభి అనడంతో.. రోజా కల్పించుకుని ‘ఊరికే.. ప్రోమో కోసం అలా అంటుంది.. మొత్తం క్యాష్ ఆవిడ దగ్గరే ఉంటుంది’ అంటూ అనసూయ గాలి తీసేసే పంచ్ వేశారు రోజా. దీంతో అనసూయ.. అయ్యో అంటూ ముఖానికి అడ్డంగా చేతులు పెట్టుకుని తెగ నవ్వుకుంది.

ఆ తరువాత ఇమ్మానుయేల్ తన పంచ్‌లతో మరోసారి నవ్వించాడు.. భూమిలో కొట్టినంత మేకంత లేవు.. ఎగిరెగిరి కొడుతున్నావేంటే.. నీకు బీపీ కాదే బీపీ మిషన్ అంత ఉన్నావ్.. అంటూ వరస పంచ్‌లు వేశాడు. జబర్దస్త్ లేటెస్ట్ ప్రోమోపై మీరూ ఓ లుక్కేయండి.