Rocking rakesh: పెళ్లి బంధంతో జంటగా మారిన రాకింగ్ రాకేష్ - జోర్దార్ సుజాత‌

Rocking Rakesh - Jordar Sujatha: జబర్దస్త్ కమెడియన్‌గా (Jabardasth Comedian) గుర్తింపు పొందిన రాకింగ్ రాకేష్ త‌న ప్రేయ‌సి జోర్దార్ సుజాత‌ను శుక్ర‌వారం రోజున వివాహం చేసుకున్నారు. తిరుమ‌ల‌లో వీరి పెళ్లి జ‌రిగింది. వారి పెళ్లి ఫొటోలు నెట్టింట వైరల్ అవుతున్నాయి. బుల్లి తెరపై కామెడీ షో జబర్దస్త్ ఎంత పెద్ద స‌క్సెస్ అయ్యిందో ప్రత్యేకంగా చెప్ప‌న‌క్క‌ర్లేదు. ఆ షోలో కంటెస్టెంట్‌గా కెరీర్ స్టార్ట్ చేసిన రాకింగ్ రాకేష్ త‌ర్వాత టీమ్ లీడ్‌గా మారారు. త‌న‌కంటూ ఓ ప్ర‌త్యేక‌మైన గుర్తింపును సంపాదించుకున్నారు. త్వ‌ర‌లోనే ఈయ‌న హీరోగానూ ప్రేక్ష‌కుల‌ను అలరించ‌టానికి సిద్ధ‌మ‌వుతున్నారు.

రాకింగ్ రాకేష్ కొన్నాళ్ల నుంచి జోర్దార్ సుజాతతో ప్రేమ‌లో ఉన్నారు. ఆమెతో పాటు కొన్ని స్కిట్స్‌లో రాకేష్ క‌లిసి యాక్ట్ చేశారు. అప్ప‌టి నుంచి ఉన్న ప‌రిచ‌యం త‌ర్వాత ప్రేమ‌గా మారింది. కొన్నాళ్లు ముందు త‌మ ప్రేమ విష‌యాన్ని బ‌హిరంగంగానే చెప్పిన రాకేష్ పెళ్లి చేసుకోబోతున్న‌ట్లు తెలిపారు. ఫిబ్ర‌వ‌రి 24న వీరి పెళ్లి తిరుమ‌ల‌లో ఘ‌నంగా జ‌రిగింది. ఇప్పుడా పెళ్లి ఫొటోలు నెట్టింట వైర‌ల్ అవుతున్నాయి. వీరి పెళ్లికి ఏపీ మంత్రి రోజా, ఆమె భర్త సెల్వమణితో పాటు జ‌బ‌ర్ద‌స్ నుంచి చాలా మంది క‌మెడియ‌న్స్ హాజ‌రై యువ జంటను ఆశీర్వ‌దించారు.

త‌మ‌కు లైఫ్ ఇచ్చిన జ‌బ‌ర్ద‌స్త్ వేదిక‌పైనే రాకేష్‌, జోర్దార్ సుజాత‌లు ప్రేమ‌లో ఉన్న‌ట్లు తెలిపారు. అయితే జ‌బ‌ర్ద‌స్త్‌లో మ‌న‌కు జంట‌గా క‌నిపిస్తూ ఇద్ద‌రి మ‌ధ్య ఏదో ఉందంటూ అనుమానం క‌లిగించేలా న‌టీన‌టులు న‌వ్విస్తుంటారు. దీంతో రాకేష్‌, సుజాత మ‌ధ్య కూడా అలాంటి ప్రేమే ఉంటుంద‌ని భావించారు. కానీ వీరిద్ద‌రూ సీరియ‌స్‌గానే ల‌వ్‌లో ఉన్నార‌ని తర్వాత అర్థ‌మైంది. ఇద్దరూ కుటుంబ స‌భ్యుల‌ను ఒప్పించి పెళ్లి చేసుకున్నారు. రాకేష్‌, సుజాత‌ల‌కు నెటిజ‌న్స్ అభినంద‌న‌లు తెలియ‌జేస్తున్నారు.

• Read latest Tollywood updates and Telugu News