ఆసుపత్రికి వెళ్దాం అత్తగారు
రాధకు నీవేరా ప్రాణం ఈ రోజు రాత్రి ప్రసారం కాబోయే ఎపిసోడ్లో కార్తిక్ గదిలోకి వెళ్తుంది రాధిక. అక్కడున్న ఫొటో ఫ్రేమ్ దగ్గరికి వెళ్లి సరిగ్గా చూసే టైమ్లో 'కార్తిక్' అని ధర్మావతి గట్టిగా అరుస్తుంది. దీంతో రాధిక వెంటనే కిందకు వెళ్తుంది. ఏం కాదు నువ్వు భయపడకు.. నేను చెబుతున్నాను కదా అని కార్తిక్ తండ్రి ధర్మావతిని ఓదారుస్తూ ఉంటాడు. ఏమైంది సార్ వారికి ఏమైంది.. అని రాధిక కంగారు పడుతుంది. కార్తిక్కు ఏం కాలేదమ్మా మీరంతా టెన్షన్ పడకండి .. అని కార్తిక్ తండ్రి అంటాడు. లేదు అంకుల్ సార్ వారికి ఏదో అయింది.. లేకపోతే అత్తగారు ఇంతలా టెన్షన్ పడరు.. చెప్పండి.. సార్ వారికి ఏమైందో చెప్పండి.. ప్లీజ్ చెప్పండి.. అని రాధిక అడుగుతుంది. నీ మీద పగబట్టి తిరుగుతున్న రౌడీలను పట్టుకోవడానికి కార్తిక్ వెళ్లాడు.. వాడేమో కార్తిక్ తల మీద రాడ్తో కొట్టాడు.. అని వంకిత చెబుతుంది. అయ్యో కృష్ణ.. అంకుల్.. సార్ వారికి ఎలా ఉందంట.. సార్ వారికి ఎలా ఉంది.. అని రాధిక కన్నీళ్లు పెట్టుకుంటుంది. ట్రీట్మెంట్ కోసం కార్తిక్ను హాస్పిటల్కు తీసుకువెళ్లామని కానిస్టేబుల్ చెప్పాడు.. అని కార్తిక్ తండ్రి అంటాడు. అయ్యో సార్ వారికి ఎలా ఉందో ఏంటో.. మనం ఆసుపత్రికి వెళ్దాం పదండి.. అత్తగారు వెళ్దాం రండి.. అని రాధిక అంటుంది. అమ్మా టెన్షన్ పడాల్సిన అవసరం ఏం లేదు.. అరగంటలో ఇంటికి వచ్చేస్తున్నామని నారాయణ చెప్పాడమ్మా.. అని కార్తిక్ తండ్రి చెబుతాడు. నా కొడుకును కళ్లారా చూస్తేనే కానీ నా ప్రాణం కుదుటపడదు.. అని ధర్మావతి ఏడుస్తుంది. ధర్మా.. ఇంటికి వచ్చేస్తామని చెప్పారు కదా.. వచ్చేస్తారు కంగారు పడకు.. అని భర్త ఓదారుస్తాడు.
సార్ వారితో మాట్లాడాలి
అసలు ఇదంతా నా వల్లే.. ఆ దండపాణి గాడు నా మీద కోపం సార్ వారి మీద చూపించాడు.. అనవసరంగా వాడి బొమ్మ గీశాను.. ఆ దొంగ సచ్చినోడు నన్ను చంపినా ఫర్వాలేదు.. కానీ దేవుడి లాంటి సార్ వారి మీద దాడి చేయడానికి వాడికి చేతులు ఎలా వచ్చాయ్.. వాడి కాళ్లూ చేతులు చెరుకు మిషెన్లో పడిపోను.. అంటూ రాధిక శాపనార్థాలు పెడుతూ ఏడుస్తుంది. అమ్మా కార్తిక్కు ఏమీ కాలేదు.. నువ్వు ఏడవకు.. అని కార్తిక్ తండ్రి చెబుతాడు. లేదు అంకుల్.. సార్ వారితో నేను మాట్లాడాలి.. ఆయన మాట నేను వినాలి.. అప్పుడే నేను ప్రశాంతంగా ఉండేది.. నేను అర్జెంట్గా సార్ వారితో మాట్లాడాలి.. అంటూ రాధిక తన గదికి వెళ్తుంది. వంకిత.. రక్త సంబంధం ఉన్నోళ్లే అంతా మామూలుగా ఉన్నారు.. కానీ ఈ అమ్మాయేంటి ఇంత ఓవరాక్షన్ చేస్తుంది.. అని తన భార్యతో ఓం బాబు అంటాడు. మాములుగా కాదండి.. పాత హీరోయిన్ల కంటే ఎక్కువే యాక్ట్ చేస్తుంది.. కార్తిక్ను మొగుడు అని స్ట్రాంగ్గా ఫిక్స్ అయిపోయినట్లు ఉంది.. అని వంకిత అంటుంది. వామ్మో.. ఈ పిల్ల కనుక కార్తిక్కు పెళ్లాం అయితే మనకు ప్లాట్ఫామ్యే గతి.. అని ఓం బాబు భయపడతాడు.
గుండెల్లో ఏదో తెలియని కలవరం
మరోవైపు కార్తిక్కు డాక్టర్ కట్టు కడుతూ ఉండగా కానిస్టేబుల్కు రాధిక ఫోన్ చేస్తుంది. నారాయణ.. నేనయ్యా సార్ వారి రాధికను.. సార్ వారితో మాట్లాడాలి ఒకసారి ఫోన్ ఇవ్వవా.. అని రాధిక అంటుంది. సార్కు ట్రీట్మెంట్ జరుగుతుంది.. ఇప్పుడు ఇవ్వడానికి కుదరదు.. అని నారాయణ అంటాడు. ఏవయ్యా నీది గుండెనా లేక బండా.. నువ్వు అసలు మనిషివేనా అంటూ తిట్ల దండకం అందుకుంటుంది.. దీంతో కానిస్టేబుల్ భయపడి ఫోన్ తీసుకెళ్లి కార్తిక్కు ఇస్తాడు. సర్ మీకు ఫోన్ వచ్చింది.. అని కానిస్టేబుల్ చెబితే ఎవరు.. అని కార్తిక్ అడుగుతాడు. మీ రాధిక సర్.. అని కానిస్టేబుల్ చెబితే నా రాధిక ఏంటి బుద్ధి లేకుండా.. అని కార్తిక్ ఫైర్ అవుతాడు. అంటే నా ఉద్దేశం.. మీ ఇంట్లో ఉంటున్న రాధిక అని.. కానిస్టేబుల్ అంటాడు. ఏడిశావులే ఆర్టిస్ట్ రాధిక అని చెప్పొచ్చుగా.. ఇలా ఇవ్వు.. హలో.. అని కార్తిక్ అంటాడు. సార్ వారు మీకు ఎలా ఉంది.. మీకు ఎలాంటి ప్రమాదం లేదు కదా.. క్షేమంగానే ఉన్నారు కదా.. అని రాధిక ఏడుస్తూ అడుగుతుంది. నేను బానే ఉన్నాను.. మీ మీద దాడి జరిగిందని తెలీగానే ఈ గుండెల్లో ఏదో తెలియని కలవరం.. ఆగిపోతుందేమో అన్న బాధ.. మీకు ఎలా ఉందో ఏంటో అని ప్రాణం విలవిలలాడిపోతుంది.. సార్ వారు.. అని రాధిక అంటుంది. రాధిక.. నేను క్షేమంగానే ఉన్నాను అని చెబుతున్నా కదా.. కాసేపట్లో ఇంటికి వస్తున్నాను.. అమ్మను టెన్షన్ పడకుండా ప్రశాంతంగా ఉండమని చెప్పు.. అని కార్తిక్ అంటాడు. అలాగే సార్ వారు.. జాగ్రత్త.. అని రాధిక ఫోన్ కట్ చేస్తుంది.
సార్ వారే నన్ను ప్రేమిస్తున్నారు
ఇంతలో రాధిక కిందకు వచ్చి కృష్ణుడి బొమ్మతో మాట్లాడుతుంది. ఏమయ్యా కృష్ణయ్యా.. నీకు మనుషులతోటి మనసుల తోటి ఆడుకోవడమంటే చాలా సరదా కదా.. ఆనందాలు అన్నీ ఇచ్చినట్లే ఇస్తావ్.. వెంటనే కన్నీళ్లు ఉన్నాయని గుర్తు చేస్తావ్.. సార్ వారిని చూసిన ప్రతిసారి నా గుండె ఆగకుండా కొట్టుకుంది.. సార్ వారికి నా గుండెకు ఏదో సంబంధం ఉందని ఆ క్షణమే నాకు అర్థమైంది.. నాకు తెలీకుండానే ప్రేమ మొదలైంది.. నిన్ను వేడుకుంటే సార్ వారిని మా ఇంటికొచ్చేలా చేశావ్.. మా ప్రేమ నిండు నూరేళ్లు సాగబోతుంది అనడానకి అదే నిదర్శనం అనుకొని పొంగిపోయాను.. ఇంతలో సార్ వారికి ఇలా చేసి మమ్మల్ని బాధపెట్టడం నీకు ఏమైనా ధర్మమా చెప్పు.. అని రాధిక అంటుంది. ఇదంతా ఓం బాబు వినేస్తాడు. అయ్యో ప్రమాదంలో ఉన్నావని ఇంటికి తీసుకువస్తే మా అల్లుడినే ప్రేమిస్తున్నావా.. ఏకంగా ఈ ఇంటికే ఎసరు పెట్టావా.. అని ఓం బాబు అరుస్తాడు. ఏయ్ ఎసరు లేదు, తాలింపు లేదు.. ఊరుకో బాబాయ్.. నీకు ఒక సీక్రెట్ చెప్తాను ఎవరికీ చెప్పకు.. సార్ వారిని నేను ప్రేమించడం కాదు.. సార్ వారే నన్ను గాఢంగా ప్రేమిస్తున్నారు.. అని రాధిక అంటుంది. ఏంటి కార్తిక్ నిన్ను ప్రేమిస్తున్నాడా.. అని ఓం బాబు షాకవుతాడు. లేకపోతే ఆయనే స్వయంగా బండి ఎక్కించుకొని ఇక్కడికి ఎందుకు తీసుకువస్తారు.. నీకు జుట్టు పెరిగింది కానీ బుర్ర పెరగడం లేదు బాబాయ్.. కొంచెం మోకాలికి సాన పెట్టు.. అని రాధిక వెళ్లిపోతుంది.
రాధిక అడ్రెస్ తెలుసుకున్న కాంచనవల్లి
ఈ విషయాన్ని వెంటనే కాంచనవల్లికి చెప్పాలని ఓం బాబు బయటకు వెళ్తాడు. ఏంటి ఓం బాబు ఎందుకంత టెన్షన్ పడుతున్నావ్.. అని కాంచనవల్లి అడుగుతుంది. వదిన.. మనం ఒకటి ఊహించుకుంటుంటే రివర్స్లో ఇంకోటి జరుగుతుంది.. ఆ కార్తిక్ కృష్ణ.. రాధికను ప్రేమిస్తున్నాడంట.. అని ఓం బాబు అంటాడు. నీకు ఏమైనా పిచ్చా.. కార్తిక్ను పెళ్లి చేసుకోమని వాళ్ల అమ్మ ఏడుస్తున్నా ఒప్పుకోని వాడు ఆ పిల్లను ఎలా ప్రేమిస్తాడు.. అని కాంచనవల్లి షాకవుతుంది. వదిన ప్రేమ పుట్టడానికి ఒక్క క్షణం చాలు.. రాధికను కార్తిక్ ప్రేమిస్తున్నాడన్నది అక్షరాలా నిజం వదినాయ్.. అంటాడు ఓం బాబు. అంత బలంగా ఎలా చెప్తున్నావ్.. అని కాంచనవల్లి ప్రశ్నిస్తుంది. ఎందుకంటే ఈ విషయాన్ని ఆ రాధికే బలంగా చెప్పింది.. ఇప్పుడు ఏదైనా చెయ్యకపోతే పరిస్థితులు చేయి దాటిపోతాయ్ వదినాయ్.. అని ఓం బాబు అంటాడు. నా కూతురు ప్రాణాలు పోవడానికి కారణమైన ఆ కార్తిక్ను జీవితంలో సంతోషంగా ఉండనిస్తానా.. వాడు ప్రేమించి, పెళ్లి చేసుకుంటే చూస్తూ ఊరుకుంటానా.. అంటుంది కాంచనవల్లి. ఆ రాధిక అసలే ఖతర్నాక్ పిల్ల వదినాయ్.. ఈ ప్రేమను వెంటనే చంపేయలేదనుకో మనకు ఇబ్బంది.. అని ఓం బాబు చెబుతాడు. ఆ పిల్ల ఇంటి అడ్రెస్ తెలుసా.. అని కాంచనవల్లి అడుగుతుంది. ఆ తెలుసు.. ఇప్పుడే మెసేజ్ చేస్తా ఉండు.. అవును అడ్రెస్ ఎందుకు.. అని ఓం బాబు అడుగుతాడు. ఎందుకో, ఎటు వైపు నుంచి నరుక్కొస్తానో నువ్వే చూస్తావ్ కదా.. అని కాంచనవల్లి అంటుంది. త్వరగా నరికేయ్ వదినా.. అని ఓం బాబు రెచ్చగొడతాడు.
రాధిక చెంప పగలగొట్టిన కార్తిక్
ఇక సీన్ కట్ చేస్తే కార్తిక్ ఇంటికి వస్తాడు. కార్తిక్.. అయ్యయ్యో తలకు ఇంత పెద్ద దెబ్బ తగిలితే కనీసం హాస్పిటల్కు కూడా రావద్దు అంటావా.. ఏంటి నాన్నా ఇది.. అని ధర్మావతి ఏడుస్తుంది. ఇంతలో మేడపై నుంచి దిగుతూనే పరిగెత్తుకు వచ్చి సార్ వారు.. అంటూ కార్తిక్ను గట్టిగా పట్టుకొని ఏడుస్తుంది రాధిక. కార్తిక్ కూడా ఒక్క నిమిషం ఆగిపోయి అలానే ఉండిపోతాడు.. కానీ ఇంట్లో వాళ్లంతా మాత్రం షాకై అలా చూస్తూ ఉంటారు.. ఇంత మంది ఉన్నా కానీ ఎంత ధైర్యంగా హగ్ చేసుకుందో చూడు.. అని ఓం బాబు తన భార్యతో అంటాడు. అందుకే అంటారు ప్రేమ గుడ్డిది, చెవిటిది అని.. అని వంకిత అంటుంది. రాధిక లే.. రాధిక చెప్పేది నీకే.. వదలమని చెప్తుంటే అర్థం కావట్లేదా.. అని రాధికను లాగి చెంప మీద కొడతాడు కార్తిక్. ఓరి నాయనో ఏంటి ఈ షాక్.. కార్తిక్ తనను ఘాటుగా ప్రేమిస్తున్నాడు అని ఆ పిల్ల చెప్పింది కదా.. మరి వీడేంటి చెంప పగిలేలా వాయించాడు.. అని ఓం బాబు షాకవుతాడు. కార్తిక్ పిచ్చిగానీ పట్టిందా నీకు.. ఇంటికి వచ్చిన ఆడపిల్ల మీద చేయి చేసుకోవడమేంటిరా.. బుద్ధి లేకుండా.. నువ్వే నీ సంస్కారాన్ని ఇలా చంపేసుకోవడమేంటిరా.. అని ధర్మావతి అరుస్తుంది. అమ్మా నేను ఇలా ఎందుకు ప్రవర్తించానో నాకు తెలుసు, నా మనసుకు తెలుసు.. అని కార్తిక్ అంటాడు. ఏంట్రా నీ మనసుకు తెలిసేది.. అయినా తను ఏ తప్పు చేసిందని చేయి చేసుకోవడానికి.. అని ధర్మావతి అడుగుతుంది.
ఆలోచించాను కాబట్టే కొట్టాను
అమ్మా నువ్వు ఉండు.. ప్లీజ్.. అని కార్తిక్ అంటాడు. చూడు రాధిక.. నిన్ను ఇక్కడికి ఎందుకు తీసుకువచ్చాను.. ఎలాంటి పరిస్థితుల్లో తీసుకువచ్చానో నీకు తెలుసు.. నువ్వు నా మనిషివి కాదు.. మా ఇంటి మనిషివి అంతకన్నా కాదు.. నీకు ప్రాణ భయం ఉందన్న ఒకే ఒక బాధ్యతతో ఇక్కడికి తీసుకువచ్చాను.. ఈ విషయాన్ని నువ్వు ప్రతి క్షణం గుర్తుపెట్టుకోవడం చాలా అవసరం.. నీ హద్దులో నువ్వు ఉండటం ఇంకా అవసరం.. ఇలా పరిధి దాటి ప్రవర్తిస్తే నాకు అసహ్యం.. అని కార్తిక్ అంటాడు. అంటే ఏంట్రా.. నువ్వు చేస్తే బాధ్యత.. తను చేస్తే తప్పా.. అని ధర్మావతి ప్రశ్నిస్తుంది. నువ్వు ఏమంటున్నావో నాకు అర్థం కావట్లేదమ్మా.. అని కార్తిక్ అంటాడు. నీ కారణంగా రాధిక ప్రాణాలకు హాని కలగకూడదు అని నువ్వు ఇంటికి తీసుకువచ్చావ్.. అలాగే తన మీద పగ కారణంగా నీ మీద దాడి జరిగిందన్న బాధతో రాధిక నిన్ను పట్టుకుంది.. అది అర్థం చేసుకోకుండా తను ఏదో కావాలని చేసినట్లు మాట్లాడుతున్నావా.. హద్దు మీరి ప్రవర్తించిందని చెంప మీద కొడతావా.. అందరి ముందు చేయిచేసుకుంటే ఆడపిల్ల మనసు గాయపడుతుందని, అవమానపడుతుందని ఆలోచించవా నువ్వు.. అని ధర్మావతి ప్రశ్నిస్తుంది. ఆడపిల్ల అని ఆలోచించాను కాబట్టే.. ఆడపిల్ల భవిష్యత్తు అని అర్థం చేసుకున్నాను కనుకే భయపడ్డాను.. రేపు నలుగురిలో తను ఎలాంటి నిందలు పడకూడదని ఆలోచించాను కాబట్టే నాలుగు గోడల మధ్య చెంప దెబ్బతో తనకు అర్థమయ్యేలా చెప్పాను.. అని కార్తిక్ అంటాడు.
నాకు తెలీకుండానే జరిగిపోయింది
నలుగురిలో నిందలేంటిరా.. అని ధర్మావతి అడుగుతుంది. తను నాతో ఇలా చనువుగా ఉంటే పది మంది పది రకాలుగా చెవులు కొరుక్కుంటారు.. నా కారణంగా ఒక ఆడపిల్ల మాట పడినా, బాధ పడినా నాకు అంతకన్నా బాధ ఇంకోటి ఉండదమ్మా.. రాధిక మన ఇంటికి నవ్వుతూ వచ్చింది.. వెళ్లేటప్పుడు కూడా అలానే నవ్వుతూ వెళ్లాలి.. అంతే తప్ప ఏ నిందా మోసుకుంటూ వెళ్లకూడదు.. అని కార్తిక్ అంటాడు. సార్ వారు మీ మీద దాడి జరిగిందని తెలియగానే చాలా భయపడిపోయాను.. ఆ భయం తాలుకూ దడ గుండెల్లో అలాగే ఉండిపోయింది.. అందుకే ఆ భయంలో నాకు తెలీకుండానే నా ప్రమేయం లేకుండానే ఎవరో నన్ను తోసేసినట్లు మీ మీద పడిపోయాను.. మీరు కొట్టే వరకు నేను ఈ లోకంలో లేను.. నా కళ్ల ముందు ఏం జరుగుతుందో నాకు తెలియడం లేదు.. అని రాధిక ఏడుస్తూ చెబుతుంది. చూడు రాధిక.. నా మాట, ప్రవర్తన ఏదైనా సరే నీ మంచి కోసమే.. అర్థం చేసుకో.. అని కార్తిక్ తన గదికి వెళ్లిపోతాడు. ఏంటమ్మా రాధిక.. నీకు తెలీకుండానే మా అల్లుడి మీద పడిపోయావా.. అని ఓం బాబు వెటకారంగా అంటాడు. ఓం బాబు.. నోరు ముయ్.. అని ధర్మావతి అరుస్తుంది. ఇక్కడితో నేటి ఎపిసోడ్ ముగిసింది.. మళ్లీ రేపటి ఎపిసోడ్తో కలుద్దాం.
(photo courtesy by Zee5 and Zee telugu)