Guppedantha Manasu డిసెంబర్ 6 ఎపిసోడ్: ఊహించని రచ్చ చేసిన దేవయాని.. ప్రేమజంటలో అలజడి..

గత ఎపిసోడ్‌లో రిషి, వసులు ధరణి, పుష్పలతో కలిసి ఉయ్యాల వెయ్యడానికి ప్రయత్నించడం తెలిసిందే. ఆ సమయంలోనే వసు రిషిపై పడిపోవడం, రొమాంటిక్ సీన్ పండటం ఓ ఎత్తు అయితే.. జగతిపై దేవయాని ఈర్ష్య మరో ఎత్తు. ఈ తరుణంలో వనభోజనాలు సీన్ చాలా ఉత్కంఠగా సాగుతోంది.

310వ ఎపిసోడ్‌ హైలైట్స్..
మొత్తానికీ రిషి తోటలో ఊయల వేస్తాడు. ధరణిని ఎక్కించి ఊయలను ఊపుతుంటాడు. ఇంతలో మినిస్టర్‌గారు వచ్చి.. అందరికీ గౌరవంగా నమస్కరించడంతో పాటు.. జగతిని ప్రత్యేకంగా పొగుడుతాడు. అది చూసి దేవయాని మరింతగా రగిలిపోతుంది. ఇంతలో ‘మీ అబ్బాయి రిషి రాలేదా’ అని మహేంద్రని మినిష్టర్‌గారు అడగడంతో.. ‘లేదండీ తోట చూడటానికి వెళ్లాడు ఇప్పుడే పిలుచుకుని వస్తాను’ అంటూ తోటవైపు పరుగుతీస్తాడు. అక్కడ రిషి, ధరణీని ఊయల ఊపడం చూసి.. వసుని అలానే ఊయల ఊపాలని ఊహించుకుని పొంగిపోతాడు. ఇక మహేంద్రని చూసిన వసు అయితే.. జగతిని మహేంద్ర ఊయల ఊపుతున్నట్లు ఊహించుకుని పొంగిపోతుంది.

ఇక కాసేపటికి రిషి, మినిస్టర్, మహేంద్ర అంతా కూర్చుని ఉన్న సమయంలో.. కాస్త దూరంగా వసు, పుష్పలు ఏదో మాట్లాడుకోవడం చూస్తాడు రిషి. వసు కంగారుగా ఎక్కడికో వెళ్లడం చూస్తాడు. వెనుకే వెళ్తాడు. ఆటో ఎక్కబోతున్న వసుని ఆపి.. ‘ఎక్కడికి అంటాడు. ‘సార్ అరటిఆకులు తేవడం మరిచిపోయారట.. నేను వెళ్లి తెచ్చేస్తాను’ అంటే.. నేను వస్తాను అని ఆటో ఎక్కుతాడు. మొత్తానికీ వసు, రిషిలు ఆటో తిరుగొస్తున్న సమయంలో వసుధర రిషితో.. ‘సార్ మీరు ఆటోలో రావడం ఏంటిసార్ వద్దు అన్నా వచ్చారు.. చూడండి మీరెంత ఇబ్బందిపడుతున్నారో’ అంటుంది. ‘వసుధరా నన్ను నువ్వు ఏం స్పెషల్‌గా చూడకు.. నేనే నీలానే’ అంటూ సద్దిచెబుతాడు. ఆ సమయంలోనే ఆటో కుదుపులకి ఇద్దరి భుజాలు టచ్ అవుతాయి. ఒక్కసారిగా ఇద్దరిలో అలజడి మొదలవుతుంది. ఆ సీన్ చాలా ఆసక్తిగా ఉంది.

ఇక మరోవైపు ధరణి, జగతి ఊయల ఎక్కి ఒకరిని ఒకరు ఊపుకుంటూ.. చాలా ఎంజాయ్ చేస్తూ ఉంటారు. ‘అత్తయ్యగారు ఇప్పుడు మీరు’ అంటూ జగతిని ఊయల్లో కూర్చోబెట్టి.. ధరణి ఊపుతుంది. అది చూసిన దేవయాని.. ‘ధరణీ.. ఇట్టు దాటగానే వళ్లు మరిచిపోయావా.. కొత్త స్నేహాలతో స్వేచ్ఛకు అలవాటు పడుతున్నావా.. నువ్వు కూడా అత్తింటితో గొడవ పడి దూరం అవ్వాలనేది నేర్చుకుంటున్నావా?’ అంటూ జగతికి చురకలు వేసే ప్రయత్నం చేస్తుంది. దాంతో జగతి కోసంగా.. ‘అక్కయ్యా అనవసరంగా మాటలు జారొద్దు.. ధరణి చిన్న పిల్ల కాదు ఒకరు చెబితే నేర్చుకోవడానికి.. తను తెలివైనదే.. మీ మీద ఉన్న గౌరవంతో అలా వినయంగా ఉంటోంది. దాన్ని మీరు నిలబెట్టుకోవడం నేర్చుకోండి.. అయినా ఇక్కడికి మనం అతిథులుగా వచ్చాం.. ఈ రచ్చ అవసరమా’ అంటూ గడ్డిపెడుతుంది. అప్పటికీ దేవయాని ఆగదు.

దూరం నుంచి ఆ సీన్ చూసిన మహేంద్ర ఫణీంద్రతో.. ‘అన్నయ్యా వదినా జగతి ఏదో గొడవ పడుతున్నట్లు అనిపిస్తోంది.. నేను వెళ్తాను’ అని వెళ్లబోతుంటే.. ‘మహేంద్ర నువ్వుఆగు.. నిన్ను చూస్తే దేవయాని ఆ గొడవని మరింత పెద్దది చేస్తుంది.. నేను వెళ్తాను’ అని ఫణీంద్ర వెళ్తాడు. జగతిపై ధరణిపై చాడీలు చెప్పే దేవయాన్ని తిడతాడు. ‘ఇక్కడ పరువు తియొద్దు దేవయానీ ప్లీజ్.. ఎవరు ఎలాంటి మాటలు మాట్లాడతారో నాకు బాగాతెలుసు.. దయచేసి ఆపండి’ అని గట్టిగా చెబుతాడు. మరిన్ని వివరాలు తరువాయి భాగంలో చూద్దాం! Guppedantha Manasu కొనసాగుతోంది.