Janaki Kalaganaledu జూలై 29 ఎపిసోడ్: జ్ఞానాంబ ఊహించని నిర్ణయం.. పెత్తనం మల్లికకు

జానకి, రామాలు చేసిన మోసాన్ని తట్టుకోలేకపోతుంది జ్ఞానాంబ. అయితే రామా.. తాను చేసింది తప్పే అని.. తన భార్య కంట కన్నీళ్లు రాకూడదని అమ్మ చెప్పిన మాటకు కట్టుబడే ఇలా చేసినట్టు సమర్ధించుకుంటాడు. నా కడుపు పుట్టినందుకు బాధపడుతున్నా అని జ్ఞానాంబ అనడంతో.. ఈ బతుకు తనకి వ్యర్ధం అనుకుని చనిపోవడానికి సిద్ధపడతాడు రామా. ఆ వెంటే జానకి కూడా.. తన భర్త లేని బతుకుకి అర్ధం లేదనుకుని ఇద్దరూ కలిసి ప్రాణ త్యాగానికి సిద్ధపడతారు. అయితే జ్ఞానాంబ పిలిచిన ఒక్క పిలుపుకి వీళ్లిద్దరికీ ప్రాణాపాయం తప్పుతుంది. ఇక ఈరోజు (జూలై 29) ఎపిసోడ్‌లో ఏమైందంటే.. జానకి రామాలతో పాటు తిరిగి ఇంటికి వచ్చిన జ్ఞానాంబ.. లోపలికి వెళ్లి తలుపులు వేసుకుంటుంది. ఎంతసేపటికీ బయటకు రాకపోవడంతో.. వెన్నెల, విష్ణు, అఖిల్, రామా, జానకిలు కంగారుపడుతుంటారు. గోవిందరాజులను వెళ్లి ఓదార్చమని చెప్తారు.

ఇంతలో జ్ఞానాంబ తలుపులు తీసుకుని బయటకు వస్తుంది. ఇక మల్లిక అయితే జ్ఞానాంబ ఏం చేయబోతుందో అని చికితా దగ్గర స్క్రీన్ ప్లే మొత్తం చెప్పేస్తుంది. జ్ఞానాంబ బయటకు వచ్చి.. జానకిని బయటకు పో అని అంటుంది చూడు అని అంటుంది. తీరా బయటకు వచ్చిన జ్ఞానాంబ.. ‘ఏం కొంపలు అంటుకునిపోయాయని అందరూ ఆ తలుపు వంక అలా చూస్తున్నారు.. నేను చనిపోయేటంత పిరికిదాన్ని కాదని మీకు ముందే చెప్పాను కదా..’ అని అంటుంది. ఇంతలో మల్లిక.. ‘మా భయానికి ఇంకొక కారణం కూడా ఉంది.. మీ నుంచి ఎలాంటి నిర్ణయం వినాల్సి వస్తుందో అని అందరి భయం.. వేడి వేడిగా ఉన్నప్పుడే టీ తాగేయాలి.. నిర్ణయం కూడా వేడి వేడిగా ఉన్నప్పుడే తీసుకోవాలి.. మీరు ఏ నిర్ణయం తీసుకున్నా కట్టుబడి ఉంటామ్.. చెప్పండి అత్తయ్య గారూ.. చెప్పండి’ అని అంటుంది మల్లిక.

దీంతో జ్ఞానాంబ.. తుస్ అనిపిస్తూ.. ‘రేపు వరలక్ష్మీ వ్రతం.. ప్రతి సంవత్సరం లాగే రేపు మనం పండగ చేసుకుంటున్నామ్.. అందుకు కావాల్సిన ఏర్పాట్లు చూడండి’ అని అంటుంది. ఈ పోలేరమ్మ ఏంటి? గెటౌట్ అంటుంది అంటే.. వరలక్ష్మీ వ్రతం.. వంకాయ పులుసు అంటుంది ఏంటి అని మల్లిక నోరెళ్లబెడుతుంది. అనుకున్నది ఒక్కటి అయినది ఒక్కటీ అని పని మనిషి చికితా మల్లికను ఓ ఆట ఆడుకుంటుంది.

అయితే పండగ వేడుకలో భాగంగా.. జానకికి ఊహించని షాక్ ఇస్తుంది జ్ఞానాంబ. ఇంటి కోడలుగా పండగ పెత్తనం మల్లికకు ఇస్తుంది. పూజను కోడలిగా నువ్వే జరిపించాలని మల్లికతో చెప్తుంది జ్ఞానాంబ. అత్త నుంచి ఆర్డర్స్ రావడంతో మల్లిక సంతోషానికి అవధులు ఉండవు.. తన ఓవరాక్షన్‌తో తెగ సంబరపడిపోతుంది. ‘అమ్మ అంటే బిడ్డల మీద నమ్మకంతో గర్వంతో పొంగిపోవాలి.. అంతేకానీ.. గుడ్డిగా నమ్మి అడుగడుగునా మోసపోయే పిచ్చిదాన్నిచేయొద్దు’ అంటూ రామా వినేట్టుగా అంటుంది జ్ఞానాంబ. మొత్తానికి జానకి, రామాలు ఇంట్లో ఉన్నాం అంటే ఉన్నాం అనేట్టుగా జ్ఞానాంబ కట్టడి చేసింది. మరి జానకి రామాలు ఎలాంటి నిర్ణయం తీసుకుంటారో రేపటి ఎపిసోడ్‌లో చూద్దాం.